ଶ୍ରୀଲଙ୍କା ବିସ୍ଫୋରଣ ପରେ କଫ୍ୟୁ ଜାରି, ସୁରକ୍ଷା ବ୍ୟବସ୍ଥା କଡ଼ାକଡ଼ି

ଇଷ୍ଟରରେ ସିରିଜ ବିସ୍ଫୋରଣ ପରେ ଶ୍ରୀଲଙ୍କାରେ ପରିସ୍ଥିତି ଉଦବେଗଜନକ ରହିଛି । ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ବେଳେ ରାତିରେ କଫ୍ୟୁ ଜାରି କରାଯାଇଥିଲା । ପରିସ୍ଥିତିରେ ସୁଧାର ଆସିନଥିବା ବେଳେ ଶନିବାର ସେନା ଓ ଆତଙ୍କବାଦୀଙ୍କ ଗୁଳିବିନିମୟରେ ୧୫ଜଣଙ୍କର ପ୍ରାଣହାନି ଘଟିଛି । କଲ୍ମୁନାଇ ସହରରେ କିଛି ଆତଙ୍କବାଦୀ ଲୁଚିଥିବା ଖବର ମିଳିବା ପରେ ସେନା ଅପରେସନରେ ୧୫ଜଣ ପ୍ରାଣ ହରାଇଥିଲେ ।

ଶ୍ରୀଲଙ୍କାରେ ଏବେବି ଆତଙ୍କବାଦୀ ଲୁଚି ରହି ହିଂସାକାଣ୍ଡ ଭିଆଉଥିବା ସ୍ପଷ୍ଟ ହୋଇଛି । ସେପଟେ ଦେଶରେ ୭୦ରୁ ଅଧିକ ସନ୍ଦିଗ୍ଧ ଆତଙ୍କବାଦୀ ଲୁଚି ରହିଥିବା ଅନୁମାନ କରିଛି ଶ୍ରୀଲଙ୍କା ସେନା । ଏହାକୁ ଦୃଷ୍ଟିକୁ ରଖି ଭାରତ ସରକାର ନିଜ ନାଗରିକଙ୍କୁ ଶ୍ରୀଲଙ୍କା ଯିବାକୁ ବାରଣ କରିଛନ୍ତି । ଅତି ଜରୁରୀ ନହେଲେ ଶ୍ରୀଲଙ୍କା ନଯିବାକୁ ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ ବିଜ୍ଞପ୍ତି ଜାରି କରାଯାଇଛି । ଏପ୍ରିଲ ୨୧ତାରିଖରେ ଇଷ୍ଟର ଦିନ ଶ୍ରୀଲଙ୍କାରେ ୮ଟି ଆତ୍ମଘାତୀ ବିସ୍ଫୋରଣରେ ୩୯୦ରୁ ଅଧିକ ଲୋକ ପ୍ରାଣ ହରାଇଥିଲେ ।