ମହିଳାଙ୍କୁ ଜୀବିକାର ନୂଆ ବାଟ ଦେଖାଇଲା ମିଶନ ଶକ୍ତି ‘ସୁବର୍ଣ୍ଣାଶ୍ରୀ’

ସୁବର୍ଣ୍ଣପୁର: ଦିନେ ରୋଷେଇ ଶାଳରେ ବସି ରହି ସ୍ୱାମୀଙ୍କ ଠାରୁ ହାତ ଖର୍ଚ୍ଚ ମାଗୁଥିବା ମହିଳା ଏବେ ନିଜେ ସ୍ୱାବଲମ୍ବୀ। ନିଜେ ପରିବାର ଚଳାଇବାକୁ ସକ୍ଷମ । ସରକାରଙ୍କ ମହିଳା ସଶକ୍ତିକରଣ ଯୋଜନାରେ ସାମିଲ ହୋଇ ଏବେ ମହିଳାମାନେ ଅନ୍ୟମାନଙ୍କ ପାଇଁ ସାଜିଛନ୍ତି ଉଦାହରଣ। ତେବେ ଏହି ପରିପେକ୍ଷୀରେ ମହିଳାଙ୍କୁ ଜିବୀକାର ନୂଆ ବାଟ ଦେଖାଇଛି ମିଶନ ଶକ୍ତି ସୁବର୍ଣ୍ଣାଶ୍ରୀ । ସୁବର୍ଣ୍ଣାଶ୍ରୀ ପ୍ରଡ୍ୟୁସର ଗୃପ ତିଆରି କରି ହୋଇପାରିଛନ୍ତି ଆତ୍ମ ନିର୍ଭରଶୀଳ ।

ଆରମ୍ଭ ହେବା ଦିନଠୁ ସୁବର୍ଣ୍ଣାଶ୍ରୀ ଦୋକାନ ଭିତରେ ଲୋକଙ୍କ ଭିଡ । ଘର କରଣା ସାମଗ୍ରୀ ଠାରୁ ଆରମ୍ଭ କରି ସମ୍ବଲପୁରୀ ପାଟଶାଢୀ,ସମ୍ବଲପୁରୀ କପଡା,ଶୁଖିଲା ଖାଦ୍ୟ ରାଶି ଲଡୁ,ବାଦାମ ଲଡୁ,କଖାରୁ ବଡି,ଆଚାର,ମୁଗ, ହରଡ,କୋଲଥ ଭଜାଡାଲି,ଟେରାକୋଟା ରେ ତିଆରି ବିଭିନ୍ନ ସାମଗ୍ରୀ ,ହାତ ତିଆରି ଘର କରଣା ,କାଠରେ ତିଆରି ଘୋଡା,ହାତୀ ଇତ୍ୟାଦି କରୁଛନ୍ତି ବିକ୍ରୀ । ଅନ୍ୟ ଦୋକାନୀ ମାନଙ୍କ ଠାରୁ କମ ଦାମରେ ବିକ୍ରୀ କରୁଥିବାରୁ ଗ୍ରାହକଙ୍କ ଭିଡ ହେଉଥିବା ଦେଖିବାକୁ ମିଳିଛି ।

ଏହି ଦୃଶ୍ୟ ହେଉଛି ସୁବର୍ଣ୍ଣପୁର ଜିଲ୍ଲା ବ୍ଲକ ଛକରେ ଥିବା ସୁବର୍ଣ୍ଣାଶ୍ରୀର ଦୃଶ୍ୟ । ଯେଉଁଠି ସ୍ୱାୟଂ ସହାୟକ ଗୋଷ୍ଠୀଙ୍କ ଦ୍ୱାରା ପ୍ରସ୍ତୁତ ସାମଗ୍ରୀ ପ୍ରତିଦନ ବିକ୍ରୀ କରାଯାଉଛି । ଆଉ ଗ୍ରାହକମାନେ ପ୍ରତିଦିନ ଏହି ସୁବର୍ଣ୍ଣାଶ୍ରୀ କୁ ଆସି କିଣା କିଣି କରୁଥିବାରୁ ମିଶନ ଶକ୍ତିର ସଦସ୍ୟମାନେ ମଧ୍ୟ ବେଶ ଦୁଇ ପଇସା କମାଇ ପାରୁଛନ୍ତି ।

ତେବେ ସୁବର୍ଣ୍ଣପୁର ଜିଲ୍ଲାପାଳଙ୍କ ସ୍ୱତନ୍ତ୍ର ନିର୍ଦ୍ଦେଶକ୍ରମେ ଓରମାସର ସହାୟତାରେ ସୋନପୁର ବ୍ଲକ ଛକରେ ଉଭୟ ସ୍ୱୟଂ ସହାୟକ ଗୋଷ୍ଠୀର ସଦସ୍ୟଙ୍କ ପାଇଁ ଏହି ମିଶନ ଶକ୍ତି ସୁବର୍ଣ୍ଣାଶ୍ରୀ ଖୋଲାଯାଇଥିବାବେଳେ କିଛିଦିନ ତଳେ ମନ୍ତ୍ରୀ ନିରଂଜନ ପୂଝାରୀ ଓ ମନ୍ତ୍ରୀ ପଦ୍ମନାଭ ବେହେରାଙ୍କ କରକମଳରେ ଖୋଲାଯାଇଥିବା ଏହି ସୁବର୍ଣ୍ଣାଶ୍ରୀର ବଢିଛି ବେଶ ଚାହିଦା । ସକାଳୁ ସଂଧ୍ୟ ପର୍ଯ୍ୟନ୍ତ ସୁବର୍ଣ୍ଣାଶ୍ରୀରେ ଜମୁଛି ଗ୍ରାହକଙ୍କ ଭିଡ । ଆଉ ଗ୍ରାହକଙ୍କ ମନପସନ୍ଦର ସାମଗ୍ରି ବିକ୍ରୟ କରି ସ୍ୱୟଂ ସହାୟକ ଗୋଷ୍ଠୀର ସଦସ୍ୟାମାନେ ହୋଇପାରିଛନ୍ତି ଆତ୍ମନିର୍ଭରଶୀଳ । ଏହାଦ୍ୱାରା ମହିଳାଙ୍କୁ ଆର୍ଥିକ ଅଭିବୃଦ୍ଧି କରିବାରେ ସହାୟକ ହେବବୋଲି କହିଛନ୍ତି ସୁବର୍ଣ୍ଣପୁର ଜିଲ୍ଲାପାଳ ।

ସୁବର୍ଣ୍ଣପୁର ଜିଲ୍ଲାରେ ମହିଳା ସଶକ୍ତିକରଣ ପଇଁ ଅନେକ ଯୋଜନା କରାଯାଇଥିବାବେଳେ ଏସବୁ ଭିତରେ ଏବେ ସବୁଠୁ ଆଗରେ ରହିଛି ସୋନପୁର ବ୍ଲକ ଛକରେ ଖୋଲାଯାଇଥିବା ମିଶନ ଶକ୍ତି ସୁବର୍ଣ୍ଣାଶ୍ରୀ । ଏହା ମହିଳାମାନଙ୍କୁ ଆତ୍ମ ନିର୍ଭରଶୀଳ କରିବାସହ ସେମାନଙ୍କ ଆର୍ଥିକ ଅଭିବୃଦ୍ଧି କରିବାରେ ସହାୟକ ହେବ ନିଶ୍ଚୟ।