ସଣ୍ଡେ ହୋୟା ମଣ୍ଡେ, ରୋଜ ଫୈକୋ ଅଣ୍ଡେ ! ଓଡ଼ିଶାରେ ପୁଣି ମାତିଛି ଅଣ୍ଡା ମାଡ଼ ଟ୍ରେଣ୍ଡ

ବେଳେ ବେଳେ ଏମିତି ହୁଏ । କଣ ଗୋଟେ ଆରମ୍ଭ ହୋଇଗଲେ ତାହା କିଛି ଦିନ ପାଇଁ ଧାରା ବନି ଯାଏ । ଯେମିତି ଏବେ ବିଭିନ୍ନ ରାଜନୈତିକ ଦଳ ଆରମ୍ଭ କରି ଦେଇଛନ୍ତି । ପରସ୍ପର ନେତାଙ୍କ ଉପରେ ଅଣ୍ଡା ମାଡ଼ କରୁଛନ୍ତି । ବିଜେପି ବିଜେଡିକୁ, ବିଜେଡି ବିଜେପିକୁ ଆଉ କଂଗ୍ରେସ ମଧ୍ୟ ଉଭୟଙ୍କୁ । ଅବଶ୍ୟ ଏଇ ଅଣ୍ଡାମାଡ଼ ଟ୍ରେଣ୍ଡଟି ବହୁ ପୁରୁଣା । ତେବେ ଏବେ ପୁଣି ଆରମ୍ଭ ହେବା ଯୋଗୁଁ ଚର୍ଚ୍ଚାକୁ ଆସିଛି ।

ବିଗତ ବର୍ଷରେ ଏହି ଅଣ୍ଡାମାଡ଼କୁ ନେଇ ଅନେକ ଝଡ଼ ଉଠିଛି । ତଥାପି ଏହା ସମ୍ପୂର୍ଣ୍ଣ ବନ୍ଦ ହୋଇ ନାହିଁ । କାରଣ ବୋଧହୁଏ ଏହାକୁ ଦୂରରୁ ଥାଇ ଫିଙ୍ଗିବା ଭାରି ସୁବିଧା ଏବଂ ଫିଙ୍ଗା ଯାଉଥିବା ଲୋକକୁ ଅସୁବିଧା । ତେବେ ଏହା ପକାୁଥିବା ଲୋକ ଓ ପଡୁଥିବା ଲୋକ ପାଇଁ କେତେ ଲାଭ ଓ କ୍ଷତିକର ସେକଥା ଆମକୁ ଜଣାନାହିଁ । ତଥାପି ଆମେ କହିବୁ କି ଏହା ଏକ ଅସମ୍ମାନଜନକ ପରମ୍ପରା । ଏକଦା ଟମାଟୋ ଫିଙ୍ଗା ଟ୍ରେଣ୍ଡ ମଧ୍ୟ ଚାଲିଥିଲା । ଯାହା ଏବେ କାଁଭାଁ ଘଟୁଛି । ସେହିଭଳି ଅଣ୍ଡା ଫିଙ୍ଗା ପରମ୍ପରା ମଧ୍ୟ ଧୀରେ ଧୀରେ ମରିବାକୁ ବସିଥିବା ବେଳେ ଓଡ଼ିଶାରେ ଟିକେ କାୟା ମେଲାଇଛି । ଏ କାମ ତ ବଡ଼ ନେତାମାନେ କେବେବି କରନ୍ତି ନାହିଁ। କିଛି କର୍ମୀ କିମ୍ବା ସେମାନଙ୍କ ଲିଡର ବନିଥିବା ବ୍ୟକ୍ତିବିଶେଷ ପ୍ରାୟତଃ ଯୁବନେତା ହିଁ ଏଭଳି ସାସ ଦେଖାନ୍ତି । ସେମାନେ ଭୁଲି ଯାଆନ୍ତି ଯେ ଯେକୌଣସି ନେତା ପ୍ରତି ଏଭଳି ଅଣ୍ଡା ଫିଙ୍ଗା ଅତ୍ୟନ୍ତ ମର୍ଯ୍ୟାଦାହୀନ କାମ ।

