ଜୀବନ ହାରିବାକୁ ଛାତ ଉପରୁ ଡେଇଁଲା ପ୍ରେମିକା, ଅଣ୍ଟା ହାଡ଼ ଭାଙ୍ଗି ହସପିଟାଲରେ

ବରେଲି : ଘର ଲୋକ ସେମାନଙ୍କ ମିଳାମିଶାକୁ ପସନ୍ଦ କଲେନି । ସେମାନଙ୍କ ପ୍ରେମକୁ ସ୍ୱୀକୃତି ଦେଲେ ନାହିଁ । ତେଣୁ ପ୍ରେମୀ ଯୁଗଳ କଣ କଲେ ଆସନ୍ତୁ ଏ ଖବରରୁ ଜାଣିବା । ଘଟଣା ହେଉଛି ଉତ୍ତର ପ୍ରଦେଶ ରାୟବରେଲି ଅଞ୍ଚଳର । ଘର ଲୋକ ଯେତେବେଳେ ବିରୋଧ କଲେ ବିଳମ୍ବିତ ରାତିରେ ପ୍ରେମିକା ଓ ପ୍ରେମିକ ଆତ୍ମହତ୍ୟା କରିବାକୁ ସ୍ଥିର କଲେ । ତେଣୁ ଦୁଇ ମହଲା କୋଠା ଉପରକୁ ଚଢ଼ି ଗଲେ । ସେମାନେ ଛାତ ଉପରୁ ଡେଇଁବାକୁ ଉଦ୍ୟମ କଲା ବେଳେ ପ୍ରେମିକାର ଘର ଲୋକେ ପ୍ରେମିକକୁ ଧରି ପକାଇଲେ । ହେଲେ ପ୍ରେମିକା ନିଜ ପ୍ରେମିକର ନାଁ ଧରି ଜୋର୍‌ରେ ପାଟି କରି କହିଲା ‘ଆଜମ କେବଳ ମୋର’ । ଏତିକି କହି ଛାତ ଉପରୁ ଡେଇଁ ପଡ଼ିଲା । ଫଳରେ ତାର ଅଣ୍ଟା ଭାଙ୍ଗି ଯାଇଛି । ଗୁରୁତର ଅବସ୍ଥାରେ ତାକୁ ଏକ ହସପିଟାଲରେ ଭର୍ତ୍ତି କରାଯାଇଛି । ଡାକ୍ତର କହୁଛନ୍ତି ସେ ଆଉ ବିଛଣାରୁ ଉଠିବା ସମ୍ଭାବନା କମ୍‌ । ଅନ୍ୟପଟେ ପ୍ରେମିକକୁ ପ୍ରେମିକା ଘର ଲୋକେ ପୋଲିସ୍‌ରେ ଦେଇଛନ୍ତି ।

ଯାହା ସୂଚନା ମିଳିଛି ବରାଦରୀ ଥାନା ଅଞ୍ଚଳରେ ଏହି ପ୍ରେମୀ ଯୁଗଳ ଗତ ପାଞ୍ଚ ବର୍ଷ ଧରି ପ୍ରେମ ସମ୍ପର୍କରେ ଥିଲେ । ଏହାକୁ ଉଭୟ ପରିବାର ବିରୋଧ କରିଆସୁଥିଲେ । ତେବେ ପୁଅ ଝିଅଙ୍କ ଜିଦ୍‌ ଆଗରେ ହାର୍‌ ମାନିବା ପରେ ଦୁହିଙ୍କ ବିବାହ ପାଇଁ ରାଜି ହୋଇଯାଇଥିଲେ । ହେଲେ ପରବର୍ତ୍ତୀ ସମୟରେ କୌଣସି ଘଟଣାକୁ ନେଇ ବାହାଘର ଭାଙ୍ଗି ଗଲା। ତଥାପି ସେମାନେ ସମ୍ପର୍କରେ ଥିଲେ ଏବଂ ବାହା ହେବାକୁ ଚାହୁଁଥିଲେ । ଶେଷରେ ଆଉ କିଛି ବାଟ ନପାଇ ଆତ୍ମହତ୍ୟା କରିବାକୁ ସ୍ଥିର କଲେ । ଘଟଣା ଦିନ ରାତିରେ ଦୁହେଁ ପ୍ରେମିକା ଘର ଛାତ ଉପରେ ଏକାଠି ହୋଇଥିଲେ । ବହୁ ସମୟ ଧରି କଥାବାର୍ତ୍ତା ହେବା ସହ କାନ୍ଦିଥିଲେ । ତା ପରେ ଛାତ ଉପରୁ ଡେଇଁ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ । ହେଲେ ଏଇ ନିଷ୍ପତ୍ତି ଏବେ ଏହି ପ୍ରେମୀ ଯୁଗଳ ପାଇଁ ଭାରୀ ପଡ଼ିଛି ।