ପୁଣି ଥରେ ବିପଦରେ ପଡ଼ିବ ଟିମ୍ ଇଣ୍ଡିଆ, ସିଡନୀ ଗ୍ରାଉଣ୍ଡରେ କାମ କରେନି ବିରାଟଙ୍କ ବ୍ଯାଟିଂ
ଭାରତ – ଅଷ୍ଟ୍ରେଲିଆ ମଧ୍ୟରେ ଚାଲୁଥିବା ଦିନିକିଆ ସିରିଜର ଦ୍ବିତୀୟ ମ୍ଯାଚ ଆସନ୍ତାକାଲି ସିଡନୀ ଗ୍ରାଉଣ୍ଡରେ ଖେଳାଯିବ। ପ୍ରଥମ ଦିନିକିଆରେ ଭାରତ ଅଷ୍ଟ୍ରେଲିଆ ଠାରୁ ୬୬ ରନରେ ପରାସ୍ତ ହୋଇଛି । ଏହି ମ୍ୟାଚରେ ସମସ୍ତଙ୍କ ଫୋକସରେ ଥିଲେ ଚଳିତ ସମୟର ଶ୍ରେଷ୍ଠ ବ୍ୟାଟସମ୍ୟାନ୍ ବିରାଟ କୋହଲି । କିନ୍ତୁ ସେ ସମସ୍ତଙ୍କୁ ନିରାଶ କରିଥିଲେ । ମାତ୍ର ୨୧ ରନ୍ ଖେଳି ସେ ପ୍ୟାଭିଲିୟନ ଫେରିଥିଲେ । ସିଡନୀ ଗ୍ରାଉଣ୍ଡରେ ସେ ଲଗାତର ଭାବେ ଫ୍ଲପ୍ ହେଉଛନ୍ତି ।
ବିଶ୍ୱ କ୍ରିକେଟରେ ବିରାଟଙ୍କୁ ସଚିନ ତେନ୍ଦୁଲକରଙ୍କ ସହ ତୁଳନା କରାଯାଏ । ସିଡନୀ ହେଉଛି ସଚିନଙ୍କ ପସନ୍ଦଯୋଗ୍ୟ ଷ୍ଟାଡିୟମ । ସେ ଅଷ୍ଟ୍ରେଲିଆରେ ସର୍ବାଧିକ ୪ଟି ଶତକ ଏହି ଷ୍ଟାଡିୟମରେ ଲଗାଇଛନ୍ତି । କିନ୍ତୁ ବିରାଟ ଏଠାରେ ରନ୍ ସଂଗ୍ରହ ପାଇଁ ସଙ୍ଘର୍ଷ କରିଥାନ୍ତି । ଟେଷ୍ଟରେ ସେ ଏହି ଷ୍ଟାଡିୟମରେ ଶତକ ଲଗାଇଥିଲେ ମଧ୍ୟ ଦିନିକିଆରେ ମୋଟ୍ ୬ଟି ଇନିଂସ ଖେଳି ସେ ୫୭ ରନ୍ କରିଛନ୍ତି । ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଦିନିକିଆ ମଧ୍ୟ ଏହି ଷ୍ଟାଡିୟମରେ ଖେଳାଯିବ । ପ୍ରଶଂସକମାନେ ବିରାଟଙ୍କ ଠାରୁ ବେଶ୍ ବଡ଼ ସ୍କୋର ଆଶା କରୁଛନ୍ତି।
ଅଷ୍ଟ୍ରେଲିଆରେ ବିରାଟଙ୍କ ଫେଭରେଟ୍ ଗ୍ରାଉଣ୍ଡ ହେଉଛି ଆଡିଲେଡ୍ । ତାଙ୍କର ଆଭରେଜ ୭୬ । ଏଠାରେ ସେ ଟେଷ୍ଟ୍ ଓ ଦିନିକିଆରେ ଖେଳିଥିବା ୧୧ଟି ଇନିଂସରେ ୭୬୫ ରନ୍ କରିଛନ୍ତି । ୫ଟି ଶତକ ମଧ୍ୟ ଲଗାଇଛନ୍ତି । ୨୦୧୨ରେ ବିରାଟ ପ୍ରଥମେ ଏହି ଷ୍ଟାଡିୟମରେ ୧୧୬ ରନ୍ କରିଥିଲେ ।