୩୧ ବର୍ଷ ପରେ ରାଜୀବ ଗାନ୍ଧି ହତ୍ୟା ମାମଲାରେ ଦୋଷୀ ନଳିନୀ ଶ୍ରୀହରନ୍‌ଙ୍କ ସହ ଅନ୍ୟ ୫ ଜଣ କୋର୍ଟରୁ ହେଲେ ଖଲାସ

ଭେଲୋର :  ୧୯୯୧ ମସିହାରେ ହୋଇଥିବା ରାଜୀବ ଗାନ୍ଧି ହତ୍ୟା ମାମଲାରେ ଆଜୀବନ କାରାଦଣ୍ଡ କାଟୁଥିବା ୬ ଜଣଙ୍କୁ ମୁକ୍ତି ନେଇ ସୁପ୍ରିମକୋର୍ଟ ନିର୍ଦ୍ଦେଶ ଦେବାର ଦିନକ ପରେ ଆଜି ସେମାନଙ୍କୁ ମୁକ୍ତ କରାଯାଇଛି । ରାଜୀବ ଗାନ୍ଧିଙ୍କ ମାମଲାରେ ୩୧ ବର୍ଷ ଜେଲରେ କାଟିଥିବା ୫ ଜଣ- ନଳିନୀ ଶ୍ରୀହରନ, ତାଙ୍କ ସ୍ୱାମୀ ମୁରୁଗାନ୍‌, ସନ୍ଥନ, ରବର୍ଟ ପାଏସ ଏବଂ ଜୟ କୁମାରଙ୍କୁ ଆଜି ମୁକ୍ତ କରାଯାଇଛି । ଅନ୍ୟ ଜଣେ ଦୋଷୀ ଆର. ପି . ରବିଚନ୍ଦ୍ରନ ମଧ୍ୟ  ଖଲାସ ହେବେ ।

ଜେଲ୍‌ରୁ ମୁକ୍ତି ପାଇବା ପରେ ନଳିନୀ,ଏହା ତାଙ୍କ ପାଇଁ ଏକ ନୂଆ ଜୀବନ ମିଳିଲା ବୋଲି କହିଛନ୍ତି । ଏଥିପାଇଁ ମୋତେ ସମର୍ଥନ କରିଥିବାରୁ ମୁଁ ତାମିଲନାଡୁବାସୀଙ୍କୁ ଧନ୍ୟବାଦ ଦେଉଛି । ଏଥିସହ ନଳିନୀ ରାଜ୍ୟ ଓ କେନ୍ଦ୍ର ସରକାରଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି । ତେବେ ରାଜନୀତିରେ ତାଙ୍କର ପ୍ରବେଶ ନେଇ ସେ ମନା କରିଦେଇଛନ୍ତି ।

ମଇ ମାସରେ ସୁପ୍ରିମକୋର୍ଟ ତାଙ୍କର ଅତିରିକ୍ତ କ୍ଷମତା ପ୍ରୟୋଗ କରି ୭ ଜଣ ଦୋଷୀଙ୍କ ମଧ୍ୟରୁ ଏ ଜି ପିରାରିଭାଲନ ନାମକ ଜଣଙ୍କୁ ଜେଲ୍‌ରୁ ମୁକ୍ତି କରିଥିଲେ । ତେଣୁ ସେହି ସମାନ ନ୍ୟାୟରେ ଏମାନଙ୍କୁ ଖଲାସ କରିବା ପାଇଁ ସୁପ୍ରିମକୋର୍ଟ ଗତକାଲି କହିଥିଲେ । ପ୍ରକାଶଯୋଗ୍ୟ, ତାମିଲନାଡୁ ସରକାରଙ୍କ କ୍ୟାବିନେଟ ଏହି ଦୋଷୀମାନଙ୍କୁ ମୁକ୍ତ କରିବା ପାଇଁ ୨୦୧୮ ରେ ରାଜ୍ୟପାଳଙ୍କୁ ସୁପାରିଶ କରିଥିଲା ।

