ବିଜୟରୁ ଅଭିଯାନ ଆରମ୍ଭ କଲା ଭାରତ । ପ୍ରଥମ ମ୍ୟାଚରେ ଆର୍ୟଲାଣ୍ଡ ବିପକ୍ଷରେ ଏକପାଖିଆ ବିଜୟ ହାସଲ କରିଛି ରୋହିତ ବାହିନୀ । ରୋହିତ ଶର୍ମାଙ୍କ ଅପରାଜିତ ୫୨ ରନ୍ ଓ ରିଷଭ ପନ୍ଥଙ୍କ ଅପରାଜିତ ୩୬ ରନ ବଳରେ ଆୟର୍ଲାଣ୍ଡକୁ ୮ ୱିକେଟରେ ହରାଇଛି ଭାରତ। ଦଳ ମାତ୍ର ୨ ୱିକେଟ ହରାଇ ୯୭ ରନ୍ ର ବିଜୟ ଲକ୍ଷ୍ୟ ହାସଲ କରିନେଇଥିଲା। ମାତ୍ର ୨୨ ରନରେ ଦଳ ବିରାଟ କୋହଲିଙ୍କ ୱିକେଟ ହରାଇଥିଲା ।
ଏହାପରେ ରୋହିତ ଓ ରିଷବ ପନ୍ଥଙ୍କ ଯୋଡ଼ି ଭାରତକୁ ବିଜୟ ଅଭିମୁଖେ ନେଇଯାଇଥିଲେ। ହେଲେ ରୋହିତ ଆହତ ହୋଇ ପେଭଲିଅନ ଫେରିବା ପରେ ସୂର୍ଯ୍ୟକୁମାର ଯାଦବ ବ୍ୟାଟିଂ କରିବାକୁ ଆସିଥିଲେ। ହେଲେ ସେ ମାତ୍ର ୨ ରନ୍ କରି ଆଉଟ୍ ହୋଇଥିଲେ। ନ୍ୟୁୟର୍କର ନସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମ୍ ରେ ଖେଳାଯାଇଥିବା ଏହି ମ୍ୟାଚ୍ ରେ ଟସ୍ ଜିତି ପ୍ରଥମେ ଫିଲଡିଂ ନିଷ୍ପତ୍ତି ନେଇଥିବା ଭାରତ, ଆୟର୍ଲାଣ୍ଡକୁ ମାତ୍ର ୯୬ ରନ୍ ରେ ଅଲଆଉଟ୍ କରିଥିଲା। ହାର୍ଦ୍ଦିକ ପାଣ୍ଡ୍ୟା ସର୍ବାଧିକ ୩ଟି ୱିକେଟ ନେଇଥିବା ବେଳେ ଅର୍ଶଦୀପ ସିଂହ ଓ ଜଶପ୍ରିତ ବୁମରା ୨ଟି ଲେଖାଏଁ ୱିକେଟ ନେଇଥିଲେ। ଆୟର୍ଲାଣ୍ଡ ୧୬ ଓଭରରେ ୯୬ ରନ୍ କରିବାରେ ସମର୍ଥ ହୋଇଥିଲା। ଗାରେଥ ଡିଲେନି ସର୍ବାଧିକ ୨୬ ରନ୍ କରିଥିଲେ।.