ଟ୍ରକରେ ବୁହାହେଲା ବିରାଟକାୟ ଲଡ଼ୁ, ନିଲାମ ହେଲା ୧୯ ଲକ୍ଷ ୩୮ ହଜାର ଟଙ୍କାରେ
ତାଳଚେର: ନିଲାମ ହେଲା ବିରାଟକାୟ ଲଡ଼ୁ । ଲଡ଼ୁକୁ ଦେଖି ଉଡିଯିବ ହୋସ୍ । ଏତେ ବଡ ଲଡ଼ୁ ଯେ, ଯାହାକୁ ବୁହା ହେଲା ଟ୍ରକରେ । ହଁ ଆଜ୍ଞା ଟ୍ରକରେ ଏହି ବିଶାଳକାୟ ଲଡ଼ୁକୁ ନିଲାମ ସ୍ଥଳକୁ ଅଣାଯାଇଥିଲା । ଏ ହେଉଛି ତାଳଚେର ଗଣେଶ ପୂଜାର ଲଡ଼ୁ । ଯାହା ଶେଷରେ ନିଲାମ ହୋଇଛି ।
୩୫ କ୍ୱିଣ୍ଟାଲ ଓଜନ ବିଶିଷ୍ଟ ଏହି ବିଶାଳକାୟ ଲଡ଼ୁକୁ ୧୯ ଲକ୍ଷ ୩୮ ହଜାର ଟଙ୍କାରେ ନିଲାମ କରାଯାଇଛି । ଯାହାକୁ ନେଇଛନ୍ତି ତାଳଚେର ଟିଏସଏସ୍ ଗ୍ରୁପ । ଗତକାଲି ତାଳଚେର ଗଣପର୍ବ ଗଣେଶ ପୂଜାର ଶେଷ ଦିନରେ ଏହି ଲଡୁ ନିଲାମ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏକ ଟ୍ରକରେ ଏହି ବିଶାଳକାୟ ଲଡ଼ୁକୁ ନିଲାମ ସ୍ଥଳକୁ ଅଣାଯାଇଥିଲା । ପରେ ପରେ ପ୍ରଶାସନ, ତାଳଚେର ବିଧାୟକ ଓ କେନ୍ଦ୍ରୀୟ ପୂଜା କମିଟି କର୍ମକର୍ତ୍ତାଙ୍କ ଗହଣରେ ନିଲାମ ଡକାଯାଇଥିଲା ।
ତେବେ ଶେଷରେ ତାଳଚେରର ଟିଏସଏସ ଗ୍ରୁପ ନିଲାମ ପ୍ରକ୍ରିୟାର ବିଜେତା ହୋଇଥିଲା । ୩ ଲକ୍ଷ ୫୦ ହଜାର ଟଙ୍କାରୁ ନିଲାମ ଡାକ ଆରମ୍ଭ ହୋଇଥିଲା ୧୯ ଲକ୍ଷ ୩୮ ହଜାର ଟଙ୍କାରେ ଟିଏସଏସ ଗ୍ରୁପ ଏହି ନିଲାମ ଧରିଛି । ନିଲାମ ଡାକରାରେ ମୋଟ ୧୬ଟି ଦଳ ଭାଗ ନେଇଥିଲେ । ତେବେ ଆଜି ଅନୁଷ୍ଠିତ ହେବ ଭସାଣି ଉତ୍ସବ ।
ସୂଚନା ଥାଉକି, ଗତବର୍ଷ ତାଳଚେର ଗଣେଶ ପୂଜାର ୩୧ କ୍ୱିଣ୍ଟାଲ ଓଜନର ଲଡୁ ନିଲାମ ହୋଇଥିଲା । ଯାହା ୨୨ ଲକ୍ଷ ୨୨ ହଜାର ୨୨୨ ଟଙ୍କାରେ ନିଲାମ ହୋଇଥିଲା । ଯାହା ସବୁ ରେକର୍ଡ ଭାଙ୍ଗିଥିଲା । ୮ ଲକ୍ଷ ୭୦ ହଜାର ଟଙ୍କାରୁ ନିଲାମ ଡାକ ଆରମ୍ଭ ହୋଇ ୨୨ ଲକ୍ଷ ୨୨ ହଜାର ୨୨୨ ଟଙ୍କାରେ ସରିଥିଲା ।
