ଗୋଟିଏ ଦେଶ ଦୁଇଟି ସହର : ଗୋଟିଏରେ ସୂର୍ଯ୍ୟୋଦୟ ହୁଏନି ଆଉ ଅନ୍ୟଟିରେ ହୁଏନି ସୂର୍ଯ୍ୟାସ୍ତ

ଅନ୍ଧାରରେ ରହିବାକୁ କିଏ ବା ପସନ୍ଦ କରେ । ତେଣୁ ଆମେ ସମସ୍ତେ ଏକଥା ଦିନେ ନା ଦିନେ  ନିଶ୍ଚିତ ଭାବରେ ଚିନ୍ତା କରିଥାଉ ଯେ ସୂର୍ଯ୍ୟାସ୍ତ ହୋଇ ନଥିଲେ କେତେ ଭଲ ହୋଇଥାନ୍ତା । କିନ୍ତୁ ସୂର୍ଯ୍ୟ  ଆଗରେ କାହାର ଚାଲେ । ନିଜ ଇଛାରେ ଉଦୟ ହୋଇଥାଏ ଆଉ ଅସ୍ତ ବି । କିନ୍ତୁ ବିଶ୍ବରେ ଏମିତି କିଛି ଦେଶ ଅଛି ଯେଉଁଠାରେ ସୂର୍ଯ୍ୟ ହୋଇ ନଥାନ୍ତି । ଆଜ୍ଞା ହଁ ଆଜି ଆମେ ଏମିତି ଏକ ସ୍ଥାନ ବିଷୟରେ କହିବୁ ଯେଉଁଠି ମାତ୍ର ୪୦ ମିନିଟ୍ ପାଇଁ ରାତି ହୋଇଥାଏ ।

ଏହା ଏମିତି ଏକ ସ୍ଥାନ ଯେଉଁଠି ରାତି ୧୨.୪୩ରେ ସୂର୍ଯ୍ୟ  ଲୁଚି ଥାଏ । ଆଉ ମାତ୍ର ୪୦ ମିନିଟ୍ ପରେ ଉଦୟ ହୋଇଥାଏ । ଏହି ନଜାରା ନରୱେରେ ଦେଖିବାକୁ ମିଳେ । କେବଳ ଦିନେ କି ଦୁଇ ଦିନ ନୁହେଁ ପ୍ରାୟ ଅଢେଇ ମାସ ପାଇଁ ସୂର୍ଯ୍ୟାସ୍ତ ହୋଇ ନଥାଏ । ସେଥିପାଇଁ ଏହାକୁ ’କଣ୍ଟ୍ରି ଅଫ୍ ମିଡନାଇଟ୍ ସନ୍’ କୁହାଯାଏ । ନରୱେର ହେମରଫେଷ୍ଟ ସହରରେ ମେ ମାସରୁ ଜୁଲାଇ ମଧ୍ୟରେ ୭୬ ଦିନ ପର୍ଯ୍ୟନ୍ତ ସୂର୍ଯ୍ୟାସ୍ତ ହୋଇନଥାଏ ।

ସେହିପରି ନରୱେରେ ଆଉ ଏକ ସହର ରହିଛି ଯେଉଁଠାରେ ଦୀର୍ଘ ୧୦୦ ବର୍ଷ ହେବ ସୂର୍ଯ୍ୟ କିରଣ ପାଇଁ ବ୍ୟାକୁଳ ହୋଇ ରହିଛନ୍ତି । ପାହାଡମାନଙ୍କ ମଧ୍ୟରେ ଘେରି ରହିଥିବା ଏହି ସ୍ଥାନରେ ଦୀର୍ଘ ଦିନ ଧରି ପହଂଚିପାରୁନି କିରଣ । ସେଥିପାଇଁ ଇଞ୍ଜିନିୟର୍ସମାନେ ବାହାର କରିଛନ୍ତି ଏକ ନିଆରା ଉପାୟ । ଲୋକଙ୍କ ନିକଟକୁ ସୂର୍ଯ୍ୟ  କିରଣ ପହଂଚାଇବାକୁ ନୂଆ ସୂର୍ଯ୍ୟ  ହିଁ ତିଆରି କରିଦେଇଛନ୍ତି ।

ଏହି ସହରର ନାଁ ହେଉଛି ଜୁକାନ୍ ଯାହା ପାହାଡ ମଧ୍ୟରେ ରହିଛି । ଆଉ ନିକଟରେ ଥିବା ଅନ୍ୟ ପାହାଡ ଗୁଡିକ ଏହି ସ୍ଥାନକୁ ସବୁବେଳେ ଘେରି ରହିଥାଏ । ତେବେ ନକଲି ସୂର୍ଯ୍ୟ ଯୋଗୁଁ ସହରର ସବୁ ସ୍ଥାନରେ ପହଂଚିପାରୁଛି ସୂର୍ଯ୍ୟ କିରଣ । ଏପରିକି ଅସଲ ସୂର୍ଯ୍ୟ  ଭଳି ମଧ୍ୟ ଦେଖାଯାଏ । ଏହି କାରଣ ପାଇଁ ଏହି ସ୍ଥାନକୁ ଦୂର ଦୂରରୁ ପର୍ଯ୍ୟଟକଙ୍କ ସୁଅ ଛୁଟିଥାଏ ।