ପୂରିଛି ଏକ ମାସ, ମନରୁ ଲିଭିନି ଭୟଙ୍କର ବିସ୍ପୋରଣ ଦୃଶ୍ୟ

କେନ୍ୟୁଜ(ବ୍ୟୁରୋ): ପୂରିଛି ଏକ ମାସ । ହେଲେ ଏବେବି ଲୋକଙ୍କ ମନରୁ ଲିଭିନି ରାଜଭବନ ଛକ ନିକଟ ପେଟ୍ରୋଲ ପମ୍ପ ଭୟଙ୍କର ବିସ୍ପୋରଣ ଦୃଶ୍ୟ । ସମସ୍ତ ଆହତଙ୍କୁ ମିଳିପାରି ନାହିଁ କ୍ଷତିପୂରଣ । ବିସ୍ଫୋରଣ ପରଠୁ ପେଟ୍ରୋଲ ପମ୍ପ ସଂପୂର୍ଣ୍ଣ ବନ୍ଦ । ଚାରିପଟେ ସିଲ୍‌ । ପେଟ୍ରୋଲ ପମ୍ପକୁ ସିକ୍ୟୁରିଟି ଗାର୍ଡ ଜଗିଛନ୍ତି । ବିସ୍ଫୋରଣରେ ନିକଟବର୍ତ୍ତୀ କିଛି ଦୋକାନ କ୍ଷତିଗ୍ରସ୍ତ ହୋଇଥିଲା । ଏବେବି ସେହି ଦୋକାନ ଖୋଲି ପାରିନାହିଁ । ଭୁବନେଶ୍ୱର ରାଜଭବନ ଛକ ନିକଟ ପେଟ୍ରୋଲ ପମ୍ପ ବିସ୍ଫୋରଣ ଘଟଣାକୁ ପୂରିଛି ଏକ ମାସ । ହେଲେ ଏବେବି ଲୋକଙ୍କ ମନରୁ ଲିଭିନି ସେଦିନର ଭୟଙ୍କର ବିସ୍ଫୋରଣ ଦୃଶ୍ୟ । ଏହି ବିସ୍ଫୋରଣରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ କିଛି ଲୋକ ଆହତ ହୋଇଥିଲେ । ଏହି ଘଟଣା ପରେ ଭୁବନେଶ୍ୱରରେ ଥିବା ପେଟ୍ରୋଲ ପମ୍ପର ସୁରକ୍ଷା ଓ ସତର୍କତାକୁ ଗୁରୁତ୍ୱ ଦିଆଯାଇଛି ।

ରାଜଧାନୀରେ ଏତେ ବଡ଼ ବିସ୍ଫୋରଣ ପରେ ସବୁ ପେଟ୍ରାଲ ପମ୍ପରେ ଅଗ୍ନି ନିରାପତ୍ତା ବ୍ୟବସ୍ଥା କଡ଼ାକଡ଼ି । ଗାଡ଼ିିରେ ତେଲ ପକାଇବା ବେଳେ ମୋବାଇଲ ଫୋନ ବ୍ୟବହାର କରିବା ମନା । ଗାଡ଼ି ଷ୍ଟାର୍ଟରେ ଥିଲେ ତେଲ ପକାଯାଉ ନାହିଁ । ଟାଙ୍କିରେ ତେଲ ଓ ସିଏନଜି ଭରାଯିବା ବେଳେ ବେଶ ସତର୍କତା ଅବଲମ୍ବନ କରାଯାଉଛି । ଗତ ଅକ୍ଟୋବର ୭ ତାରିଖରେ ରାଜଭବନ ସମ୍ମୁଖ ପେଟ୍ରୋଲ ପମ୍ପରେ ବିସ୍ଫୋରଣ ଘଟିଥିଲା । ଏଥିରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି । ଏହି ଘଟଣାରେ ୪ଟି ସଂସ୍ଥା ତଦନ୍ତ କରୁଥିଲେ ମଧ୍ୟ କୌଣସି ନିର୍ଯ୍ୟାସ ବାହାରିପାରିନାହିଁ ।