‘ଭିଭିଆଇପି ୱାର୍ଡରେ ଅଛନ୍ତି ସିସୋଦିଆ’, ସୁକେଶ ଚନ୍ଦ୍ରଶେଖର ଏଲଜିଙ୍କୁ ଲେଖିଥିବା ଚିଠିରେ ଦେଲେ ଆଶ୍ଚର୍ଯ୍ୟଜନକ ତଥ୍ୟ

ଠକେଇ ମାମଲାରେ ତିହାର ଜେଲରେ ଥିବା ସୁକେଶ ଚନ୍ଦ୍ରଶେଖର ଜେଲରୁ ଏଲଜିଙ୍କୁ ଚିଠି ଲେଖିଛନ୍ତି। ଏହି ଚିଠିରେ ସେ ଆମ୍ ଆଦମୀ ଦଳର ଅଧିକାରୀ ଏବଂ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଦାବିକୁ ପ୍ରତ୍ୟାଖ୍ୟାନ କରିଛନ୍ତି, ଯେଉଁଥିରେ କୁହାଯାଇଛି କି, ମନୀଷ ସିସୋଦିଆଙ୍କୁ ଜେଲରେ ଖୁଂଖାର ଅପରାଧୀଙ୍କ ସହ ରଖାଯାଇଛି ଏବଂ ତାଙ୍କ ଜୀବନକୁ ବିପଦ ରହିଛି।

ଚିଠିରେ ସୁକେଶ ଦାବି କରିଛନ୍ତି ଯେ ସିସୋଦିଆଙ୍କୁ ଜେଲ ନମ୍ବର ଏକର ୱାର୍ଡ ନମ୍ବର -୯ରେ ରଖାଯାଇଛି। ଏହି ୱାର୍ଡ ହେଉଛି ତିହାର ଜେଲର ସବୁଠାରୁ ଭିଭିଆଇପି ୱାର୍ଡ। ଏଠାରେ ଭିଭିଆଇପି ଏବଂ ହାଇ ପ୍ରୋଫାଇଲ୍ କଏଦୀମାନଙ୍କ ପାଇଁ ପ୍ରାୟ ୨୦ ହଜାର ବର୍ଗଫୁଟରେ ଏକ ସ୍ୱତନ୍ତ୍ର ୱାର୍ଡ ରହିଛି।

ଏଥିରେ କାଠ ଚଟାଣ ଲାଗିଛି ଏବଂ ସମସ୍ତ ସୁବିଧା ଉପଲବ୍ଧ ଅଛି। ଏଠାରେ ବୁଲିବା ପାଇଁ ଏକ ବଡ ବଗିଚା, ବ୍ୟାଡମିଣ୍ଟନ୍ କୋର୍ଟ ଏବଂ ଏକ ଡାଇନିଂ ଏରିଆ ମଧ୍ୟ ରହିଛି। ଚିଠିରେ ସୁକେଶ ଲେଖିଛନ୍ତି ଯେ ସେ ନିଜେ ୨୦୧୭-୧୮ରେ ସତ୍ୟେନ୍ଦ୍ର ଜୈନଙ୍କ ନିର୍ଦ୍ଦେଶରେ ଏଠାରେ ବନ୍ଦୀ ଥିଲେ।

ସେ ଦାବି କରିଛନ୍ତି ଯେ ବର୍ତ୍ତମାନ ଏଠାରେ ସିସୋଦିଆ ସହ କିଛି ପୁରୁଣା କଏଦୀ ଏବଂ ସେଵାଦାରମାନଙ୍କୁ ରଖାଯାଇଛି। ଏଠାରେ ଗ୍ୟାଙ୍ଗଷ୍ଟର ଏବଂ ଖୁଂଖାର ଅପରାଧୀ ଥିବା ନେଇ ଆମ୍ ଆଦମୀ ପାର୍ଟିର ଅଭିଯୋଗ ଭୁଲ। ସୁକେଶ କହିଛନ୍ତି ଯେ ଜେଲ୍ ପ୍ରଶାସନ ସମ୍ପୂର୍ଣ୍ଣ ରୂପେ ଆମ୍ ଆଦମୀ ପାର୍ଟି ଖାସ କରି ସତ୍ୟେନ୍ଦ୍ର ଜୈନଙ୍କ ହାତର କାଠପୁତୁଳି।