ଉତ୍ତରପ୍ରଦେଶର ଗାଜିଆବାଦ ସହରରେ ଶନିବାର ରାତିରେ ଏକ ଦୁଃଖଦାୟକ ଘଟଣା ଘଟିଯାଇଛି । ଗାଜିଆବାଦର ବିଜୟ ନଗର ଅଂଚଳ ସ୍ଥିତ ଏକ ସୋସାଇଟିର ୨୫ତମ ଫ୍ଲାଟରୁ ପଡି ଦୁଇ ଯାଆଁଳା ଭାଇଙ୍କର ମୃତ୍ୟୁ ହୋଇଥବା ନେଇ ସୂଚନା ମିଳିଛି । ଘଟଣାସ୍ଥଳରେ ପୋଲିସ ପହଂଚି ଦୁହିଁଙ୍କ ଶବକୁ ପୋଷ୍ଟମର୍ଟମ ପାଇଁ ପଠାଇବା ସହ ଘଟଣା ନେଇ ତଦନ୍ତ ଆରମ୍ଭ କରିଦେଇଛି ପୋଲିସ । ଶନିବାର ବିଳମ୍ବିତ ରାତି ପ୍ରାୟ ଗୋଟାଏ ସମୟରେ ଏହି ଘଟଣା ଘଟିଥିବା ବିଶେଷ ସୂତ୍ରରୁ ଜଣାପଡିଛି । ସୂଚନା ଦେବା ଯୋଗ୍ୟକି, ଗାଜିଆବାଦର ବିଜୟନଗର ଥାନା ଅନ୍ତର୍ଗତ ସିଦ୍ଧାର୍ଥ ବିହାର ସ୍ଥିତ ଏକ ସୋସାଇଟିରେ ଏକ ପରିବାର ୨୫ ତମ ଫ୍ଲାଟରେ ରହି ଆସୁଛନ୍ତି । ପରିବାରର ଦୁଇ ପୁଅ (ଜାଅଁଳା ଭାଇ) ସୂର୍ଯ୍ୟ ନାରାୟଣ ଓ ସତ୍ୟ ନାରାୟଣ ଶନିବାର ଅଧା ରାତି ପରେ ବାଲ୍କୋନିରେ ଖେଳୁଥିଲେ । ଖେଳୁଥିବା ବେଳେ ହିଁ ଦୁହେଁ ତଳକୁ ପଡିଯାଇଥିଲେ । ଆଉ ଏହା ପରେ ସେମାନଙ୍କର ମୃତ୍ୟୁ ହୋଇଥିଲା | ପଚରାଉଚୁରାରୁ ଜଣାଯାଇଛିଯେ ଘଟଣା ଘଟିଥିବା ସମୟରେ ପିଲା ଦୁହିଁଙ୍କ ମା’ ଘରେ ଥିବା ବେଳେ ଅନ୍ୟ ଏକ ରୁମରେ ଭଉଣୀ ଉପସ୍ଥିତ ଥିଲା ।
ଯେବେକି କୌଣସି ଏକ କାମରେ ପିଲା ଦୁହିଁଙ୍କ ବାପା ମୁମ୍ବଈ ଯାଇଥିଲେ । ତଦନ୍ତ କରୁଥିବା ଅଧିକାରୀଙ୍କ କହିବା ଅନୁଯାୟୀ ଘଟଣା ପୂର୍ବରୁ ଦୁଇ ଭାଇ ଅଲଗା ଅଲଗା ରୁମରେ ଥିବାବେଳେ ରାତି ୧୨
ଟା ପରେ ସେମାନଙ୍କ ମା ଶୋଇବାକୁ ଚାଲିଯାଇଥିଲେ । ଏହା ପରେ କଣ ଘଟିଲା, କେମିତି ଘଟିଲା, ରେଲିଂଙ୍ଗ ପାଖକୁ ଦୁହେଁ କେମିତି ପହଁଚିଲେ ସେନେଇ କାହା ପାଖରେ କୌଣସି ସୂଚନା ନାହିଁ । ଏବାବଦରେ ଅଧିକ ସୂଚନା ପାଇବା ପାଇଁ ମା’ ଓ ଭଉଣୀଙ୍କୁ ପଚରାଉଚୁରା ଜାରି ରହିଥିବା ନେଇ ପୋଲିସ ଅଧିକାରୀ କହିଛନ୍ତି । ଦୁହିଁଙ୍କ ବୟସ ୧୪
ବର୍ଷ ହୋଇଥିବା ବେଳେ ଦୁହେଁ ନବମ ଶ୍ରେଣୀରେ ପଢୁଥିଲେ ।