ଆଜି ସକାଳେ ପାରୋଲରେ ଥିବା ନଳିନୀ ଶ୍ରୀହରନ୍‌ ନିକଟସ୍ଥ ଥାନାକୁ ହାଜିରା ପକାଇବା ପାଇଁ ଯାଇଥିଲେ । ଭେଲୋର ମହିଳାମାନଙ୍କ ପାଇଁ ଥିବା ସ୍ୱତନ୍ତ୍ର କାରାଗାରରେ ଆଜି ଫର୍ମାଲିଟି ପୁରଣ କରିବା ପରେ ସେ ମୁକ୍ତ ହୋଇଥିଲେ । ଏବଂ ତା ପରେ ସେଣ୍ଟ୍ରାଲ ଜେଲରୁ ଖଲାସ ହୋଇଥିବା ତାଙ୍କ ସ୍ୱାମୀ ଭି ଶ୍ରୀହରନ ଆଲିଆସ ମୁରୁଗାନ ଓ ସନ୍ଥନଙ୍କୁ ନେବା ପାଇଁ ଯାଇଥିଲେ । ମୁରୁଗାନ ଓ ସନ୍ଥନ ଦ୍ୱୟ ଶ୍ରୀଲଙ୍କା ନାଗରୀକ ହୋଇଥବାରୁ ସେମାନଙ୍କୁ ପୋଲିସ ଭ୍ୟାନ ଯୋଗେ ତ୍ରିଚୁରାପଲ୍ଲୀ ଠାରେ ଥିବା ରିଫ୍ୟୁଜି କ୍ୟାମ୍ପକୁ ନିଆଯାଇଥିଲା । ପୁଝାଲ କାରାଗାରରୁ ଖଲାସ ପାଇଥିବା ଅନ୍ୟ ଦୁଇଜଣ ଶ୍ରୀଲଙ୍କା ନାଗରୀକ ରବର୍ଟ ପାଏସ ଓ ଜୟକୁମାରଙ୍କୁ ମଧ୍ୟ ରିଫ୍ୟୁଜି କ୍ୟାମ୍ପକୁ ନିଆଯାଇଥିଲା ।

ତେବେ ନଳିନୀ ଚେନ୍ନାଇରେ ରହିବେ କିମ୍ବା ଲଣ୍ଡନରେ ରହୁଥିବା ତାଙ୍କ ଝିଅଙ୍କ ପାଖକୁ ଯିବେ ତାହା ଏପର୍ଯ୍ୟନ୍ତ ଜଣାପଡିନାହିଁ ।  ତାଙ୍କ ସ୍ୱାମୀ ମୁରୁଗାନଙ୍କ ଭାଗ୍ୟ କ’ଣ ହେବ, ତାଙ୍କୁ ଶ୍ରୀଲଙ୍କାକୁ ଛଡ଼ାଯିବ କି ନାହିଁ ତାହା ଜଣାପଡିନାହିଁ । ରାଜ୍ୟ ସରକାର ସେ ବିଷୟରେ ଚିନ୍ତା କରିବେ ବୋଲି ତାଙ୍କର ଓକିଲ କହିଛନ୍ତି । ଅନ୍ୟ ଜଣେ ଦୋଷୀ ସନ୍ଥନ ନିଜ ଦେଶ ଶ୍ରୀଲଙ୍କାକୁ ଫେରିଯିବେ ବୋଲି ସେ ତାଙ୍କର ଇଚ୍ଛା ପ୍ରକାଶ କରିଛନ୍ତି ।

ଦୋଷୀମାନଙ୍କୁ ମୁକ୍ତ କରିବା ସମୟରେ ସୁପ୍ରିମକୋର୍ଟ କହିଥିଲେ, ଦୋଷୀମାନେ ସନ୍ତୋଷଜନକ ବ୍ୟବହାର ଦେଖାଇଛନ୍ତି, ପାଠ ପଢ଼ି ଡିଗ୍ରୀ ମଧ୍ୟ ହାସଲ କରିଛନ୍ତି, ବହି ଲେଖିଛନ୍ତି ଏବଂ ସାମାଜିକ କାର୍ଯ୍ୟରେ ସାମିଲ ହୋଇଛନ୍ତି ।
ହେଲେ କଂଗ୍ରେସ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଦୃଢ଼ ଭାବେ ବିରୋଧ କରିଛି । ଦଳ ସୋନିଆ ଗାନ୍ଧି, ରାହୁଳ ଓ ପ୍ରିୟଙ୍କାଙ୍କ ମତରେ ସନ୍ତୁଷ୍ଟ ନୁହେଁ ବୋଲି କହିଛି । ଯିଏକି ଅପରାଧୀଙ୍କୁ ଦୟା ଦେଖାଇଛନ୍ତି ।

୨୦୦୦ ମସିହାରେ ନଳିନୀଙ୍କ ଫାଶୀ ଦଣ୍ଡକୁ ଆଜୀବନ କାରଦଣ୍ଡରେ ପରିବର୍ତ୍ତନ କରାଯାଇଥିଲା । ପରେ ୨୦୧୪ରେ ଅନ୍ୟ ୬ ଦୋଷୀଙ୍କ ଦଣ୍ଡ ମଧ୍ୟ କୋହଳ କରାଯାଇଥିଲା । ସେତେବେଳର ମୁଖ୍ୟମନ୍ତ୍ରୀ ଜେ ଜୟଲଳିଥା ସେମାନଙ୍କୁ ଖଲାସ କରିବା ପାଇଁ ସୁପାରିଶ କରିଥିଲେ ।

ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧିଙ୍କୁ ୧୯୯୧ ମସିହା ମଇ ୨୧ ରେ ତାମିଲନାଡୁ ଶ୍ରୀପେରୁମବୁଦୁର ଠାରେ ଏକ ସର୍ବସାଧାରଣ ସଭାରେ ଏଲ୍‌ଟିଟିଇ ଗ୍ରୁପ ଆତ୍ମଘାତୀ ବୋମା ଦ୍ୱାରା ହତ୍ୟା କରିଥିଲେ ।