ପାଟନା ହୋଟେଲରେ ଲାଗିଲା ଭୟଙ୍କର ନିଆଁ, ୬ ଜୀବନ୍ତ ଦଗ୍ଧ; ପୋଡ଼ି ହୋଇ ୨୦ ଗୁରୁତର

ବିହାରର ରାଜଧାନୀ ପାଟନାରେ ଭୟାବହ ଅଗ୍ନିକାଣ୍ଡ । ଏଠାରେ ରେଳ ଜଙ୍କସନ ନିକଟସ୍ଥ ଏକ ହୋଟେଲରେ ବ୍ୟାପକ ଅଗ୍ନିକାଣ୍ଡ ଘଟିଛି । ଏହି ଘଟଣାରେ ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୨୦ରୁ ଅଧିକ ଲୋକ ପୋଡ଼ି ହୋଇ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୩ ପୁରୁଷ ଏବଂ ୩ ମହିଳା ଅଛନ୍ତି । ନିଆଁ ଏତେ ଭୟଙ୍କର ଥିଲା ଯେ ଆଖପାଖ ବିଲ୍ଡିଂ ମଧ୍ୟ ଏହା ସଂସ୍ପର୍ଶରେ ଆସିଯାଇଥିଲା ।

ଖବର ମୁତାବକ, ଷ୍ଟେସନ ରୋଡ୍ ନିକଟସ୍ଥ ପାଲ୍ ହୋଟେଲରେ ହଠାତ୍ ନିଆଁ ଲାଗିଥିଲା । ଗ୍ୟାସ ସିଲିଣ୍ଡରରେ ବିସ୍ଫୋରଣ ହେତୁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । ଅଗ୍ନିକାଣ୍ଡ ବେଳେ ହୋଟେଲରେ ଫସି ରହିଥିବା ୬ ଜଣ ଲୋକ ଜୀବନ୍ତ ଦଗ୍ଧ ହୋଇଯାଇଥିଲେ । ନିଆଁରେ ପୋଡ଼ି ହୋଇ ଆହତ ହୋଇଥିବା ୨୦ରୁ ଅଧିକ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।

ଖବର ପାଇ ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ । ବର୍ତ୍ତମାନ ଖବର ଆସିଛି ଯେ ନିଆଁକୁ ଆୟତ୍ତ କରି ନିଆଯାଇଛି । ଅଢ଼େଇ ଘଣ୍ଟାର ରେସ୍‌କ୍ୟୁ ଅପରେସନ ପରେ ସମସ୍ତଙ୍କୁ ଉଦ୍ଧାର କରାଯାଇଛି । ଯାତାୟାତ ସ୍ୱାଭାବିକ କରିବା ପାଇଁ ପୋଲିସ ଅଧିକାରୀମାନେ ଲାଗିଛନ୍ତି । ସୂଚନା ମୁତାବକ, ନିଆଁ ହୋଟେଲର ତଳ ମହଲାରେ ଲାଗିଥିଲା । ତେଣୁ ଉପର ମହଲାରେ ଜଳଖିଆ କରୁଥିବା ଲୋକମାନେ ଏଥିରେ ଫସିଯାଇଥିଲେ । ବହୁ ପରିଶ୍ରମ ପରେ ୪୫ ଜଣଙ୍କୁ ଉଦ୍ଧାର କରାଯାଇଛି । ସେମାନଙ୍କ ମଧ୍ୟରେ ମହିଳା, ପୁରୁଷ ଏବଂ ଛୋଟ ପିଲା ଅଛନ୍ତି । ଉଦ୍ଧାର ପରେ ସେମାନଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି ।

ସେପଟେ ଅଗ୍ନିକାଣ୍ଡର ଭିଡିଓ ଏବେ ସାମ୍ନାକୁ ଆସିଛି, ଯେଉଁଥିରେ ନିଆଁ ବହୁ ଉଚ୍ଚକୁ ଉଠୁଥିବାର ଦେଖାଯାଉଛି । ଏହି ଅଗ୍ନିକାଣ୍ଡ ଯୋଗୁ ସମଗ୍ର ଅଞ୍ଚଳ ଧୂଆଁମୟ ହୋଇଯାଇଥିଲା । ଭିଡିଓରେ ଅଗ୍ନିଶମ କର୍ମଚାରୀମାନେ ନିଆଁକୁ ଆୟତ୍ତ କରିବାରେ ବ୍ୟସ୍ତ ଅଛନ୍ତି । ବହୁ ସଂଖ୍ୟାରେ ପୋଲିସ ଫୋର୍ସ ସହ ଆମ୍ବୁଲାନ୍ସ ଘଟଣାସ୍ଥଳରେ ଉପସ୍ଥିତ ଅଛି । ରେଳ ଷ୍ଟେସନଠାରୁ ୫୦ ମିଟର ଦୂରରେ ଏହି ଅଗ୍ନିକାଣ୍ଡ ଘଟିଥିବା କୁହାଯାଉଛି ।