ମୟୁରଭଞ୍ଜ: ଶଳା ଭିଣୋଇ ସମ୍ପର୍କ କେତେ ମଧୁର ହୋଇଥିବା ବେଳେ ଶଳା ଭିଣୋଇଙ୍କୁ ନେଇ ଆସିଛି ଚାଞ୍ଚଲ୍ୟକର ଖବର । ଶଳାର ଛୁରାମାଡ଼ରେ ଭିଣୋଇ ଗୁରୁତର । କିନ୍ତୁ କାହିଁକି ଏପରି ଭିଣୋଇ ଉପରେ ଶଳା ଏଭଳି ଆକ୍ରମଣ କରିଛି ତାହାର କାରଣ ଜାଣିଲେ ଆପଣ ମୁଣ୍ଡରେ ହାତ ଦେବେ ।
ବାରିପଦା ଭଞ୍ଜପୁର ଷ୍ଟେସନରେ ଘଟିଛି ଏହି ଛୁରାମାଡ଼ । ଶଳାର ଛୁରାମାଡରେ ଭିଣୋଇ ଗୁରୁତର ହୋଇଛନ୍ତି । ଗୁରୁତର ଭିଣୋଇ ହେଉଛନ୍ତି ଝାରପୋଖରିଆ ଥାନା ଅର୍ନ୍ତଗତ ବାଘନଗର ଗ୍ରାମର ପୁପୁନ ନାୟକ।ପୁପୁନଙ୍କୁ ଗୁରୁତର ଅବସ୍ଥାରେ ବାରିପଦା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆଉ ଆକ୍ରମଣକାରୀ ଶଳା ହେଉଛନ୍ତି ବାଙ୍ଗିରିପୋଷି ଥାନା ବଣକାଟି ଗାଁର ବାଦଲ ଦାସ ।
ଦୁହିଁଙ୍କ ମଧ୍ୟରେ ରହିଥିଲା ପୂର୍ବ ଶତ୍ରୁତା । ବର୍ଷେ ତଳେ ଆକ୍ରମଣକାରୀ ବାଦଲଙ୍କ ଭଉଣୀ ପୁପୁନୁଙ୍କୁ ବିବାହ କରିଥିଲେ । କିନ୍ତୁ ଏହି କଥାରେ ବାଦଲ ପୁପୁନଙ୍କ ଉପରେ ରାଗିକି ରହିଥିଲେ । କିନ୍ତୁ ପୁପୁନଙ୍କ ସଂସାର ବେଶ୍ ହସଖୁସିରେ ଚାଲିଥିଲା। ତାଙ୍କର ଏକ ସନ୍ତାନ ମଧ୍ୟ ରହିଛି । ହେଲେ ତାଙ୍କ ହସଖୁସି ସଂସାରରେ ସତେ ଯେମିତି ଲାଗିଗଲା କାହାର କଳା ନଜର । ଆଜି ଭିଣୋଇ ପୁପୁନ ଭଞ୍ଜପୁର ଷ୍ଟେସନକୁ ଆସିଥିବା ବେଳେ ବାଦଲ ତାଙ୍କ ଉପରେ ଅତର୍କିତ ଛୁରାମାଡ଼ କରିଥିଲା । ଏବେ ଗୁରୁତର ଅବସ୍ଥାରେ ପୁପୁନୁ ଚିକିତ୍ସିତ ହେଉଛନ୍ତି ।
ଛୁରାମାଡ଼ କରିବା ପରେ ଅଭିଯୁକ୍ତ ବାଦଲ ଘଟଣା ସ୍ଥଳରୁ ଫେରାର ହୋଇଯାଇଛି । ଏନେଇ ରେଳବାଇ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ତେବେ ପୂର୍ବ ଶତୃତାକୁ କେନ୍ଦ୍ର କରି ଏହି ଛୁରା ମାଡ ହୋଇଥିବା କହିଛନ୍ତି ଆହତଙ୍କ ସମ୍ପର୍କୀୟ ।
ସତରେ କୋଉ ଭାଇ ଏପରି କରିପାରେ ନିଜ ହାତରେ ନିଜ ଭଉଣୀର ସଂସାର କେମିତି ବା ଉଜାଡ଼ିବାକୁ ହାତ ଗଲା । ଘଟଣା ଯାହା ହେଉ ପଛେ ରାଗ ଯେତେ ଥାଉନା କାହିଁକି, ଭଉଣୀ ମଥାର ସିନ୍ଦୂରର ସୁରକ୍ଷା କରିବା ବଦଳରେ ଏପରି ସିନ୍ଦୂର ଲିଭାଇବାକୁ କୋଉ ଭାଇ ଏପରି ଉଦ୍ୟମ କରିପାରେ । ଏ କୁନି ପିଲାଟିକୁ ବାପ ଛେଉଣ୍ଡ କରି କଣ ବା ମିଳିବ ମାମୁଁକୁ ? ବାସ୍ତବରେ ଏହା ଏକ ନିନ୍ଦନୀୟ ଘଟଣା ।