‘‘ପୁଟିନ ଶୀଘ୍ର ମୃତ୍ୟୁବରଣ କରିବେ’’ କହିଲେ ୟୁକ୍ରେନ ରାଷ୍ଟ୍ରପତି ଜେଲେନସ୍କି

ଖୁବଶୀଘ୍ର ମରିଯିବେ ପୁଟିନ୍… ଏମିତି କହିଲେ ୟୁକ୍ରେନ ରାଷ୍ଟ୍ରପତି ଜେଲେନସ୍କି । ୟୁକ୍ରେନ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିଷୟରେ ଏକ ବଡ଼ ଦାବି କରିଛନ୍ତି । ଯାହାକୁ ନେଇ ବେଶ ଚର୍ଚ୍ଚା ହେଉଛି । ଇମାନୁଏଲ ମାକ୍ରନଙ୍କ ସହ ସାକ୍ଷାତ ସମୟରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି ଏହି ବିବୃତ୍ତି ଦେଇଛନ୍ତି । ଏପରି ସମୟରେ ଭବିଷ୍ୟବାଣୀ କରାଯାଇଛି ଯେତେବେଳେ ୟୁକ୍ରେନ ଉପରେ ରୁଷର ଆକ୍ରମଣ ଜାରି ରହିଛି ଏବଂ ପୁଟିନଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ଅନେକ ଅନୁମାନ କରାଯାଉଛି ।
ଆମେରିକା ମଧ୍ୟସ୍ଥତାରେ ହୋଇଥିବା କଳାସାଗର ଅସ୍ତ୍ରବିରତି ପରେ ଶାନ୍ତି ପ୍ରୟାସ ଉପରେ ଆଲୋଚନା ପାଇଁ ଏକ ବୈଠକ ସମୟରେ ଜେଲେନସ୍କି ଏହି ଦାବି କରିଛନ୍ତି । ବୈଠକରେ ଉପସ୍ଥିତ ରହିଥିବା ଜେଲେନସ୍କି ଏବଂ ମାକ୍ରନ୍ ଆମେରିକାକୁ ରୁଷ ବିରୋଧରେ କଠୋର ଆଭିମୁଖ୍ୟ ବଜାୟ ରଖିବାକୁ ଅପିଲ୍ କରିଛନ୍ତି । ଜେଲେନସ୍କି ତାଙ୍କ ଦାବିକୁ ପ୍ରମାଣିତ କରିବା ପାଇଁ କୌଣସି ପ୍ରମାଣ ଉପସ୍ଥାପନ କରିନଥିଲେ ।
ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ମିନି ଷ୍ଟ୍ରୋକ୍ ରେ ପୀଡିତ ଥିଲେ ଦାବି କରାଯାଇଥିଲା । ଏହି ଦାବି ସହିତ ସୋସିଆଲ ମିଡିଆରେ କିଛି ଭିଡିଓ ମଧ୍ୟ ଦେଖାଯାଇଥିଲା ଯେଉଁଥିରେ ପୁଟିନ ଥରୁଥିବାର ଦେଖାଯାଇଥିଲା ଯାହା ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ବିଷୟରେ ଆଲୋଚନା ଆରମ୍ଭ କରିଥିଲା । ଶାନ୍ତି ଆଲୋଚନା ଚାଲିଛି ତଥାପି ରୁଷିଆ ବିମାନ ଆକ୍ରମଣ ୟୁକ୍ରେନ ଉପରେ ଧ୍ୱଂସ ସୃଷ୍ଟି କରିଚାଲିଛି । ମାକ୍ରନ୍ କହିଛନ୍ତି ଯେ ପୁଟିନ୍ ପ୍ରତ୍ୟେକ ଥର ନିଜ ସୁବିଧା ଅନୁସାରେ ଯୁଦ୍ଧବିରତିର ପରିବର୍ତ୍ତନ କରନ୍ତି ।
ସେ କହିଛନ୍ତି ରୁଷ ଶାନ୍ତି ବିଷୟରେ କଥାବାର୍ତ୍ତା କରେ କିନ୍ତୁ ୟୁକ୍ରେନ ଉପରେ ଆକ୍ରମଣ ଜାରି ରଖିଛି । ୟୁକ୍ରେନକୁ ଶାନ୍ତି ସର୍ତ୍ତାବଳୀ ନିର୍ଦ୍ଦେଶ ଦେବାର କୌଣସି ଅଧିକାର ରୁଷର ନାହିଁ । ଫ୍ରାନ୍ସ ଲଗାତାର ଭାବରେ ୟୁକ୍ରେନ ସହିତ ଛିଡା ହୋଇଥିବା ଦେଖାଯାଇଛି । ସମ୍ପ୍ରତି ଫ୍ରାନ୍ସ ୟୁକ୍ରେନକୁ ୨ବିଲିୟନ ଡଲାର (ପ୍ରାୟ ୧.୫୫ ବିଲିୟନ ପାଉଣ୍ଡ) ଅତିରିକ୍ତ ସାମରିକ ସହାୟତା ପ୍ରଦାନ କରିବାକୁ ଘୋଷଣା କରିଛି ।
Also read: ବଢ଼ିଲା ତୃତୀୟ ବିଶ୍ବଯୁଦ୍ଧ ଆଶଙ୍କା, ପୁଟିନ ପରମାଣୁ ଆକ୍ରମଣ ନିୟମ ବଦଳାଇବା ପରେ ଛନକା