ଭାରତ କ୍ରିକେଟ୍ ଖେଳିବାକୁ ପାକିସ୍ତାନ ଯିବ ନାହିଁ କି ପାକିସ୍ତାନ ଦଳ ୨୦୨୭ ପର୍ଯ୍ୟନ୍ତ କୌଣସି ଟୁର୍ଣ୍ଣାମେଣ୍ଟ ଖେଳିବାକୁ ଭାରତ ଆସିବ ନାହିଁ । ଏସିଆ କପ୍, ମହିଳା ବିଶ୍ବକପ ହେଉ କିମ୍ବା କୌଣସି ଆଇସିସି ଇଭେଣ୍ଟ, ୨୦୨୭ ପର୍ଯ୍ୟନ୍ତ ଭାରତ ଓ ପାକିସ୍ତାନ ପରସ୍ପର ସହିତ ଖେଳିବେ ନାହିଁ ।
ଭାରତ ଆସନ୍ତା ବର୍ଷ ମହିଳା ବିଶ୍ୱକପ୍ ଏବଂ ପୁରୁଷ ଏସିଆ କପ୍ ଆୟୋଜନ କରିବାକୁ ଯାଉଛି । ଏହାବ୍ୟତୀତ ଭାରତ ଓ ଶ୍ରୀଲଙ୍କା ମଧ୍ୟ ୨୦୨୬ ଟି-୨୦ ବିଶ୍ୱକପ୍ ଏକାଠି ଆୟୋଜନ କରିବାକୁ ଯାଉଛନ୍ତି । ଏହି ସବୁ ଟୁର୍ଣ୍ଣାମେଣ୍ଟ ପାଇଁ ପାକିସ୍ତାନ ଦଳ ଭାରତରେ ନିଜର ମ୍ୟାଚ୍ ଖେଳିବ ନାହିଁ ।
ଆଇସିସିର ନୂଆ ଅଧ୍ୟକ୍ଷ ଜୟ ଶାହ ଓ ପାକିସ୍ତାନ ସମେତ ବୋର୍ଡ ଅଫ ଡିରେକ୍ଟର୍ସ ମିଟିଂରେ ଚାମ୍ପିୟନ୍ସ ଟ୍ରଫି ହାଇବ୍ରିଡ ମଡେଲରେ ଖେଳାଯିବ ବୋଲି ସ୍ଥିର ହୋଇଥିବା ଜଣାପଡ଼ିଛି । ତେବେ ଆଇସିସି ନେଇଥିବା ଏପରି ନିଷ୍ପତ୍ତି ୨୦୨୭ ଯାଏ କାର୍ଯ୍ୟକାରୀ ହେବ । ଏହି ସମୟସୀମା ମଧ୍ୟରେ ପାକିସ୍ତାନ କିମ୍ବା ଭାରତ କୌଣସି ଆଇସିସି ଇଭେଣ୍ଟର ଆୟୋଜନ କରନ୍ତି, ତା’ହେଲେ ଉଭୟ ଦଳ ନିରପେକ୍ଷ ଭେନ୍ୟୁରେ ମ୍ୟାଚ୍ ଖେଳିବେ ।
ଜୟ ଶାହା ଦୁବାଇ ସ୍ଥିତ ଆଇସିସି ମୁଖ୍ୟାଳୟକୁ ପ୍ରଥମ ଥର ପାଇଁ ଗସ୍ତ କରିଥିଲେ, ଯେଉଁଠାରେ ସେ ଷ୍ଟାଫ୍ ସଦସ୍ୟ, ବୋର୍ଡ ଅଫ୍ ଡାଇରେକ୍ଟର ଏବଂ ମିଡିଆ ରାଇଟ୍ସ ପାର୍ଟନରଙ୍କୁ ଭେଟିଥିଲେ । ପ୍ରଥମ ଦିନକୁ ସ୍ମରଣୀୟ କରିଥିବାରୁ ସେ କର୍ମଚାରୀ ଓ ଅନ୍ୟ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ।