ଆପଣ ପ୍ରାୟତଃ ଫିଲ୍ମ ସିରିଜରେ ଦେଖିଥିବେ ଯେ କୋର୍ଟରେ ଥିବା ‘ନ୍ୟାୟ ଦେବୀ’ ପ୍ରତିମୂର୍ତ୍ତିଙ୍କ ଆଖିରେ କଳା ପଟି ବନ୍ଧା ହୋଇଥାଏ, କିନ୍ତୁ ଏବେ ରହି ପ୍ରତିମୂର୍ତ୍ତିରେ ହୋଇଛି ବଡ଼ ଧରଣର ପରିବର୍ତ୍ତନ । ସୁପ୍ରିମକୋର୍ଟ ନ୍ୟାୟ ଦେବୀଙ୍କ ଆଖିରୁ ଖୋଲିଲା କଳା ପଟି । ଭାରତର ସୁପ୍ରିମକୋର୍ଟ ବିଚାରପତିମାନଙ୍କ ପାଠାଗାରରେ ଥିବା ‘ନ୍ୟାୟ ଦେବୀ’ଙ୍କ ପ୍ରତିମୂର୍ତ୍ତିରେ ବଡ଼ ଧରଣର ପରିବର୍ତ୍ତନ କରାଯାଇଥିବା ଦେଖାଯାଇଛି । ନ୍ୟାୟ ଦେବୀଙ୍କ ପ୍ରତିମୂର୍ତ୍ତିର ଆଖିରେ ଲାଗିଥିବା କଳା କପଡ଼ାକୁ ହଟାଇ ଦିଆଯାଇଛି ।
ସେହିପରି ବାମ ହାତରେ ଖଣ୍ଡା ପରିବର୍ତ୍ତେ ଭାରତୀୟ ସମ୍ବିଧାନ ରଖାଯାଇଛି । କିନ୍ତୁ ଡାହାଣ ହାତରେ ପୂର୍ବ ଭଳି ନ୍ୟାୟ ତରାଜୁ ରହିଛି । ମିଳିଥିବା ସୂଚନା ଅନୁଯାୟୀ, ଏହି ନୂତନ ପ୍ରତିମୂର୍ତ୍ତି ନିର୍ମାଣ କରାଯାଇ ୨୦୨୩ ଏପ୍ରିଲରେ ବିଚାରପତିଙ୍କ ନୂତନ ପାଠାଗାର ନିକଟରେ ସ୍ଥାପନ କରାଯାଇଥିଲା । କିନ୍ତୁ ଏବେ ଏହି ଫଟୋ ସୋସିଆଲ ମିଡିଆରେ ଖୁବ ଜୋରସୋରରେ ଭାଇରାଲ ହେବାରେ ଲାଗିଛି । ‘ନ୍ୟାୟଦେବୀ’ଙ୍କ ପୂର୍ବର ପ୍ରତିମୂର୍ତ୍ତିରେ ଆଖିରେ ପଟି ବନ୍ଧା ଏହା ଆଇନ ସମ୍ମୁଖରେ ସମସ୍ତେ ସମାନ ବୋଲି ଦର୍ଶାଉଥିଲା । ଅର୍ଥାତ ଅଦାଲତ ବିନା ଭେଦଭାବରେ ରାୟ ଶୁଣାଇବେ ।
ଏଥି ସହିତ ଅନ୍ୟାୟକୁ ଦଣ୍ଡଦେବା ତଥା ଶକ୍ତିର ପ୍ରତୀକ ଥିଲା ଖଣ୍ଡା । କିନ୍ତୁ ଏବେ ସୁପ୍ରିମକୋର୍ଟ ବିଚାରପତିଙ୍କ ପାଠଗାରରେ ନ୍ୟାୟଦେବୀଙ୍କ ନୂଆ ପ୍ରତିମୂର୍ତିର ଆଖି ଖୋଲା ରହିଛି ଏବଂ ବାମ ହାତରେ ସମ୍ବିଧାନ ରହିଛି । ଏକବିଂଶ ଶତାବ୍ଦୀର ନୂତନ ଭାରତରେ ଅନେକ ନୂତନ ନିୟମ ପ୍ରଣୟନ କରାଯାଉଛି ଏବଂ ପୁରୁଣା ବ୍ରିଟିଶ ନିୟମଗୁଡ଼ିକ ପରିବର୍ତ୍ତନ କରାଯାଉଛି । ଆଜିକାଲି ସରକାର ଅନେକ ପୁରୁଣା ନିୟମକୁ ପରିବର୍ତ୍ତନ କରିଛନ୍ତି କିମ୍ବା ରଦ୍ଦ କରିଛନ୍ତି । ବର୍ତ୍ତମାନ ବ୍ରିଟିଶ ଯୁଗର ପରମ୍ପରାକୁ ଛାଡି ଭାରତୀୟ ନ୍ୟାୟପାଳିକା ମଧ୍ୟ ଏକ ନୂତନ ରୂପ ଗ୍ରହଣ କରିବା ଆରମ୍ଭ କରିଛି ।
