ଆମେରିକାର ନ୍ୟୁୟର୍କର ୱେଷ୍ଟଚେଷ୍ଟର କାଉଣ୍ଟିରେ ଗୁରୁବାର ରାତିରେ ଏକ ବଡ଼ ଦୁର୍ଘଟଣା ଘଟିଛି । ଏଠାରେ ନ୍ୟୁୟର୍କ ରାଜପଥରେ ଏକ ଛୋଟ ବିମାନ ଦୁର୍ଘଟଣାଗ୍ରସ୍ତ ହୋଇଛି । ଦୁର୍ଘଟଣା ସମୟରେ ବିମାନରେ ଦୁଇ ଜଣ ଥିଲେ । ସେମାନଙ୍କ ମଧ୍ୟରୁ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି ।
ଦୁର୍ଘଟଣା ପରେ ରାସ୍ତାରେ ଲମ୍ବା ଟ୍ରାଫିକ୍ ଜାମ୍ ସୃଷ୍ଟି ହୋଇଥିଲା । ମାନହଟନଠାରୁ ପ୍ରାୟ ୪୦ କିଲୋମିଟର ଉତ୍ତର-ପୂର୍ବରେ ଥିବା ହାରିସନସ୍ଥିତ ଇଣ୍ଟରଷ୍ଟେଟ୍ ୬୮୪ରେ ଯାତାୟାତ ବାଧାପ୍ରାପ୍ତ ହୋଇଥିଲା । ଦୁର୍ଘଟଣାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ଦୁର୍ଘଟଣାର ଶିକାର ହୋଇଥିବା ବିମାନ ଦେଖିବାକୁ ମିଳୁଛି ।
ଏ ସମ୍ପର୍କରେ ରାଜ୍ୟପାଳ କ୍ୟାଥି ହୋଚୁଲ କହିଛନ୍ତି ଯେ ଦୁର୍ଘଟଣା ପରେ ଏଣେତେଣେ ବିଛୁରିତ ହୋଇ ପଡ଼ିଥିବା ବିମାନ ଇନ୍ଧନକୁ ସଫା କରିବା ପାଇଁ ପରିବେଶ ସୁରକ୍ଷା ଅଧିକାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି । ଦୁର୍ଘଟଣା ଘଟିଥିବା ରାସ୍ତାରେ ଯାତାୟାତ ବନ୍ଦ କରି ଦିଆଯାଇଛି । ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି ।
ସେ କହିଛନ୍ତି, ଏହି ଦୁଃଖଦ ଘଟଣାରେ ପୀଡ଼ିତଙ୍କ ପରିବାର ପ୍ରତି ମୋର ସମବେଦନା । ଆହତଙ୍କ ଶୀଘ୍ର ଆରୋଗ୍ୟ ପାଇଁ ମୁଁ ପ୍ରାର୍ଥନା କରୁଛି ।
କହି ରଖୁଛୁ, ଏହା ପୂର୍ବରୁ ମଧ୍ୟ ଟେକ୍ସାସରେ ଏକ ବିମାନ ରନୱେ ପରିବର୍ତ୍ତେ ରାସ୍ତାରେ ଅବତରଣ କରିଥିଲା । ରାସ୍ତା ଉପରେ ଅବତରଣ କରିବା ମାତ୍ରେ ବିମାନଟି ଦୁଇ ଖଣ୍ଡ ହୋଇଯାଇଥିଲା । ଏହି ଦୁର୍ଘଟଣାରେ ୪ ଜଣ ଆହତ ହୋଇଥିଲେ । ରାସ୍ତାରେ ଲ୍ୟାଣ୍ଡ କରିବା ବେଳେ ବିମାନଟି ଅନେକ କାରକୁ ଧକ୍କା ମଧ୍ୟ ଦେଇଥିଲା । ଏହି ଦୁର୍ଘଟଣା ବୁଧବାର ଅପରାହ୍ନରେ ଦକ୍ଷିଣ ଟେକ୍ସାସର ଭିକ୍ଟୋରିଆ ସହରର ରାଜ୍ୟ ରାଜପଥରେ ଘଟିଥିଲା ।
ବୁଧବାର ସକାଳ ୯ଟା ୫୨ ମିନିଟରେ ବିମାନଟି ଭିକ୍ଟୋରିଆ ଆଞ୍ଚଳିକ ବିମାନ ବନ୍ଦରରୁ ଉଡ଼ାଣ ଭରିଥିଲା ଏବଂ ଦୁର୍ଘଟଣା ପୂର୍ବରୁ ପାଖାପାଖି ପାଞ୍ଚ ଘଣ୍ଟା ଧରି ବିମାନଟି ଆକାଶରେ ବୁଲିଥିଲା ।
PLANE CRASH: Here’s the scene just outside Westchester County airport. One person is dead, another is in critical condition #breaking @News12CT#BREAKING pic.twitter.com/RV0PX0ECzK
— Abdul khabir jamily (@JamilKhabir396) December 13, 2024