ଭଗବାନ ବିଷ୍ଣୁଙ୍କ ସ୍ନାନ ପାଇଁ ଦୀର୍ଘ ୫ ଘଣ୍ଟା ସ୍ଥଗିତ ରହିଲା ଥିରୁବନନ୍ତପୁରମ୍ ଅନ୍ତର୍ଜାତୀୟ ବିମାନ ବନ୍ଦର, ବାତିଲ ହେଲା ୧୦ ଟି ବିମାନ

ନୂଆଦିଲ୍ଲୀ : ଥିରୁବନନ୍ତପୁରମ୍ ଅନ୍ତର୍ଜାତୀୟ ବିମାନବନ୍ଦରରେ ମଙ୍ଗଳବାର ଏକ ରୋଚକ ଘଟଣା ଦେଖିବାକୁ ମିଳିଥିଲା। ବାସ୍ତବରେ ‘ପ୍ରଭୁ ବିଷ୍ଣୁଙ୍କୁ ସ୍ନାନ କରିବା’ ପାଇଁ ରନୱେ ଦେଇ ଯାଉଥିବା ‘ଆରତ୍ତୁ’ କାରଣରୁ ମଙ୍ଗଳବାର ଅପରାହ୍ନରେ ବିମାନ ସେବା ପାଞ୍ଚ ଘଣ୍ଟା ପାଇଁ ସ୍ଥଗିତ ରହିଥିଲା। ପ୍ରସିଦ୍ଧ ପଦ୍ମନାଭ ସ୍ୱାମୀ ମନ୍ଦିରର ପୁରୁଣା ପରମ୍ପରାକୁ ଦୃଷ୍ଟିରେ ରଖି ବିମାନବନ୍ଦର ପ୍ରତିବର୍ଷ ଦୁଇଥର ବିମାନ ଉଡ଼ାଣ ସୂଚୀ ପରିବର୍ତ୍ତନ ହୋଇଥାଏ। ମନ୍ଦିରର ଏହି ଶୋଭାଯାତ୍ରା ଏଠାରେ ରନୱେ ନିକଟରେ ହୋଇଥାଏ।

ମଙ୍ଗଳବାର ଦିନ ମନ୍ଦିରରେ ଅଲପସି ପର୍ବ “ଆରତ୍ତୁ ” ଶୋଭାଯାତ୍ରା ସହିତ ସମାପ୍ତ ହୋଇଥିଲା। ବିମାନ ବନ୍ଦର କର୍ତ୍ତୃପକ୍ଷ କହିଛନ୍ତି ଯେ ବିମାନ ସେବା ଅପରାହ୍ନ ୪ ଟାରୁ ୯ ଟା ପର୍ଯ୍ୟନ୍ତ ପାଞ୍ଚ ଘଣ୍ଟା ପାଇଁ ସ୍ଥଗିତ ରଖାଯାଇଛି। ଥିରୁବନନ୍ତପୁରମ୍ ଅନ୍ତର୍ଜାତୀୟ ବିମାନବନ୍ଦରରେ ଇଣ୍ଡିଗୋ, ଏୟାର ଇଣ୍ଡିଆ ଏକ୍ସପ୍ରେସ ଏବଂ ଏୟାର ଆରବ ସମେତ ପ୍ରମୁଖ ପରିବହନକାରୀଙ୍କ ଅତିକମରେ ୧୦ ଟି ବିମାନକୁ ବାତିଲ କରିଦିଆଯାଇଛି ବୋଲି ବିମାନବନ୍ଦର ସୂତ୍ରରୁ ପ୍ରକାଶ ପାଇଛି। ସେବାଗୁଡିକ ଅପରାହ୍ନ ୪ ଟାରୁ ୯ ଟା ପର୍ଯ୍ୟନ୍ତ ସ୍ଥଗିତ ଥିବାରୁ ଏହା କରାଯାଇଥିଲା।

ଏହି ପରମ୍ପରା ପାଇଁ ବିମାନ ବନ୍ଦର ବନ୍ଦ କରିବାର ଏହି କାର୍ଯ୍ୟ ଦଶନ୍ଧି ଧରି ଚାଲିଆସୁଛି ଏବଂ ଗତ ବର୍ଷ ଆଦାନୀ ଗ୍ରୁପ୍ ବିମାନବନ୍ଦରର ପରିଚାଳନା ଦାୟିତ୍ୱ ଗ୍ରହଣ କରିବା ପରେ ମଧ୍ୟ ଏହା ବନ୍ଦ ହୋଇନାହିଁ। ବିମାନବନ୍ଦର ପରିଚାଳନା ଏକ ବିବୃତ୍ତିରେ କହିଥିଲା ଯେ ଶ୍ରୀ ପଦ୍ମନାଭ ସ୍ୱାମୀ ମନ୍ଦିରର ଶତାବ୍ଦୀ ପୁରୁଣା ପରମ୍ପରାର ସୁଗମ ଆଚରଣ ପାଇଁ ଅଲପସି ଆରତ୍ତୁ ଶୋଭାଯାତ୍ରାର ଥିରୁବନନ୍ତପୁରମ୍ ଅନ୍ତର୍ଜାତୀୟ ବିମାନବନ୍ଦରର ରନୱେ ଦେଇ ଯିବା ପାଇଁ ବିମାନ ସେବା ୨୦୨୨ ନଭେମ୍ବର ୧ ତାରିଖ ଅପରାହ୍ନ ୪ ଟାରୁ ଆରମ୍ଭ ହୋଇ ରାତି ୯ ଟା ଯାଏ ସ୍ଥଗିତ ରହିବ।

ସୂଚନାନୁସାରେ, ‘ରନୱେ ନିକଟରେ ଆରତ୍ତୁ ମଣ୍ଡପ ଅଛି ଯେଉଁଠାରେ ମନ୍ଦିରର ମୂର୍ତ୍ତିଗୁଡ଼ିକୁ କିଛି ସମୟ ପାଇଁ ରୀତିନୀତି ଅନୁସାରେ ରଖାଯାଇଥାଏ। ମନ୍ଦିର ପରମ୍ପରା ଅନୁଯାୟୀ, ବିମାନବନ୍ଦର ପଛରେ ଥିବା ସମୁଦ୍ରରେ ଗାଧୋଇବା ପାଇଁ ଦେବତାମାନଙ୍କର ମୂର୍ତ୍ତି ବର୍ଷକୁ ଦୁଇଥର ନିଆଯାଏ। ୧୯୯୨ ରୁ ବିମାନବନ୍ଦର ନିର୍ମାଣ ପୂର୍ବରୁ ମଧ୍ୟ ଏହି ଶୋଭାଯାତ୍ରା ଚାଲି ଆସୁଛି।