ମାତୃ ନବମୀ : ଜାଣନ୍ତୁ କେମିତି ଆଉ କିପରି ଦେବେ ମହିଳାଙ୍କୁ ଶ୍ରାଦ୍ଧ

ହିନ୍ଦୁ ଧର୍ମରେ ଆଶ୍ବିନ ମାସ କୃଷ୍ଣ ପକ୍ଷର ବିଶେଷ ମହତ୍ତ୍ବ ରହିଥାଏ। ଯଦିଓ ଏହିଦିନ କୌଣସି ମାଙ୍ଗଳିକ କାମ କରାଯାଏ ନାହିଁ କିନ୍ତୁ ଧାର୍ମିକ କାର୍ଯ୍ଯ ଯେପରି ପିଣ୍ଡଦାନ ଏବଂ ଶ୍ରାଦ୍ଧ କାର୍ଯ୍ଯ କରାଯାଏ। ଏହି କୃଷ୍ଣ ପକ୍ଷ ପୂର୍ବଜ ଏବଂ ପିତୃ ପକ୍ଷ ପାଇଁ ସମର୍ପିତ। ତେଣୁ ଏହାକୁ ପିତୃ ପକ୍ଷ କୁହାଯାଏ। ପିତୃ ପକ୍ଷର ପ୍ରତ୍ଯେକ ତିଥିରେ ତିଥି ବିଶେଷ ଭାବେ ଶ୍ରାଦ୍ଧ ତର୍ପଣ କରାଯାଏ। ଏହି ଆଧାରରେ ପିତୃ ପକ୍ଷର ନବୀ ତିଥିରେ ମାତା, ବିବାହିତା ମହିଳା ଏବଂ ଅଜ୍ଞାତ ମହିଳାଙ୍କୁ ଶ୍ରାଦ୍ଧ ଦିଆଯାଏ। ଏହାକୁ ମାତୃ ନବମୀ କୁହାଯାଏ। ତେବେ ଆସନ୍ତୁ ଜାଣିବା ମାତୃ ନବମୀର ସଠିକ୍ ତିଥି ଏବଂ ଶ୍ରାଦ୍ଧ ବିଧି :

ହିନ୍ଦୁ ଧର୍ମରେ ପିତୃ ପକ୍ଷ ନବମୀ ତିଥିରେ ମା ଏବଂ ବିବାହିତା ମହିଳାଙ୍କର ଶ୍ରାଦ୍ଧ ଏବଂ ତର୍ପଣ କରାଯାଏ। ଆଶ୍ବିନ ମାସ କୃଷ୍ଣ ପକ୍ଷ ନବମୀ ତିଥିରେ ମାତୃ ନବମୀ ପୂଜା କରାଯାଏ। ନବମୀ ତିଥି ଗତକାଲି ରାତି ୮.୨୯ ରୁ ଆରମ୍ଭ ହୋଇ ଆଜି ରାତି ୧୦ଟା ୮ ମିନିଟରେ ସମାପ୍ତ ହେବ।

ପିତୃ ପକ୍ଷର ମାତୃ ନବମୀ ଦିନ ସକାଳେ ନିଜର ନିତ୍ଯକର୍ମ ସାରିବା ପରେ ଘରର ଦକ୍ଷିଣ ଦିଗରେ ଏକ ପିଢା ରଖି ସେଥିରେ ସଫା କପଡା ପକାଇ ଦିଅନ୍ତୁ। ଏହା ଉପରେ ମୃତକଙ୍କ ଫଟୋ ରଖି ସେଥିରେ ମାଳ ଓ ଫୁଲ ଅର୍ପଣ କରନ୍ତୁ। ଏହା ପରେ ଗଙ୍ଗା ଜଳ ଏବଂ ତୁଳସୀ ପତ୍ର ଚଢାନ୍ତୁ। ପୁରାଣ, ଗଜେନ୍ଦ୍ର ମୋକ୍ଷ କିମ୍ବା ଗୀତା ପାଠ କରନ୍ତୁ। ସାତ୍ତ୍ବିକ ଭୋଜନ ରାନ୍ଧି ଦକ୍ଷିଣ ଦିଗରେ ମା’ଙ୍କ ନାମରେ ରଖି ପାଣି ଛଡାଇ ଦିଅନ୍ତୁ। ପରେ ଗାଈ, କାଉ, ପକ୍ଷୀ ତଥା ବ୍ରାହ୍ମଣଙ୍କୁ ନିଶ୍ଚିତ ଖାଇବାକୁ ଦିଅନ୍ତୁ। ବ୍ରାହ୍ମଣ ଭୋଜନ କରିବା ପରେ ଯଥାଶକ୍ତି କିଛି ଦାନ କରନ୍ତୁ।