କେଜ୍ରିଓ୍ଵାଲଙ୍କ ଜାମିନ ଆବେଦନ ପ୍ରତ୍ୟାଖ୍ୟାନ କଲେ ସୁପ୍ରିମ୍କୋର୍ଟ, CBIକୁ ନୋଟିସ୍
ଦିଲ୍ଲୀ ମଦ ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ବର୍ତ୍ତମାନ କୌଣସି ଆଶ୍ୱସ୍ତି ମିଳିନାହିଁ । ସୁପ୍ରିମ୍କୋର୍ଟ କେଜ୍ରିୱାଲଙ୍କୁ ଅନ୍ତରୀଣ ଜାମିନ ଦେବାକୁ ମନା କରିଦେଇଛନ୍ତି । କୋର୍ଟରେ କେଜ୍ରିୱାଲଙ୍କ ସପକ୍ଷରେ ସିସୋଦିଆଙ୍କ ଯୁକ୍ତି ଉପସ୍ଥାପନ କରାଯାଇଥିଲା, ଯାହା କାମ କରି ନ ଥିଲା ।
କେଜ୍ରିୱାଲଙ୍କ ଜାମିନ ଆବେଦନ ଉପରେ ସୁପ୍ରିମକୋର୍ଟରେ ଶୁଣାଣି ହୋଇଛି । ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ଉଜ୍ଜ୍ୱଳ ଭୂୟାଁଙ୍କ ବେଞ୍ଚ ଏହି ମାମଲାରେ ଅନ୍ତରୀଣ ଜାମିନ ପ୍ରଦାନ କରିବାକୁ ମନା କରିଦେଇଛନ୍ତି । ଏହାସହ ସିବିଆଇକୁ ମଧ୍ୟ ନୋଟିସ୍ ଜାରି କରିଛନ୍ତି ।
କେଜ୍ରିୱାଲ ଜାମିନ ସହ ତାଙ୍କ ଗିରଫଦାରୀକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଆବେଦନ ଦାଖଲ କରିଛନ୍ତି । ଆସନ୍ତା ୨୩ରେ ଆବେଦନ ଉପରେ ଶୁଣାଣି ହେବ । ସିବିଆଇକୁ ଅଗଷ୍ଟ ୨୩ ସୁଦ୍ଧା ଜବାବ ଦେବାକୁ ପଡ଼ିବ । ସ୍ୱାସ୍ଥ୍ୟଗତ କାରଣ ଦର୍ଶାଇ କେଜ୍ରିଓ୍ଵାଲଙ୍କ ଓକିଲ ଅନ୍ତରୀଣ ଜାମିନ ମାଗିଥିଲେ, ଯେଉଁଥିରେ ସୁପ୍ରିମକୋର୍ଟ ଜାମିନ ଦାବିକୁ ପ୍ରତ୍ୟାଖ୍ୟାନ କରିଥିଲେ ।
ଓକିଲ କହିଛନ୍ତି ଯେ କେଜ୍ରିୱାଲଙ୍କ ସ୍ୱାସ୍ଥ୍ୟ ସମସ୍ୟା ହେତୁ ମୁଁ ଅନ୍ତରୀଣ ଜାମିନ ଆବେଦନ କରିଛି । ନିମ୍ନ ଅଦାଲତ ଇଡି ମାମଲାରେ ନିୟମିତ ଜାମିନ ପ୍ରଦାନ କରିଛନ୍ତି, କିନ୍ତୁ ହାଇକୋର୍ଟ ଏହାକୁ ସ୍ଥଗିତ ରଖିଛନ୍ତି । ଇଡି ମାମଲାରେ ସୁପ୍ରିମକୋର୍ଟ ଅନ୍ତରୀଣ ଜାମିନ ପ୍ରଦାନ କରିଛନ୍ତି ।
