ମହାରାଷ୍ଟ୍ର ବିଧାନସଭାର ବାଚସ୍ପତି ଭାବରେ ରାହୁଲ ନର୍ଭେକର ନିର୍ବିରୋଧରେ ନିର୍ବାଚିତ ହୋଇଛନ୍ତି । ଏହି ନିଷ୍ପତ୍ତି ନେଇଛନ୍ତି ପ୍ରୋଟେମ୍ ସ୍ପିକର କାଳିଦାସ କୋଲମ୍ବକର । କେବଳ ରାହୁଲ ନର୍ଭେକର ହିଁ ବାଚସ୍ପତି ପଦ ପାଇଁ ନାମାଙ୍କନପତ୍ର ଦାଖଲ କରିଥିଲେ । ଅନ୍ୟ କେହି ବି ଏଥିପାଇଁ ନାମାଙ୍କନପତ୍ର ଦାଖଲ କରି ନ ଥିଲେ, ଯେଉଁ କାରଣରୁ ରାହୁଲ ନିର୍ବିରୋଧରେ ବାଚସ୍ପତି ଭାବରେ ନିର୍ବାଚିତ ହୋଇଥିଲେ ।
ରାହୁଲ ନର୍ଭେକର ହେଉଛନ୍ତି ବିଜେପି ଟିକେଟରେ ମୁମ୍ବାଇର କୋଲାବା ବିଧାନସଭା ନିର୍ବାଚନମଣ୍ଡଳୀରୁ ବର୍ତ୍ତମାନର ବିଧାୟକ । ମହାରାଷ୍ଟ୍ରର ୧୪ତମ ବିଧାନସଭାରେ ଅଢ଼େଇ ବର୍ଷ ଧରି ବାଚସ୍ପତି ଥିବା ନର୍ଭେକର ଏହି ଆସନରୁ ପୁନଃ ନିର୍ବାଚିତ ହୋଇଛନ୍ତି ।
ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଅଜିତ ପାୱାରଙ୍କ ସହ ନର୍ଭେକର ରବିବାର ବିଧାନସଭା ସଚିବ ଜିତେନ୍ଦ୍ର ଭୋଲେଙ୍କ ନିକଟରେ ନାମାଙ୍କନ ଦାଖଲ କରିଥିଲେ ।
ଏହାପୂର୍ବରୁ ସେ ଶିବସେନା ଦଳର ସଦସ୍ୟ ଥିଲେ । କିନ୍ତୁ ଯେତେବେଳେ ଦଳ ତାଙ୍କୁ ୨୦୧୪ ଲୋକସଭା ନିର୍ବାଚନରେ ଟିକେଟ୍ ଦେଇ ନ ଥିଲା, ସେ ରାଷ୍ଟ୍ରବାଦୀ କଂଗ୍ରେସ ପାର୍ଟିରେ ଯୋଗ ଦେଇଥିଲେ ଏବଂ ମାଭଲ ନିର୍ବାଚନମଣ୍ଡଳୀରୁ ଦଳୀୟ ଟିକେଟରେ ଲୋକସଭା ନିର୍ବାଚନ ଲଢ଼ିଥିଲେ । ହେଲେ ଏଥିରେ ସେ ଅସଫଳ ରହିଥିଲେ ।
ରାହୁଲ ନର୍ଭେକର ହେଉଛନ୍ତି ଏନସିପିର ବରିଷ୍ଠ ନେତା ରାମରାଜେ ନାଇକ ନିମ୍ବାଲକରଙ୍କ ଜ୍ୱାଇଁ । ରାହୁଲଙ୍କ ବାପା ସୁରେଶ ନର୍ଭେକର କୋଲାବା ଅଞ୍ଚଳରୁ ନଗର ନିଗମ ପରିଷଦ ଥିଲେ ।