ପ୍ରତିବାଦ କରିବାର ଅନ୍ୟ ଅନେକ ବାଟ ରହିଛି । ହେଲେ ଅଣ୍ଡା ଟମାଟୋ ଫିଙ୍ଗି କିଭଳି ଦାବି ଉପସ୍ଥାପନ କରନ୍ତି ଲୋକେ ଏହା ବୁଝିବା କଷ୍ଟକର । କେବଳ ବାହାଦୂରୀ ନିଅନ୍ତି ଯେ ମୁଁ ତାଙ୍କୁ ଅଣ୍ଡାମାଡ଼ କରି ଦେଲି ।
ଯଦି ଆମେ ଇତିହାସକୁ ଦେଖିବା ତେବେ ଜଣେ ନିନ୍ଦିତ ବ୍ୟକ୍ତିକୁ ଅସମ୍ମାନିତ କରିବା ପାଇଁ ପଚା ଟମାଟୋ ଏବଂ ଅଣ୍ଡା ଫିଙ୍ଗିବାର ରାସ୍ତା ଖୋଜା ଯାଇଥିଲା । କାରଣ ଏସବୁ ଶସ୍ତାରେ ମିଳେ ଓ ସହଜରେ ଫିଙ୍ଗି ହୁଏ । ତେବେ ଏହାର କିଛି ପ୍ରତୀକାତ୍ମକ ମୂଲ୍ୟ ରହିଛି ବୋଲି ମନେ ହୁଏ ନାହିଁ ।

ତଥାପି ଏହା ଏକ ଅତି ଅସମ୍ମାନଜନକ ପରମ୍ପରାରେ ପରିଣତ ହୋଇଥିବାରୁ ଲୋକେ ସଚେତନ ରହିବା ଦରକାର । କାରଣ ପ୍ରଥମତଃ ଆପଣ ଖାଦ୍ୟକୁ ଅସମ୍ମାନ କରୁଛନ୍ତି ଆଉ ଦ୍ୱିତୀୟରେ ଏବେ ଉଭୟ ଅଣ୍ଡା ଓ ଟମାଟୋ ଦର ଯାହା ହେଲାଣି ତାକୁ ନଷ୍ଟ କରିବାର ଅଧିକାର ଆମର ନାହିଁ କହିଲେ ଭୁଲ ହେବ ନାହିଁ । କାରଣ ମୁଖ୍ୟମନ୍ତ୍ରୀ, କେନ୍ଦ୍ର ମନ୍ତ୍ରୀ ଆଦି ଦେଶ ଓ ରାଜ୍ୟ ଚଳାଉଥିବା ବ୍ୟକ୍ତିମାନଙ୍କୁ ଅଣ୍ଡାମାଡ଼ କରିବା ଘଟଣାକୁ ପ୍ରତିବାଦ କୁହାଯିବ ନାହିଁ । କାରଣ ଏହା ରାଜ୍ୟର ମର୍ଯ୍ୟାଦାକୁ ପ୍ରତିହତ କରୁଛି ।

‘ସଣ୍ଡେ ହୋ ୟା ମଣ୍ଡେ ରୋଜ ଖାଓ ଅଣ୍ଡେ’ ବଦଳରେ ଆମେ ଏବେ କହିବା ଆରମ୍ଭ କଲୁଣି ‘ରୋଜ ଫୈକୋ ଅଣ୍ଡେ’ । ଟିକେ ସୁଧୁରି ଯାଆନ୍ତୁ ଭାଇମାନେ । କିଛି ନୂଆ ଟ୍ରେଣ୍ଡରେ ପ୍ରତିବାଦ କରନ୍ତୁ, ଯାହା ଲୋକଙ୍କୁ ପ୍ରଭାବିତ କରିବ । ୟାକୁ ଦେଖି ତାକୁ ଦେଖି ସେଇ ପୁରୁଣା ପରମ୍ପରା ଧରି କେତେଦିନ ଚାଲିବେ ????

ହିମାଂଶୁ ପତି ମିଶ୍ର