ଗତ କିଛି ଦିନ ହେବ ଲଗାତାର ଭାବେ ଖାଦ୍ୟରୁ ମୂଷା, ଅସରପା, ବେଙ୍ଗ, ବ୍ଲେଡ୍ ଆଦି ବାହାରିବା ନେଇ ସୋସିଆଲ ମିଡିଆରେ ପୋଷ୍ଟ ସାମ୍ନାକୁ ଆସୁଛି । ଏତେ ସବୁ ଅଭିଯୋଗ ସତ୍ତ୍ୱେ ମାମଲା ଥମୁନାହିଁ । ଏବେ ପୁଣି ଏଭଳି ଏକ ପୋଷ୍ଟ ସୋସିଆଲ ମିଡିଆରେ ଦେଖିବାକୁ ମିଳିଛି । ଏହି ଘଟଣା ହାଇଦ୍ରାବାଦର ଏକ ପ୍ରସିଦ୍ଧ ରେଷ୍ଟୁରାଣ୍ଟର ବୋଲି ଜଣାପଡ଼ିଛି । ଏଠାରେ ସାଇ ତେଜା ନାମକ ବ୍ୟକ୍ତି ‘ଏକ୍ସ’ରେ ନିଜ ଖାଦ୍ୟରୁ ପୋକ ବାହାରିଥିବାର ଅଭିଯୋଗ ଆଣିଛନ୍ତି ।
ସେ ସୋସିଆଲ ମିଡିଆରେ ଏକ ଫଟୋ ପୋଷ୍ଟ କରି କହିଛନ୍ତି ଯେ କୁକଟପଲ୍ଲୀର ଏକ ପ୍ରସିଦ୍ଧ ରେଷ୍ଟୁରାଣ୍ଟରୁ ସେ ଯେଉଁ ବିରିୟାନୀ ମଗାଇଥିଲେ, ତାହାର ଚିକେନ୍ ପିସ୍ରୁ ଏକ ପୋକ ବାହାରିିଛି ।
ସାଇ ତେଜା @cfs_telanganaକୁ ଟ୍ୟାଗ୍ କରି ଅଧିକାରୀମାନଙ୍କୁ ମାମଲାର ଯାଞ୍ଚ କରିବାକୁ ଦାବି କରିଛନ୍ତି । ଏହାସହିତ ସ୍ୱିଗିକୁ ମଧ୍ୟ ଘଟଣା ବିଷୟରେ ଅବଗତ କରାଇଛନ୍ତି । ସ୍ୱିଗି ଏହି ମାମଲାରେ ଦୁଃଖ ପ୍ରକାଶ କରି କହିଛି ଯେ ପ୍ୟାକେଜିଂର କାମ ମୁଖ୍ୟତଃ ରେଷ୍ଟୁରାଣ୍ଟ ଦ୍ୱାରା କରାଯାଇଥାଏ ।
ଆରମ୍ଭରେ ସ୍ୱିଗି ସାଇ ତେଜାଙ୍କୁ ତାଙ୍କର ୩୧୮ ଟଙ୍କା ମୂଳ ବିଲ୍ରୁ ୬୪ ଟଙ୍କା ରିଫଣ୍ଡ ଦେବାକୁ କହିଥିଲା । କିନ୍ତୁ ଏଥିରେ ଅସନ୍ତୁଷ୍ଟ ହୋଇ ସାଇ ତେଜା ସୋସିଆଲ ମିଡିଆରେ ଏକ ଚେତାବନୀ ବାର୍ତ୍ତା ପୋଷ୍ଟ୍ କରିଥିଲେ, ଯେଉଁଥିରେ ସେ ଅନ୍ୟମାନଙ୍କୁ ଉକ୍ତ ରେଷ୍ଟୁରାଣ୍ଟରୁ କିଛି ବି ଅର୍ଡର ନ କରିବାକୁ ପରାମର୍ଶ ଦେଇଛନ୍ତି ।
ରେଷ୍ଟୁରାଣ୍ଟ ମାଲିକ ଜଣେ ଷ୍ଟାଣ୍ଡଅପ୍ କମେଡିଆନ୍ । ଶେଷରେ ସୋସିଆଲ ମିଡିଆରେ ଏତେ ସବୁ ହଙ୍ଗାମା ପରେ ସ୍ୱିଗିର କଷ୍ଟମର୍ କେୟାର ଟିମ୍ ସାଇ ତେଜାଙ୍କ ସହ ଯୋଗାଯୋଗ କରିଥିଲା ଏବଂ ତାଙ୍କ ଅଭିଯୋଗକୁ ନେଇ ସମ୍ପୂର୍ଣ୍ଣ ରିଫଣ୍ଡ କରିଥିଲା ।
ନିକଟରେ ବିହାରର ଏକ ଇଞ୍ଜିନିୟରିଂ କଲେଜର ଛାତ୍ରଛାତ୍ରୀଙ୍କ ଖାଦ୍ୟରୁ ମଲା ସାପ ବାହାରିଥିଲା, ଯାହାକୁ ନେଇ କଲେଜ ପରିସରରେ ପ୍ରବଳ ହଙ୍ଗାମା ହୋଇଥିଲା । କର୍ତ୍ତୃପକ୍ଷ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା ।