ଆମେରିକା ସ୍ଥିତ ମାଶାଚୁସେଟ ରାଜ୍ୟରେ ରହୁଥିବା ଏକ ଭାରତୀୟ ପରିବାର ଏକ ମହତ କାର୍ଯ୍ୟକରି ନିଜ ସଚ୍ଚୋଟ ପଣିଆର ପରିଚୟ ଦେଇଛନ୍ତି । ପ୍ରକୃତରେ ଘଟଣାଟି ଘଟିଛି ଏହିପରି । ଆମେରିକା ବାସିନ୍ଦା ଲି ରୋଜ ନାମକ ଜଣେ ମହିଳା ଲକ୍ଷାଧିକ ଟଙ୍କାର ଏକ ଲଟେରୀ ଜିତିଥିଲେ | ଷ୍ଟପ ନାମକ ଏକ ଦୋକାନରୁ ସେ ଏହି ଟିକେଟ ଟିକୁ କିଣିଥିଲେ । ଆଉ ଏହି ଦୋକାନଟି ହେଉଛି ସେହି ଭାରତୀୟ ପରିବାରଙ୍କର ଯେଉଁମାନେ କି ପରବର୍ତ୍ତୀ ସମୟରେ ନିଜେ ପାଇ ମଧ୍ୟ ଟିକଟଟିକୁ ଫେରାଇ ଦେଇଥିଲେ । ଘଟଣା ଘଟିବା ପରେ ଲି ରୋଜ କହିଛନ୍ତିକି, ଦିନେଲଞ୍ଚ ବ୍ରେକ ଥିଲା ଆଉ ସେ ସେହି ସମୟରେ ଖୁବ ବ୍ୟସ୍ତ ଥିଲେ ।
ତରବରିଆ ଭାବରେ ଟିକଟଟିକୁ କ୍ରସ କରି ଭାବିଥିଲେ କି ତାଙ୍କର ଲଟେରୀ ଉଠିନାହିଁ । ଏହି ଟିକଟଟି ବେକାର ଗଲା । ତେଣୁ ସେ ଆଉ ଜଣଙ୍କ ହାତରେ ଟିକଟଟିକୁ ଦେଇ ଡଷ୍ଟବିନରେ ପକେଇ ଦେବାକୁ କହିଥିଲେ । ଅନ୍ୟପକ୍ଷରେ ନ୍ୟୁ ୟର୍କ ଟାଇମ୍ସ ଖବର କାଗଜରେ ପ୍ରକାଶିତ ହୋଇଥିବା ରିପୋର୍ଟ ଅନୁଯାୟୀ ମହିଳା ଜଣଙ୍କ ହୁଏତ ଭଲରେ ଟିକଟ ଟିକୁ କ୍ରସ କରିନଥିଲେ । ଆଉ ଏହି କାରଣରୁ ଏହାକୁ ପାଖାପାଖି ଦଶ ଦିନ ପାଇଁ ବେକାର ଜିନିଷ ପତ୍ର ରଖାଯାଉଥିବା ଏକ ସ୍ଥାନରେ ରଖିଦେଇଥିଲେ । କିନ୍ତୁ ଦିନେ ଅଳିଆ ଗଦା ଖୋଜୁ ଖୋଜୁ ଏଭିତରେ ଦୋକାନି ଜଣଙ୍କ ପୁଅ ଅଭିର ନଜର ସେହି ଟିକଟ ଉପରେ ପଡିଥିଲା । ଟିକଟଟି ଭଲରେ ଛଡା ଯାଇନଥିବାରୁ ସେ ତାହାକୁ ପୁଣି ଥରେ ଛଡାଇ ଥିଲେ ।
ଏହାକୁ ଦେଖି ପ୍ରଥମେ ସେ ଭାବିଥିଲେକି ଯାହାହେଉ ସେ ରାତାରାତି ଲକ୍ଷପତି ହୋଇଗଲେ । ଏମିତିକି ଏହି ଟଙ୍କାରେ ସେ ଏକ କାର କିଣିବେ ବୋଲି ଭାବିଥିଲେ । କିନ୍ତୁ ପରେ ତାଙ୍କ ମନ ବଦଳିଥିଲା । ଆଉ ସେ ଟିକଟଟିକୁ ତାହାର ମାଲିକଙ୍କୁ ଫେରେଇ ଦେବେ ବୋଲି ନିର୍ଣ୍ଣୟ ନେଇଥିଲେ । ଜଣାଯାଇଛିକି ସାହ ପରିବାରଙ୍କ ପାଇଁ ଏମିତି ନିର୍ଣ୍ଣୟ ନେବା ଏତେଟା ସହଜ ନଥିଲା । କିନ୍ତୁ ପରେ ଭାରତରେ ରହୁଥିବା ଅଭିଙ୍କ ଜେଜେ ମା’ ଙ୍କ ପରାମର୍ଶ କ୍ରମେ ଟିକେଟ ଟିକୁ ଏହାର ପ୍ରକୃତ ମାଲିକଙ୍କୁ ଫେରେଇ ଦେଇଥିଲେ । ଏହି ଘଟଣା ଲୋକଲୋଚନକୁ ଆସିବା ପରେ ଏହି ପରିବାରକୁ ପ୍ରଶଂସାର ସୁଅ ଛୁଟିବାରେ ଲାଗିଛି । ଟିକଟରେ ଉଠିଥିବା ରାଶିର ମୂଲ୍ୟ ପାଖାପାଖି ୧୦ ଲକ୍ଷ ଟଙ୍କା ହେବ ।