ମୁମ୍ବାଇର ଆଚାର୍ଯ୍ୟ ମରାଠା କଲେଜରେ ହିଜାବ ବ୍ୟାନ୍ ପରେ ଫଟା ଜିନ୍ସ, ଟି ସାର୍ଟ କିମ୍ବା ଅଶ୍ଳୀଳ ପୋଷାକ ପିନ୍ଧିବାକୁ ବାରଣ କରାଯାଇଛି । ଏଥିପାଇଁ କଲେଜ ତରଫରୁ ଏକ ନୋଟିଫିକେସନ ଜାରି ହୋଇଛି । ନୋଟିଫିକେସନ ମୁତାବକ, ଏବେ କଲେଜକୁ କୌଣସି ଛାତ୍ର ଫଟା ଜିନ୍ସ, ଟି ସାର୍ଟ କିମ୍ବା ଅଶ୍ଳୀଳ ଡ୍ରେସ ପିନ୍ଧି ଆସିପାରିବେ ନାହିଁ । କଲେଜ କର୍ତ୍ତୃପକ୍ଷ ପିଲାଙ୍କ ଫଟା ଜିନ୍ସ ଏବଂ ଟି ସାର୍ଟ ପିନ୍ଧିବା ଉପରେ ପ୍ରତିବନ୍ଧକ ଲଗାଇବା ପରେ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଏବେ ପୁଅମାନେ କେବଳ ଫର୍ମାଲ କପଡା ଏବଂ ଝିଅଙ୍କ ପାଇଁ ଡ୍ରେସ କୋଡ୍ ଲାଗୁ ହୋଇଛି ।
ଗତ କିଛିଦିନ ତଳେ ମୁମ୍ବାଇ ଚେମ୍ବୁର ସ୍ଥିତ ଆଚାର୍ଯ୍ୟ କଲେଜରେ ହିଜାବକୁ ନେଇ ଖୁବ୍ ବିବାଦ ଦେଖିବାକୁ ମିଳିଥିଲା । ଏଠାରେ ୯ ଯୁବତୀ ବମ୍ବେ ହାଇକୋର୍ଟରେ ଏକ ଯୁବତୀ ଯାଚିକା ଦାୟର କରିଥିଲେ । କଲେଜ କର୍ତ୍ତୃପକ୍ଷ ତରଫରୁ ଜାରି ହୋଇଥିବା ହିଜାବ ବ୍ୟାନ୍ ନୋଟିସରେ ମୌଳିକ ଅଧିକାର କ୍ଷୂର୍ଣ୍ଣ ବୋଲି କୁହାଯାଇଥିଲା । ଏହାପରେ ୨୬ ଜୁନରେ ବମ୍ବେ ହାଇକୋର୍ଟ କଲେଜ ପକ୍ଷରେ ନିଷ୍ପତ୍ତି ଶୁଣାଇଥିଲେ । ଏହାପରେ ଜୁନ୍ ୨୭ରେ କଲେଜ ତରଫରୁ ଏକ ନୋଟିଫିକେସନ ଜାରି କରାଯାଇଥିଲା ।
ଏହି ନୋଟିସରେ କୁହାଯାଇଥିଲା କି, ଏବେ କଲେଜ କ୍ୟାମ୍ପସରେ ପୁଅମାନେ ଫର୍ମାଲ ସାର୍ଟ କିମ୍ବା ହାଫ୍ ପ୍ୟାଣ୍ଟ ଏବଂ ଝିଅମାନେ ଭାରତୀୟ କିମ୍ବା ପାଶ୍ଚାତ୍ୟ ସଂସ୍କୃତିର ଡ୍ରେସ ପିନ୍ଧି ଆସିପାରିବେ । ଯେଉଁମାନେ ଏହି ନିୟମକୁ ପାଳନ ନ କରିବେ, ସେମାନଙ୍କୁ ଗେଟ୍ ବାହାରକୁ ପଠାଇ ଦିଆଯିବ । ଏହି ଡ୍ରେସ କୋଡ ନିୟମ ନ ମାନିଲେ କାର୍ଯ୍ୟାନୁଷ୍ଠାନ ହେବ । ନୋଟିସରେ କୁହାଯାଇଥିଲା କଲେଜ ଗେଟ ସକାଳ ୭.୪୦ରେ ବନ୍ଦ ହେବ ।
କଲେଜ ପ୍ରିନ୍ସିପାଲ କହିଛନ୍ତି, କଲେଜରେ ଜିନ୍ସ ପିନ୍ଧି ଆସିବାରେ କୌଣସି ବାରଣ ନାହିଁ । କିନ୍ତୁ ଚିରାଫଟା ଜିନ୍ସ କିମ୍ବା ଧର୍ମକୁ ନେଇ କୌଣସି ପ୍ରକାର ପୋଷାକ ପିନ୍ଧି ନ ଆସିବାକୁ କୁହାଯାଇଛି । ତେବେ କୋର୍ଟଙ୍କ ନିଷ୍ପତ୍ତି ପରେ ପୁଣିଥରେ ନୋଟିସ ଜାରି କରାଯାଇଛି ।