ଝାଡ଼ଖଣ୍ଡ: ମାଛ ବୋଝେଇ ଗାଡ଼ି ଓଲଟିଲା, ରାସ୍ତାରୁ ଥାଇ ମାଗୁର ବୋହିନେଲେ ସ୍ଥାନୀୟ ଲୋକେ

ଝାଡ଼ଖଣ୍ଡର ଧନବାଦରେ ଏକ ମାଛ ବୋଝେଇ ଗାଡ଼ି ଦୁର୍ଘଟଣାର ଶିକାର ହୋଇଛି । ଏଠାରେ ରାସ୍ତାରେ ଯାଉଥିବା ବେଳେ ଗାଡ଼ିଟି ଭାରସାମ୍ୟ ହରାଇ ସେହିଠାରେ ଓଲଟି ପଡ଼ିଥିଲା । ଫଳରେ ଗାଡ଼ିରୁ ସବୁତକ ମାଛ ରାସ୍ତା ଉପରେ ଛିଟିକି ପଡ଼ିଥିଲା । ମିଳିଥିବା ସୂଚନା ଅନୁସାରେ, ଏହି ଗାଡ଼ି ପ୍ରତିବନ୍ଧିତ ଥାଇ ମାଗୁର ମାଛ ଲଦିକି ନେଉଥିଲା ।

ଗାଡ଼ିଟି ଦୁର୍ଘଟଣାଗ୍ରସ୍ତ ହେବା ପରେ ସ୍ଥାନୀୟ ଲୋକମାନେ ଘଟଣାସ୍ଥଳରେ ରୁଣ୍ଡ ହୋଇ ମାଛ ବୋହି ନେବାରେ ଲାଗିିଥିଲେ । ଖବର ପାଇ ପୋଲିସ ପହଞ୍ଚି ଦୁର୍ଘଟଣାର ଯାଞ୍ଚ କରିଥିଲା । ଅନ୍ୟ ପଟେ ଦୁର୍ଘଟଣା ପରର ଏକ ଭିଡିଓ ଏବେ ସାମ୍ନାକୁ ଆସିଛି, ଯେଉଁଥିରେ ଲୋକମାନେ ରୁଣ୍ଡ ହୋଇ ମାଛ ଲୁଟି ନେଉଥିବାର ଦେଖାଯାଉଛି ।

ପୋଲିସ ଅନୁସାରେ, ଧନବାଦର ହାଓ୍ଵଡ଼ା-ନୂଆଦିଲ୍ଲୀ ଜାତୀୟ ରାଜପଥରେ ପ୍ରତିବନ୍ଧିତ ଥାଇ ମାଗୁର ମାଛ ବୋଝେଇ ଏକ ଗାଡ଼ି ଦୁର୍ଘଟଣାର ଶିକାର ହୋଇଥିଲା । ତୋପଚାଞ୍ଚି ଥାନା ଅଧୀନ ବଜାର ନିକଟରେ ଏହି ପିକ୍‌ଅପ ଭ୍ୟାନ୍‌ ଓଲଟି ପଡ଼ିଥିଲା । ଫଳରେ ଗାଡ଼ି ଭିତରେ ବୋଝେଇ ହୋଇ ରହିଥିବା ମାଛଗୁଡ଼ିକ ରାସ୍ତା ଉପରେ ଛିଟିକି ପଡ଼ିଥିଲା । ଖବର ଶୁଣି ସ୍ଥାନୀୟ ଗ୍ରାମବାସୀ ପହଞ୍ଚି ମାଛ ଲୁଟିବାରେ ଲାଗିପଡ଼ିଥିଲେ । ଲୋକମାନେ ବଡ଼ ବଡ଼ ବ୍ୟାଗ୍‌ ଭର୍ତ୍ତି କରି ମାଛ ଘରକୁ ବୋହି ନେଇଥିଲେ ।

ଘଟଣା ବିଷୟରେ ତୋପଚାଞ୍ଚି ପୋଲିସକୁ ସୂଚନା ଦିଆଯାଇଥିଲା । ଏହାପରେ ପୋଲିସ ଟିମ୍‌ ତୁରନ୍ତ ଘଟଣାସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଥିଲା । ପୋଲିସ ଦୁର୍ଘଟଣାଗ୍ରସ୍ତ ପିକ୍‌ଅପ ଭ୍ୟାନ୍‌କୁ ଜବତ କରିଛି । ଅଧିକାରୀମାନେ ଘଟଣାର ତଦନ୍ତ ଚାଲିଥିବା କହିଛନ୍ତି । ଏହି ଘଟଣା ବିଷୟରେ ଗାଡ଼ି ଚାଳକ ସୁବୋଧ କୁମାର କହିଛନ୍ତି ଯେ ଟାୟାର ଫାଟିଯିବାରୁ ଗାଡ଼ିଟି ନିୟନ୍ତ୍ରଣ ହରାଇ ଘଟଣାସ୍ଥଳରେ ହିଁ ଓଲଟି ପଡ଼ିଥିଲା । ଏହି ପିକ୍‌ଅପ ଭ୍ୟାନ୍‌ ମାଛ ବୋଝେଇ କରି ପଶ୍ଚିମବଙ୍ଗରୁ ବିହାରର ଔରଙ୍ଗାବାଦ ଯାଉଥିଲା ବୋଲି ପୋଲିସ କହିଛି ।