ଉତ୍ତରପ୍ରଦେଶର ବୁଲନ୍ଦସହର ଜିଲ୍ଲାରେ ଏକ ଅଭାବନୀୟ ଘଟଣା ଘଟିଛି । ଏଠାରେ ଏକ ଦ୍ରୁତଗାମୀ ବସ ନରୋରା ଗଙ୍ଗାଘାଟ କୂଳେ ରାସ୍ତାକଡରେ ଶୋଇଥିବା ସମୟରେ ତୀର୍ଥ ଯାତ୍ରୀଙ୍କୁ ନିଜ ଚକା ତଳେ ଦଳି ଚାଲିଯାଇଛି । ଏହି ଘଟଣାରେ ସାତ ଜଣ ଲୋକଙ୍କର ମୃତ୍ୟୁ ହୋଇଯାଇଛି । ମୃତକଙ୍କ ମଧ୍ୟରେ ରହିଛନ୍ତି ତିନିଜଣ ମହିଳା ଏବଂ ଚାରି ଜଣ ଛୋଟପିଲା । ପୋଲିସ ଶବଗୁଡିକ ଜବତ କରି ପୋଷ୍ଟମର୍ଟମ ପାଇଁ ପଠାଇ ଦେଇଛି ।
କୁହାଯାଇଛି ଯେ ବସଟି ନିୟନ୍ତ୍ରଣ ହରାଇଥିବାରୁ ଏପରି ଏକ ଦୁର୍ଘଟଣା ଘଟିଯାଇଛି । ସୂଚନା ଅନୁଯାୟୀ ଏହି ସମସ୍ତ ଲୋକ ହାଥରସ ଜିଲ୍ଲାରୁ ତୀର୍ଥ ଯାତ୍ରା ପାଇଁ ବାହାରିଥିଲେ । ଗୁରୁବାର ସନ୍ଧ୍ୟାରେ ସେମାନେ ଗଙ୍ଗାସ୍ନାନ ସାରି ରାସ୍ତା କଡରେ ଶୋଇପଡ଼ିଥିଲେ । ମୃତ୍ୟୁ ହୋଇଥିବା ସମସ୍ତ ଲୋକ ଗୋଟିଏ ପରିବାରର ବୋଲି କୁହାଯାଉଛି । ବର୍ତ୍ତମାନ ମୃତକଙ୍କ ସମ୍ପର୍କୀୟ ଲୋକଙ୍କୁ ସୂଚନା ଦିଆଯାଇଛି ।
ଏହି ଘଟଣା ପରେ ଅଭିଯୁକ୍ତ ବସ ଡ୍ରାଇଭର ଫେରାର ଥିବା ବେଳେ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତକୁ ଖୋଜିବାକୁ ଚେଷ୍ଟା କରୁଛି ।