ଜାଣନ୍ତୁ ପୃଥିବୀର ଏମିତି ଏକ ରହସ୍ୟମୟ ଜୀବ ବିଷୟରେ ଯାହା ବିନା ନିଶ୍ୱାସ ନେଇ ବି ଅଛି ଜୀବିତ
ଆମେ ସମସ୍ତଙ୍କୁ ଜଣା ଯେ ବିନା ନିଶ୍ୱାସ ପ୍ରଶ୍ୱାସରେ ପୃଥିବୀ ପୃଷ୍ଠରେ କୌଣସି ବି ଜୀବ ଦଣ୍ଡେ ମାତ୍ର ତିଷ୍ଠିବା ସମ୍ଭବ ନୁହେଁ । କିନ୍ତୁ ପ୍ରଥମ ଥର ପାଇଁ ବୈଜ୍ଞାନିକ ମାନେ ଏପରି ଏକ ରହସ୍ୟମୟ ଜୀବ ଆବିଷ୍କାର କରିଛନ୍ତି, ଯାହାକି ବିନା ନିଶ୍ଵାସ ନେଇ ବି ବଞ୍ଚିପାରିଛି । ଏହା ହୁଏତ ଦୁନିଆର ପ୍ରଥମ ଜୀବ ଯାହା ପାଖରେ ଏମିତି ଏକ ଅଦ୍ଭୁତ ଗୁଣ ରହିଛି । ଏକ ରିପୋର୍ଟ ଅନୁଯାୟୀ, ଜେଲିଫିସ ଭଳି ଦେଖାଯାଉଥିବା ଏହି ବହୁକୋଷିୟ ଜୀବ ଟିର ଶରୀରରେ ମାଇଟୋକଣ୍ଡ୍ରିଆ ଜିନାମ ମହଜୂତ ନାହିଁ । ପ୍ରକୃତରେ ମାଇଟୋକଣ୍ଡ୍ରିଆ ହିଁ କୌଣସି ଜୀବର ନିଶ୍ୱାସ ନେବା ପାଇଁ ଜରୁରୀ ହୋଇଥାଏ । କିନ୍ତୁ ଏହି ଅଦ୍ଭୁତ ଜୀବଟିର ଏହି ଅଙ୍ଗ ଟି ନଥିବାରୁ ଅକ୍ସିଜେନ ନେବାର ଆବଶ୍ୟକତା ହୋଇନଥାଏ ।
ନିକଟରେ ହିଁ ତେଲଅଭିବ ବିଶ୍ୱବିଦ୍ୟାଳୟର ବିଶେଷଜ୍ଞ ଦଳ ଏହି ଅଦ୍ଭୁତ ଜୀବ ଟିର ଅନୁସନ୍ଧାନ ପାଇଥିଲେ । ଏହି ବିଶେଷଜ୍ଞ ଦଳ ଅନୁଯାୟୀ ଏହି ବିଶେଷ ଧରଣର ଜୀବଟି ଅନ୍ୟ ପ୍ରଜାତିର ମାଛ ମାନଙ୍କ ଠାରୁ ହିଁ ନିଜ ପାଇଁ ଉର୍ଜା ଗ୍ରହଣ କରିଥାଏ । କିନ୍ତୁ ଏହି ଜୀବଟି ଜଳରେ ବାସ କରୁଥିବା ଅନ୍ୟ ମାଛ ମାନଙ୍କର କୌଣସି ପ୍ରକାର କ୍ଷତି କରିନଥାଏ । ଏହି ପରଜୀବୀ ସାଲମନ ମାଛ ଶରୀରରେ ବାସ କରୁଥିବା ବେଳେ ମାଛଟି ଜୀବିତ ଥିବା ପର୍ଯ୍ୟନ୍ତ ଏହା ବଞ୍ଚି ରହିଥାଏ । ଏହି ଜୀବଟିର ବୈଜ୍ଞାନିକ ନାମ ସାଲମିନିକୋଲା ରଖାଯାଇଛି । ଗବେଷଣାରୁ ଏହା ମଧ୍ୟ ଜଣାଯାଇଛି ଯେ, ଏହି ଜୀବ ମଣିଷ କିମ୍ବା ଅନ୍ୟ ଜୀବକୁ କୌଣସି ପ୍ରକାର କ୍ଷତି ଘଟାଇନଥାଏ ।
ବିନା ଅକ୍ସିଜେନରେ ପୃଥିବୀ ପୃଷ୍ଠରେ ବଞ୍ଚିରହିପାରୁଥିବା ଏହି ଜୀବ ସମ୍ଭନ୍ଧରେ ଆହୁରି ଅଧିକ ଜାଣିବା ପାଇଁ ବୈଜ୍ଞାନିକ ଦଳ ନିଜ ଗବେଷଣା ଜାରି ରଖିଛନ୍ତି । ଏହା ପୂର୍ବରୁ ଇଟାଲୀର ଏକ ବୈଜ୍ଞାନିକ ଦଳକୁ ଏମିତି ହିଁ ଏକ ସମାନ ଧରଣର ଜୀବର ସନ୍ଧାନ ମିଳିଥିଲା । କିନ୍ତୁ ସେହି ସମୟରେ ଜଣା ପଡିଥିଲା କି ଏହି ଜୀବଟି ହାଇଡ୍ରୋଜେନ ସଲଫାଇଡରୁ ହିଁ ନିଜ ପାଇଁ ଶକ୍ତି ସଞ୍ଚୟ କରିଥାଏ ।