ନ୍ୟୁଜିଲାଣ୍ଡ ଭୂମିରେ ନ୍ୟୁଜିଲାଣ୍ଡକୁ ଧୁଳି ଚଟାଇଲା ଭାରତ। ଇଡେନ୍ ପାର୍କରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିବା ପ୍ରଥମ ଟି୨୦ରେ ଭାରତ ୬ ଓ୍ୱିକେଟରେ ବିଜୟୀ ହୋଇଛି। କେଏଲ ରାହୁଲ ଓ ଶ୍ରେୟସ ଆୟାରଙ୍କ ଅର୍ଧଶତକ ଏବଂ ବିରାଟ କୋହଲିଙ୍କ ଲଢୁଆ ଇନିଂସ ବଳରେ ଭାରତ ଏହି ମ୍ୟାଚ ବିଜୟୀ ହେବା ସହ ସିରିଜରେ ୧-୦ରେ ଆଗୁଆ ରହିଛି।
ଟସ୍ ଜିତି ଭାରତ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରିଥିବା ନ୍ୟୁଜିଲାଣ୍ଡ ନିର୍ଧାରିତ ୨୦ ଓଭରରେ ୫ ଓ୍ୱିକେଟ ହରାଇ ୨୦୩ରନ କରିଥିଲା। ନ୍ୟୁଜିଲାଣ୍ଡ ପକ୍ଷରୁ କୋଲିନ୍ ମୁନରୋ ସର୍ବାଧିକ ୫୯ ରନ, ରସ ଟେଲର ୫୪ ଓ କେନ୍ ଓ୍ୱିଲମସନ୍ ୫୧ ରନ କରିଥିଲେ। ଅନ୍ୟମାନଙ୍କ ମଧ୍ୟରେ ମାର୍ଟିନ୍ ଗୁପ୍ଟିଲ ୩୦ ରନ କରିଥିଲେ। ଯାହା ଫଳରେ ଦଳ ୨୦୩ ରନର ବିଶାଳ ସ୍କୋର କରିଥିଲା।
୨୦୪ରନର ବିଜୟ ଲକ୍ଷ୍ୟ ରଖି ଭାରତ ପ୍ରଥମେ ରୋହିତ ଶର୍ମାଙ୍କ ମଇଦାନକୁ ଛାଡିଥିଲା । ରୋହିତ ମାତ୍ର ୭ ରନ କରି ଆଉଟ ହୋଇଥିଲେ। ଲୋକେଶ ରାହୁଲଙ୍କ ଆଉଟ୍ ପରେ ଅଧିନାୟକ ବିରାଟ କୋହଲି ମଧ୍ୟ କ୍ରିଜରେ ଅଧିକ ସମୟ ତିଷ୍ଠି ପାରିନଥିଲେ। କୋହଲି ୩୨ ବଲରୁ ୩ ଚୌକା ଓ ୧ ଛକା ସହାୟତାରେ ୪୫ ରନର ଉଲ୍ଲେଖନୀୟ ପାଳି ଖେଳି ପାଭିଲିୟନ ଫେରିଥିଲେ। ଶିବମ ଦୁବେ ୧୩ ରନ କରି ବିଦାୟ ନେଇଥିଲେ। ଏହା ପରେ ଶ୍ରେୟସ ଆରୟ ଓ ମନୀଷ ପାଣ୍ଡେ ବ୍ୟାଟିଂ ସମ୍ଭାଳି ଦଳକୁ ବିଜୟର ନିକଟତର କରାଇଥିଲେ।
ନ୍ୟୁଜିଲାଣ୍ଡ ତରଫରୁ ଇସ୍ ସୋଧୀ ୨ଟି ଓ୍ୱିକେଟ୍ ନେଇଥିବା ବେଳେ ମିଚେଲ ସାଣ୍ଟର୍ ଓ ବ୍ଲେଆର୍ ଟିକନର୍ ଗୋଟିଏ ଲେଖାଏଁ ଓ୍ୱିକେଟ୍ ନେଇଥିଲେ। ଖାସ୍ କରି ଶ୍ରେୟସ ଆୟର ବିସ୍ଫୋରକ ବ୍ୟାଟିଂ କରି ୨୬ ବଲରୁ ଅର୍ଦ୍ଧଶତକ ହାସଲ କରିଥିଲେ। ସେ ୨୯ ବଲରୁ ୫ ଚୌକା ଓ ୩ ଛକା ଜରିଆରେ ୫୮ ରନର ଅପରାଜିତ ପାଳି ଖେଳି ଦଳକୁ ବିଜୟୀ କରାଇଥିଲେ। ତାଙ୍କର ଏହି ଦମଦାର ବ୍ୟାଟିଂ ବଳରେ ଭାରତ ୧୯ ଓଭରରେ ୪ ଓ୍ଵିକେଟ୍ ବିନିମୟରେ ୨୦୪ ରନର ବିଜୟ ଲକ୍ଷ୍ୟ ହାସଲ କରି ନେଇଛି। ମନୀଷ ପାଣ୍ଡେ ୧୪ ରନ କରି ଅପରାଜିତ ଥିଲେ।