ଏଭିଏଶନ୍ ଇଣ୍ଡଷ୍ଟ୍ରୀରେ କ୍ୟାରିୟର ଗଢ଼ିବାକୁ ଚାହୁଁଛନ୍ତି କି ?ଏହି କୋର୍ସ ଆପଣଙ୍କ ପାଇଁ ହୋଇପାରେ ବେଷ୍ଟ
ଯଦି ଆପଣ ଭଲ ପଇସା ରୋଜଗାର କରିବା ସହିତ ସାରା ବିଶ୍ୱ ବୁଲିବାର ସ୍ୱପ୍ନ ଦେଖୁଛନ୍ତି ଏବଂ ଉଚ୍ଚତାକୁ ଭୟ କରୁନାହାନ୍ତି ତେବେ, ଏଭିଏଶନ୍ (ବିମାନ) ଇଣ୍ଡଷ୍ଟ୍ରୀରେ କ୍ୟାରିୟର ଗଢ଼ିବା ଆପଣଙ୍କ ପାଇଁ ଏକ ଭଲ ବିକଳ୍ପ ହୋଇପାରେ । ଏହି ଇଣ୍ଡଷ୍ଟ୍ରୀ କେବଳ ଯାତ୍ରା କିମ୍ବା ଯାତ୍ରୀଙ୍କ ସେବାରେ ସୀମିତ ନୁହେଁ ବରଂ ଏହା ଲୋକଙ୍କୁ ସେମାନଙ୍କ ସମ୍ପର୍କୀୟଙ୍କ ସହିତ ଜୋଡ଼ିଥାଏ । ଏଥିସହ ଲୋକଙ୍କୁ ଗୋଟିଏ ସ୍ଥାନରୁ ଅନ୍ୟ ସ୍ଥାନରେ ପହଞ୍ଚାଇ ବିଭିନ୍ନ ଦେଶକୁ ଏକଜୁଟ୍ କରିବାର କାର୍ଯ୍ୟ ମଧ୍ୟ କରେ । ଏହା ବ୍ୟତୀତ, ଦେଶର ବିକାଶରେ ମଧ୍ୟ ଏକ ଗୁରୁତ୍ତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ ।
ଅନେକ ଲୋକ ପାଇଲଟ୍ ହେବାର ସ୍ୱପ୍ନ ଦେଖିଥାନ୍ତି । ଯଦି ଆପଣ ବି ପାଇଲଟ୍ ହେବାକୁ ଚାହୁଁଛନ୍ତି, ତେବେ ଏଥିପାଇଁ ଆପଣଙ୍କୁ ତିନି ବର୍ଷର ‘‘ ବି.ଏସସି ଏଭିଏଶନ୍ ଡିଗ୍ରୀ ’’ କୋର୍ସ କରିବାକୁ ପଡ଼ିବ । ଏହି କୋର୍ସରେ ବିମାନ ଏବଂ ହେଲିକପ୍ଟର ଉଡ଼ାଣ ସମ୍ବନ୍ଧୀୟ ସମସ୍ତ ଶିକ୍ଷା ପ୍ରଦାନ କରାଯାଏ । ଏଥିରେ ବିମାନ ଚଳାଚଳ, ଇଞ୍ଜିନିୟରିଂ, ସ୍ପେସ ଇଞ୍ଜିନିୟରିଂ, ଏଭିଏଶନ୍ ସେଫ୍ଟି , ବିମାନ ଉତ୍ପାଦାନ, ନାଭିଗେସନ୍ ଏବଂ ବିମାନ ଚାଳନା ପରି ବିଷୟ ଅନ୍ତଭୂର୍କ୍ତ । ପାଇଲଟ୍ଙ୍କ ଅଭିଜ୍ଞତା ତାଙ୍କ ଉଡ଼ାଣ ଘଣ୍ଟା ଦ୍ୱାରା ମାପ କରାଯାଏ ଏବଂ ସେହି ଆଧାରରେ ସେମାନଙ୍କ ଦରମା ମଧ୍ୟ ସ୍ଥିର କରାଯାଏ । ଅଧିକ ଘଣ୍ଟା ଉଡ଼ାଣ, ଅଧିକ ଅଭିଜ୍ଞତା ଏବଂ ଅଧିକ ବେତନ, ଯାହା ଲକ୍ଷ ଲକ୍ଷ ଟଙ୍କା ପର୍ଯ୍ୟନ୍ତ ପହଞ୍ଚିପାରେ ।
ଏୟାରପୋଟ୍ ପରିଚାଳନାର କୋର୍ସ କରିବା ମଧ୍ୟ ଲାଭଦାୟକ :
