ଝାଡଖଣ୍ଡର ରାଞ୍ଚିରେ ଅର୍ନେଟ୍ ଫ୍ଲାଇଙ୍ଗ ସାପ ଦେଖିବାକୁ ମିଳିଛି । ଏହି ସାପଟି ଏହାର ସୌନ୍ଦର୍ଯ୍ୟ ପାଇଁ ବେଶ ଜଣାଶୁଣା । ଏହି ସାପ ବିଷୟରେ ମହାଭାରତ ଏବଂ ଭାଗବତ ଗୀତାରେ ମଧ୍ୟ ଉଲ୍ଲେଖ କରାଯାଇଛି । କୁହାଯାଏ ଯେ ଏହା ହେଉଛି ସେହି ସାପ ଯାହା କି ରାଜା ପରିକ୍ଷୀତଙ୍କୁ କାମୁଡ଼ି ଥିଲା ଏବଂ ପରେ ସେ ମୃତ୍ୟୁ ବରଣ କରିଥିଲେ । ତକ୍ଷକ ନାଗ ନାମ ଶୁଣିଲେ ପ୍ରଥମେ ରାଜା ପରିକ୍ଷୀତଙ୍କ କଥା ମନକୁ ଆସେ । ଏହି ସାପ ବିଲୁପ୍ତ ହୋଇଯାଇଥିବା ଲୋକେ କୁହନ୍ତି । କିନ୍ତୁ ଆଜି ବି ତକ୍ଷକ ନାଗ ଉଡ଼ୁଛି ଏବଂ ଏହା ଆମ ପରିବେଶରେ ଅଛି । ତେବେ ଆସନ୍ତୁ ଜାଣିବା ରାଜା ପରିକ୍ଷୀତ ଏବଂ ତକ୍ଷକ ନାଗ ମଧ୍ୟରେ କଣ କାହାଣୀ ରହିଛି ଏବଂ ଏହି ସାପର ଉଡ଼ିବାର କ୍ଷମତା ଅଛି କି ନାହିଁ ।
ମହାଭାରତ ଏବଂ ଅନ୍ୟାନ୍ୟ ପୌରାଣିକ କାହାଣୀରେ ତକ୍ଷକ ନାଗ ବିଷୟରେ ଉଲ୍ଲେଖ କରାଯାଇଛି । ରାଜା ପରିକ୍ଷୀତ ଯିଏ କି ଜଣେ ଅତି ଧାର୍ମିକ ରାଜା ଥିଲେ । କିନ୍ତୁ ଥରେ ସାମିକ୍ ନାମକ ଜଣେ ଋଷିଙ୍କୁ ସେ ଅସୁବିଧାରେ ପକାଇଥିଲେ । ରାଜା ଋଷିଙ୍କ ବେକରେ ଏକ ମୃତ ସାପ ପକାଇ ଦେଇଥିଲେ । ଋଷିଙ୍କ ପୁଅ ଶ୍ରୁଙ୍ଗି ମଧ୍ୟ ଜଣେ ଶକ୍ତିଶାଳୀ ଋଷି ଥିଲେ । ପରିକ୍ଷୀତଙ୍କ କାର୍ଯ୍ୟର ସାକ୍ଷୀ ଥିବା ଜଣେ ବନ୍ଧୁଙ୍କଠାରୁ ସେ ଏହି ଘଟଣା ବିଷୟରେ ଜାଣିବାକୁ ପାଇଲେ । ସେ କ୍ରୋଧିତ ହୋଇ ଅନୁଭବ କଲେ ଯେ ତାଙ୍କ ପିତାଙ୍କୁ ଅସମ୍ମାନ କରାଯାଇଛି । ସାତ ଦିନ ମଧ୍ୟରେ ତକ୍ଷକ ନାମକ ସାପ କାମୁଡ଼ିବା କାରଣରୁ ରାଜା ମରିବେ ବୋଲି ସେ ପରିକ୍ଷୀତଙ୍କୁ ଅଭିଶାପ ଦେଇଥିଲେ । ଅଭିଶାପ ଦେବା ପୂର୍ବରୁ ସେ ତାଙ୍କ ପିତାଙ୍କର ପରାମର୍ଶ ନେଇନଥିଲେ । ଠିକ୍ ସାତ ଦିନ ଶେଷ ହେବା ପୂର୍ବରୁ ତକ୍ଷକ ସାପ ରାଜା ପରିକ୍ଷୀତଙ୍କୁ କାମୁଡ଼ି ଥିଲା, ଯେଉଁଥିପାଇଁ ସେ ମୃତ୍ୟୁ ବରଣ କରିଥିଲେ । ତକ୍ଷକ ନାଗକୁ ବହୁତ ଶକ୍ତିଶାଳୀ ଏବଂ ବିଷାକ୍ତ କୁହାଯାଉଥିଲା ଏବଂ କୁହାଯାଇଥିଲା ଯେ ଏହି ସାପ ଉଡିପାରେ ।
ଭାରତରେ ତକ୍ଷକ ନାଗକୁ ବହୁତ ଗୁରୁତ୍ୱ ଦିଆଯାଏ । ଏହାକୁ ‘ସର୍ପର ରାଜା’ ଭାବରେ ମାନନ୍ତି । ବିଶେଷକରି ନାଗ ପଞ୍ଚମୀ ଦିନ ଲୋକମାନେ ସାପକୁ ପୂଜା କରନ୍ତି । ତକ୍ଷକ ନାଗ ସହିତ ଜଡିତ କାହାଣୀଗୁଡିକ ଭାରତୀୟ ସଂସ୍କୃତିର ଏକ ଅତ୍ୟାବଶ୍ୟକ ଅଂଶ । ଏହା ବ୍ୟତୀତ ତକ୍ଷକ ନାଗର ନାମ ସର୍ବଦା ଭାରତୀୟ ପୁରାଣରେ ରହିଆସିଛି ।
କିନ୍ତୁ ବର୍ତ୍ତମାନ ତକ୍ଷକ ନାଗ କ୍ୱଚିତ୍ ଦେଖାଯାଉଛି । କିଛି ସାପକୁ ‘ଉଡ଼ୁଥିବା ସାପ’ କୁହାଯାଏ । ଏହି ସାପଗୁଡ଼ିକ ଉଡ଼ିବା ପରିବର୍ତ୍ତେ ଡେଇଁବାର କ୍ଷମତା ରଖିଛନ୍ତି । ଏହି ସାପମାନେ ନିଜ ଶରୀରକୁ ବିସ୍ତାର କରି ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଡେଇଁପାରନ୍ତି । ଡେଇଁବାର ଏହି ଉପାୟ ଅତ୍ୟନ୍ତ ଆଶ୍ଚର୍ଯ୍ୟଜନକ, କିନ୍ତୁ ବାସ୍ତବରେ ସେମାନେ ଉଡ଼ନ୍ତି ନାହିଁ । ଏହି ସାପଗୁଡ଼ିକ ବିଶେଷ ଭାବରେ ଦକ୍ଷିଣ-ପୂର୍ବ ଏସିଆରେ ଦେଖାଯାନ୍ତି ।