ନେପାଳ ପବ୍‌ରେ ପାର୍ଟି କରୁଛନ୍ତି ରାହୁଲ ଗାନ୍ଧୀ, ଭିଡିଓ ଭାଇରାଲ ହେବା ପରେ ବିଜେପି କଲା ଟାର୍ଗେଟ୍‌

ନୂଆଦିଲ୍ଲୀ: ପବ୍‌ରେ ରାହୁଲ ଗାନ୍ଧୀ। ନେପାଳ ଗସ୍ତରେ ଯାଇଥିବା କଂଗ୍ରେସ ନେତା ରାହୁଲ ଗାନ୍ଧୀଙ୍କର ଏକ ପବ୍‌ ଭିଡିଓ ଏବେ ସୋସିଆଲ ମିଡିଆରେ ଖୁବ୍‌ ଭାଇରାଲ ହେଉଛି। ଭିଡିଓରେ ରାହୁଲ ପବ୍‌ରେ ପାର୍ଟି କରୁଥିବା ଦେଖାଯାଇଛି। ଏହି ଭିଡିଓକୁ ନେଇ ଏବେ ବିଜେପି କଂଗ୍ରେସକୁ ଘେରିଛି।

ନେପାଳ ଗଣମାଧ୍ୟମ ମୁତାବକ, ରାହୁଲ ଗାନ୍ଧୀ ନେପାଳରେ ଜଣେ ସାଙ୍ଗ ସୁମ୍ନିମା ଉଦାସଙ୍କ ବାହାଘରରେ ସାମିଲ ହେବାକୁ କାଠମାଣ୍ଡୁ ଆସିଛନ୍ତି। ସୁମ୍ନିମାଙ୍କ ବାପା ଭୀମ ଉଦାସ କହିଛନ୍ତି- ଆମେ ରାହୁଲ ଗାନ୍ଧୀଙ୍କୁ ଝିଅ ବିବାହରେ ଯୋଗ ଦେବାକୁ ନିମନ୍ତ୍ରଣ କରିଥିଲୁ। ଭୀମ ଉଦାସ ମିଆଁମାରରେ ନେପାଳର ରାଷ୍ଟ୍ରଦୂତ ଭାବେ କାମ କରୁଛନ୍ତି। ତାଙ୍କ ଝିଅ ସୁମ୍ନିମା ସିଏନ୍‌ଏନ୍‌ରେ ପୂର୍ବ ସାମ୍ବାଦିକା ଥିଲେ।

ରିପୋର୍ଟ ଅନୁସାରେ, ରାହୁଲ ଗାନ୍ଧୀ ସୋମବାର ଦିନ କାଠମାଣ୍ଡୁରେ ପହଞ୍ଚିଥିଲେ। କାଲି ସେ ସୁମ୍ନିମା ଉଦାସଙ୍କ ବିବାହ କାର୍ଯ୍ୟକ୍ରମରେ ଯୋଗ ଦେଇଥିଲେ। ଆଜି ବିବାହ ହେବ ଓ ସ୍ୱାଗତ ସମାରୋହ ମେ’ ୫ରେ ଅନୁଷ୍ଠିତ ହେବ। ସୁମ୍ନିମାଙ୍କ ବିବାହ ନିମା ମାର୍ଟିନ ଶେରପାଙ୍କ ସହ ହେଉଛି। କେତେକ ସୋସିଆଲ ମିଡିଆ ପ୍ଲାଟଫର୍ମରେ ଭାଇରାଲ ହେଉଥିବା ଭିଡିଓରେ ରାହୁଲ ଏକ ନାଇଟ୍‌ କ୍ଲବ୍‌ରେ କିଛି ଲୋକଙ୍କ ସହ ପାର୍ଟି କରୁଥିବା ଦେଖାଯାଇଛି। ରାହୁଲଙ୍କ ଆଖପାଖରେ ଲୋକ ମଦ ପିଉଛନ୍ତି।

ତେବେ ବର୍ତ୍ତମାନ ଦେଶରେ କଂଗ୍ରେସ ନେତୃତ୍ୱ ସଙ୍କଟ ମଧ୍ୟରେ ଗତି କରୁଥିବା ବେଳେ ରାହୁଲ ଗାନ୍ଧୀଙ୍କର ପବ୍‌ ଭିଡିଓ ଭାଇରାଲ ହୋଇଛି, ଯାହା ଦଳର ସ୍ଥିତିକୁ ଆହୁରି ଖରାପ କରି ଦେଇଛି।

ରାହୁଲଙ୍କ ଭାଇରାଲ ଭିଡିଓକୁ ନେଇ ବିଜେପି ପ୍ରଶ୍ନ ଉଠାଇଛି। ପାର୍ଟି ପ୍ରବକ୍ତା ଶହଜାଦ ପୁନାଓ୍ଵାଲା କହିଛନ୍ତି- ରାହୁଲ ଗାନ୍ଧୀ କଣ କରୁଛନ୍ତି, ତାହା ତାଙ୍କ ବ୍ୟକ୍ତିଗତ ମାମଲା। କିନ୍ତୁ ଯେତେବେଳେ ରାଜସ୍ଥାନର ଯୋଧପୁରରେ ହିଂସା ହେଉଥିଲା, ରାଜସ୍ଥାନରେ କଂଗ୍ରେସ ସରକାର ଥିଲା ଓ ରାଜସ୍ଥାନ ଜଳୁଥିଲା। ଏ ନେଇ ଚିନ୍ତା ବ୍ୟକ୍ତ କରିବା ପରିବର୍ତ୍ତେ ରାହୁଲ ଗାନ୍ଧୀ ନେପାଳରେ ନାଇଟ୍‌ କ୍ଲବ୍‌ରେ ପାର୍ଟି କରୁଥିବାର ନଜର ଆସିଛନ୍ତି। ତାଙ୍କୁ ଭାରତୀୟଙ୍କ ସମସ୍ୟା ବିଷୟରେ ବୁଝିବାକୁ ହେବ। କଂଗ୍ରେସ ପାର୍ଟି ନଷ୍ଟ ହୋଇଗଲାଣି, କିନ୍ତୁ ରାହୁଲ ଗାନ୍ଧିଙ୍କୁ ପାର୍ଟି ସେମିତି ଚାଲୁଥିବ। ସେ ରାଜନୀତିରେ ଆଦୌ ସିରିୟସ୍‌ ନୁହଁନ୍ତି ବୋଲି କହିଛି ବିଜେପି।

Also Read: ଦୁର୍ଘଟଣାର ଶିକାର ହେଲେ ତନୁଶ୍ରୀ ଦତ୍ତା, ମହାକାଳଙ୍କ ଦର୍ଶନ ପାଇଁ ଯିବା ବେଳେ ବ୍ରେକ୍‌ ଫେଲ୍‌ ହୋଇଗଲା କାର