କରୋନା ଆକ୍ରାନ୍ତ ଦିନ କୁ ଦିନ ବଢି ଚାଲିଥିବାରୁ ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ରାଜ୍ୟରେ ନାଇଟ କର୍ଫ୍ୟୁ ଡିସେମ୍ବର ପହିଲାରୁ ଜାରି କରିବା ନେଇ ନିର୍ଦ୍ଦେଶ ଦେଇଛନ୍ତି। ସୂଚନା ମୁତାବକ ଡିସେମ୍ବର ୧ ତାରିଖ ଠାରୁ ୧୫ ତାରିଖ ଯାଏଁ ରାଜ୍ୟର ସମସ୍ତ ସହର ସମେତ ଗାଁ ମାନଙ୍କରେ ରାତ୍ରୀକାଳୀନ କର୍ଫ୍ୟୁ ଲାଗୁ କରାଯିବ | ଆଉ ଯେଉଁ ମାନେ ଏହି ନିୟମ ଗୁଡିକୁ ଅମାନ୍ୟ କରିବେ ସେମାନଙ୍କ ଠାରୁ ଦୁଇ ଗୁଣା ଜୋରିମାନା ଆଦାୟ କରାଯିବା ନେଇ ନିର୍ଦ୍ଦେଶନାମା ଜାରି ହୋଇଛି ।
ଆସନ୍ତା ମଙ୍ଗଳବାର ଠାରୁ ରାତି ୧୦ଟାରୁ ଭୋର ୫ଟା ପର୍ଯ୍ୟନ୍ତ ରାତ୍ରୀ କାଳୀନ କର୍ଫ୍ୟୁ ଲାଗୁ କରାଯିବ। ଏହି ସମୟ ମଧ୍ୟରେ କେବଳ ଜରୁରୀ ସେବା ତଥା ଅନୁଷ୍ଠାନକୁ ଛାଡ଼ି ସମସ୍ତ ଅନୁଷ୍ଠାନ ସମେତ ବନ୍ଦ ରହିବ । ଏହା ସହ ଯାତାୟାତ ଉପରେ ବି କଟକଣା ଲାଗୁ କରାଯିବ । ସେହିପରି ବିବାହ ଭୋଜି, ରେଷ୍ଟୁରାଣ୍ଟ ଓ ହୋଟେଲ ରାତି ୯.୩୦ରୁ ବନ୍ଦ କରାଯିବ । ଯଦି କେହି କୋଭିଡ ନିୟମ ଉଲ୍ଲଙ୍ଘନ କରେ, ତା’ହେଲେ ତାଙ୍କ ଥରୁ ୧୦୦୦ ଟଙ୍କାର ଜୋରିମାନା ଆଦାୟ କରାଯିବ । ଶୀତ ପ୍ରକୋପରେ କରୋନାର ଦ୍ୱିତୀୟ ଲହରୀ ଆସିବାର ଆଶଙ୍କା ଥିବାର ସରକାର ଏଭଳି ପଦକ୍ଷେପ ନେଇଥିବା ଜଣାଯାଇଛି ।
ସୂଚନା ମୁତାବକ ମଙ୍ଗଳବାର ପଞ୍ଜାବରେ କରୋନା କାରଣରୁ ୨୨ ଜଣଙ୍କ ମୃତ୍ୟୁ ହୋଇଥିବା ବେଳେ ୬୧୪ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏପରି କି ପଞ୍ଜାବର ଜଣେ ବରିଷ୍ଠ ଅଧିକାରୀଙ୍କ ସମେତ ୬ ଅଧିକାରୀଙ୍କ ରିପୋର୍ଟ ପଜିଟିଭ ଆସିଛି। ଦିନକୁ ଦିନ କରୋନା ସଂକ୍ରମିତଙ୍କ ସଂଖ୍ୟା ବଢ଼ୁଥିବାରୁ ଏଭଳି ପଦକ୍ଷେପ ପଞ୍ଜାବ ସରକାର ନେଇଥିବା ନେଇ ସ୍ପଷ୍ଟ ହୋଇଛି ।