ଆଦିମ ଜନଜାତି ଡଙ୍ଗରିଆ କନ୍ଧଙ୍କ କ୍ଷେତରେ ହସିଉଠୁଛି ବିଦେଶୀ ଫଳ ଷ୍ଟ୍ରବେରୀ

ରାୟଗଡା(କେନ୍ୟୁଜ୍): ଆମ ରାଜ୍ୟର ପୂର୍ବଘାଟ ପାର୍ବତ୍ୟମାଳାର  ଅଂଶବିଶେଷ ନିୟମଗିରି । ଏହି ନିୟମଗିରିରେ ରହିଛି ଉତ୍ତୁଙ୍ଗ ପାହାଡ । ସମୂଦ୍ର ପତନ ଠାରୁ ୫ ହଜାର ଫୁଟ ଉଚ୍ଚରେ ରାୟଗଡା ଜିଲ୍ଲାର ଏହି ଅଞ୍ଚଳରେ ଆଦିମ ଜନଜାତି ବସବାସ କରନ୍ତି । ଏମାନେ ବିନା ରସାୟନିକ ସାରରେ ଉଦ୍ୟାନ ଭିତ୍ତିକ ଚାଷ କରି ନିଜ ଜୀବନ ଜିବିକା ନିର୍ବାହ କରୁଆସୁଛନ୍ତି । ଏହାକୁ ଲକ୍ଷ କରି ଏଠାରେ ଷ୍ଟ୍ରବେରୀ ଚାଷ ପରୀକ୍ଷାମୂଳକ ଭାବେ ଆରମ୍ଭ କରାଯାଇଥିଲା ।

ନିୟମଗିରି ପାହାଡର ଢାଲୁ ଅଞ୍ଚଳରେ ପାହାଡ ଉପରେ ବସବାସ କରୁଥିବା ଆଦିମ ଜନଜାତି ବିଭିନ୍ନ ରକମର ଫଳଚାଷ କରୁଥିଲେ । ଫଳ ଚାଷ ଉପଯୋଗୀ ଜଳବାୟୁ ଯୋଗୁଁ ଏଠାରେ ଓଡିଶା ଆଦିମ ଜନଜାତି ଶସକ୍ତିକରଣ ଓ ଜୀବିକା ନିର୍ବାହ କାର୍ଯ୍ୟକ୍ରମ ତରଫରୁ ହିମାଚଳ ପ୍ରଦେଶରୁ ଚାରା ଆଣି ଏକ ଏକର ଜମିରେ ୨୦ ହଜାର ଚାରା ରୋପଣ କରାଯାଇଥିଲା । ଏବେ ଲାକୁନା ଜାକାସିକା ନାମକ ଜଣେ ଚାଷୀଙ୍କ ବଗିଚାରେ ଷ୍ଟ୍ରବେରୀ ଫଳିବା ଆରମ୍ଭ କଲାଣି । ଏହାକୁ ଦେଖିବା ଓ କିଣିବା ପାଇଁ ଲୋକଙ୍କ ଭିଡ ଜମୁଛି ।

ପ୍ରଥମେ ଏହି ଚାଷ କରିବା ପାଇଁ ଓପିଲିପି ତରଫରୁ ପ୍ରସିକ୍ଷଣ ଦିଆଗଲା । କୃଷି ଭିତ୍ତିକ ଉନ୍ନତ ଜ୍ଞାନ କୌଶଳରେ ଚାଷ କରିବା ପ୍ରଣାଳୀ ନେଇ ତାଲିମ ଦେବାପରେ ଷ୍ଟ୍ରବେରୀ ଚାଷ ଆରମ୍ଭ କରାଗଲା । ନିୟମଗିରିର ପାହାଡରେ ବୋହି ଯାଉଥିବା ଝରଣାର ସଦୁପୋଯୋଗ କରି ବୁନ୍ଦା ଜଳସେଚନ ବ୍ୟବସ୍ଥା କରାଗଲା । ଯାହାଫଳରେ ଚାଷୀ ବାର୍ଷିକ ମାତ୍ର ଏକରେ ଚାଷ ଜମିରୁ ୧୦ ଲକ୍ଷ ଟଙ୍କା ରୋଜଗାର କରିପାରିବ । ଆଗାମୀ ଦିନରେ ଏହି ଚାଷକୁ ନିୟମଗିରି ଅଞ୍ଛଳରେ ବ୍ୟାପକ ବାବେ କରିବା ପାଇଁ ଓପିଲିପି ଯୋଜନା କରିଛି ।

ଷ୍ଟ୍ରବେରୀର ବଜାର ଖୋଜିବାକୁ ପଡିନି । ଆପେ ଆପେ ସ୍ବତନ୍ତ୍ର ବଜାର ସୃଷ୍ଟି ହୋଇସାରିଛି । ନିୟମଗିରିର ଅନ୍ଧାରୀ ମୁଲକରେ ଷ୍ଟ୍ରବେରୀକୁ ସଫଳ ଭାବେ ଚାଷ କରି ଜୀବିକାର ନୂଆ ମାର୍ଗ ଓପିଲିପି ସଂସ୍ଥା ବାହର କରିଛନ୍ତି ।
ରାୟଗଡା ଜିଲ୍ଲାର ଦୁର୍ଗମ ଅଗମ୍ୟ ନିୟମଗିରି ପାହାଡର ଆଦିମ ଜନଜାତି ଡଙ୍ଗରିଆ କନ୍ଧଙ୍କ କ୍ଷେତରେ ହସିଉଠୁଛି ବିଦେଶୀ ଫଳ ଷ୍ଟ୍ରବେରୀ ।