ମିଡିଆ ରିପୋର୍ଟ ଅନୁଯାୟୀ ସୁପ୍ରିମକୋର୍ଟର ପ୍ରଧାନ ବିଚାରପତି DY ଚନ୍ଦ୍ରଚୁଡ଼ଙ୍କ ନିର୍ଦ୍ଦେଶରେ ଏହି ନୂତନ ପ୍ରତିମୂର୍ତ୍ତି ନିର୍ମାଣ କରାଯାଇଛି । ସେ ବିଶ୍ୱାସ କରନ୍ତି ଯେ ଆଇନ ଅନ୍ଧ ନୁହେଁ, ଆମେ ବ୍ରିଟିଶ ପରମ୍ପରାଠାରୁ ଆଗକୁ ବଢିବା ଉଚିତ୍ । ବର୍ତ୍ତମାନ ସମୟ ଆସିଯାଇଛି ଯେ ଆମେ ‘ନ୍ୟାୟ ଦେବୀ’ଙ୍କ ସ୍ୱରୂପ ପରିବର୍ତ୍ତନ କରିବା ଉଚିତ୍ । ସେ କହିଛନ୍ତି ‘ନ୍ୟାୟ ଦେବୀ’ଙ୍କ ଆଖି ବନ୍ଦ ରହିବ ଉଚିତ ନୁହେଁ, କାରଣ ଆଇନ ଅନ୍ଧ ନୁହେଁ । ଏହା ସହିତ, ହାତରେ ଖଣ୍ଡା ରହିବା ଉଚିତ୍ ନୁହେଁ, କାରଣ ଏହା ହିଂସାର ପ୍ରତୀକ ।
ସମ୍ବିଧାନ ଅନୁଯାୟୀ ନ୍ୟାୟପାଳିକା ନ୍ୟାୟ ପ୍ରଦାନ କରେ, ତେଣୁ ‘ନ୍ୟାୟ ଦେବୀ’ଙ୍କ ହାତରେ ସମ୍ବିଧାନ ରହିବା ଉଚିତ୍ । ଅନ୍ୟ ହାତରେ ତରାଜୁ ରହିବା ସଠିକ୍, କାରଣ ନ୍ୟାୟପାଳିକା ସମସ୍ତଙ୍କ ପାଇଁ ସମାନ ଭାବରେ ବିଚାର କରନ୍ତି । ସୂଚନାଯୋଗ୍ୟ, ଯେଉଁ ପ୍ରତିମୂର୍ତ୍ତିକୁ ଆମେ ନ୍ୟାୟ ଦେବୀଙ୍କ ରୂପରେ ଦେଖୁଥିଲୁ, ସେହି ପ୍ରତିମୂର୍ତ୍ତିକୁ ଅଷ୍ଟାଦଶ ଶତାବ୍ଦୀରେ ଜଣେ ବ୍ରିଟିଶ ଅଧିକାରୀ ଗ୍ରୀସରୁ ଆଣିଥିଲେ । ନ୍ୟାୟର ଏହି ଦେବୀ ଗ୍ରୀସର ପ୍ରାଚୀନ ଦେବୀ ଏବଂ ତାଙ୍କ ନାମ ହେଉଛି ଜଷ୍ଟିୟା ।
ସେଠାରେ ଏହି ଦେବୀ ସେମାନେ ନ୍ୟାୟର ପ୍ରତୀକ ଭାବରେ ବ୍ୟବହୃତ ହୁଅନ୍ତି । ତାଙ୍କ ଆଖିରେ ଥିବା କଳା ପଟିର ଅର୍ଥ ହେଉଛି ସେ ନିରପେକ୍ଷ ଭାବରେ ନ୍ୟାୟ ପ୍ରଦାନ କରିବେ, କାରଣ ଯଦି ତାଙ୍କ ଆଖି ଖୋଲା ଥାଏ, ତେବେ ନ୍ୟାୟ କ୍ଷେତ୍ରରେ ପକ୍ଷପାତିତା ହୋଇପାରେ । ସ୍ୱାଧୀନତା ପରେ, ଆମେ ଏହି ପ୍ରତିମୂର୍ତ୍ତିକୁ ‘ନ୍ୟାୟ ଦେବୀ’ ବୋଲି ମାନ୍ୟତା ଦେଇଥିଲୁ । ଯେଉଁଥିରେ ଏବେ ବଡ଼ ପରିବର୍ତ୍ତନ କରାଯାଇଛି ।