ବିମାନ ଚଳାଚଳ କ୍ଷେତ୍ରରେ କ୍ୟାରିୟର ଗଢ଼ିବାକୁ ଚାହୁଁଥିବା ଲୋକଙ୍କ ପାଇଁ ଏୟାରପୋଟ୍ ପରିଚାଳନା କୋର୍ସ କରିବା ଏକ ଉତ୍ତମ ବିକଳ୍ପ ହୋଇପାରେ । ଏଥିପାଇଁ ଆପଣଙ୍କୁ ‘‘ଡିପ୍ଲୋମା ଇନ୍ ଆଭିଏସନ୍ ମ୍ୟାନେଜମେଣ୍ଟ’’ ଏକ ବର୍ଷର କୋର୍ସ କରିବାକୁ ପଡ଼ିବ । ଏଥିରେ ଏୟାରପୋଟ୍ ସହ ଜଡ଼ିତ ବିଷୟ ଯେପରି, ଷ୍ଟାଫ୍ ମ୍ୟାନେଜମେଣ୍ଟ , ସେଫ୍ଟି , ସିକ୍ୟୁରିଟି ମ୍ୟାନେଜେମେଣ୍ଟ , କାର୍ଗୋ ମ୍ୟାନେଜମେଣ୍ଟ ଏବଂ ଏୟାରପୋଟ୍ ଫଙ୍କ୍ସନିଙ୍ଗ୍ ସମ୍ବନ୍ଧୀୟ ଶିକ୍ଷା ଦିଆଯାଏ । ଏହି କୋର୍ସର ବିଶେଷ କଥା ହେଉଛି ଏହା ଦଶମ କିମ୍ବା ଦ୍ୱାଦଶ ପରେ ମଧ୍ୟ କରାଯାଇପାରିବ, ଯାହା ଛାତ୍ରଛାତ୍ରୀମାନଙ୍କୁ ଶୀଘ୍ର ଏଭିଏଶନ୍ ଇଣ୍ଡଷ୍ଟ୍ରୀରେ ପ୍ରବେଶ କରିବାର ସୁଯୋଗ ଦେଇଥାଏ ।
ଏଭିଏଶନ୍ ହସ୍ପିଟାଲିଟିରେ ବି ବହୁତ ସୁଯୋଗ ରହିଛି :
ଏଭିଏଶନ୍ ହସ୍ପିଟାଲିଟିରେ କ୍ୟାରିୟର କରିବା ପାଇଁ ‘‘ଡିପ୍ଲୋମା ଇନ୍ ଏଭିଏଶନ୍ ହସ୍ପିଟାଲିଟି ’’ମଧ୍ୟ ଏକ ଭଲ ବିକଳ୍ପ । ଏହା ଏକ ସ୍ୱତନ୍ତ୍ର ଡିପ୍ଲୋମା କୋର୍ସ ଯେଉଁଥିରେ ଛାତ୍ରଛାତ୍ରୀଙ୍କୁ ଏୟାରଲାଇନ୍ସ, ଏୟାରପୋଟ୍, ହୋଟେଲ ଇଣ୍ଡଷ୍ଟ୍ରୀ ଏବଂ ଏଭିଏଶନ୍ କ୍ଷେତ୍ରରେ ସେବା କରିବା ପାଇଁ ପ୍ରସ୍ତୁତ କରାଯାଏ । ଯାତ୍ରୀ ଏବଂ ଗ୍ରାହକଙ୍କ ସହ ସିଧାସଳଖ ଯୋଗାଯୋଗର ଦାୟିତ୍ୱ ପାଇଁ ଏହି କୋର୍ସ ତିଆରି କରାଯାଇଛି । ଏଥିରେ କମ୍ୟୁନିକେସନ, ଏଭିଏଶନ୍, ହସ୍ପିଟାଲିଟି, ଫୁଡ୍ ଏବଂ ବିଭରେଜ୍ ପ୍ରଡକସନ , ଫ୍ରଣ୍ଟ ଅଫିସ୍ ଅପରେସନ ଭଳି ବିଷୟ ଅନ୍ତଭୂର୍କ୍ତ । ଏହି କୋର୍ସ ପିଲାମାନଙ୍କୁ ସମସ୍ତ ପ୍ରକାର ଯାତ୍ରୀଙ୍କୁ ସଠିକ୍ ସେବା ପ୍ରଦାନ କରିବାରେ ସକ୍ଷମ କରେ ।
ଏହା ବ୍ୟତୀତ, ଅନେକ ଶିକ୍ଷା ଅନୁଷ୍ଠାନ ଏଭିଏଶନ୍ ମ୍ୟାନେଜମେଣ୍ଟରେ MBA ପ୍ରୋଗ୍ରାମ ମଧ୍ୟ ପ୍ରଦାନ କରନ୍ତି, ଯାହାକି ଏହି କ୍ଷେତ୍ରରେ କ୍ୟାରିୟର ଗଢିବା ପାଇଁ ଅଧିକ ସୁଯୋଗ ପ୍ରଦାନ କରିଥାଏ ।
