ଭାରତରେ ପହଞ୍ଚିଲେ ଶେଖ୍ ହସିନା, ହିଣ୍ଡନ ଏୟାରବେସ୍ରେ କଲେ ଅବତରଣ
ଭାରତରେ ପହଞ୍ଚିଲେ ଶେଖ୍ ହସିନା । ବାଂଲାଦେଶର ଢାକାରୁ ପଳାଇ ଆସି ଭାରତରେ ପହଞ୍ଚିଛନ୍ତି ଶେଖ୍ ହସିନା । ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ହସିନା ଦେଶ ଛାଡ଼ିଛନ୍ତି । ସେ ବାଂଲାଦେଶ ଏୟାରଫୋର୍ସ ବିମାନ ଯୋଗେ ଭାରତରେ ପହଞ୍ଚିଛନ୍ତି ।
ସୂତ୍ର ଅନୁସାରେ, ଶେଖ୍ ହସିନାଙ୍କ ବିମାନ ହିଣ୍ଡନ ଏୟାରବେସ୍ରେ ଲ୍ୟାଣ୍ଡ କରିଛି । ସନ୍ଧ୍ୟା ୫ଟା ୩୬ ମିନିଟ୍ରେ ବିମାନ ଗାଜିଆବାଦର ହିଣ୍ଡନ ଏୟାରବେସ୍ରେ ଅବତରଣ କରିଛି । ଏଠାରେ ଏୟାରଫୋର୍ସର ବରିଷ୍ଠ ଅଧିକାରୀମାନେ ଶେଖ୍ ହସିନାଙ୍କୁ ସ୍ୱାଗତ କରିଥିଲେ । ହସିନାଙ୍କୁ ନେଇ ଆସୁଥିବା C 130J ବିମାନକୁ ହିଣ୍ଡନରେ ଅବତରଣ କରିବାକୁ ପ୍ରାଥମିକତା ଦିଆଯାଇଥିଲା ।
ସେପଟେ ବାଂଲାଦେଶରେ ବିକ୍ଷୋଭକାରୀମାନେ ପିଏମ୍ ହାଉସ୍ ଭିତରେ ପ୍ରବେଶ କରି ସରକାରୀ ସମ୍ପତ୍ତିରେ ନିଆଁ ଲଗାଇ ଦେଇଛନ୍ତି । ସେଠାରେ ବ୍ୟାପକ ଭଙ୍ଗାରୁଜା କରିଛନ୍ତି ।
କହି ରଖୁଛୁ, ବାଂଲାଦେଶରେ ପରିସ୍ଥିତି ଅଣାୟତ୍ତ ହୋଇପଡ଼ିଛି । ବ୍ୟାପକ ପୋଡ଼ାଜଳା ଏବଂ ହିଂସା ମଧ୍ୟରେ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ନିଜ ପଦରୁ ଇସ୍ତଫା ଦେଇଛନ୍ତି ।
