ଶ୍ରୀଲଙ୍କାରେ ଜାରି ରହିଛି ଆର୍ଥିକ ସଙ୍କଟ : ପେଟ୍ରୋଲ୍ ପମ୍ପରେ ଲୋକଙ୍କୁ ଚା’ ଏବଂ ପାଉଁରୁଟି ଦେଲେ ପୂର୍ବତନ କ୍ରିକେଟ୍ ଖେଳାଳି ରୋଶନ ମହାନାମା
ନୂଆଦିଲ୍ଲୀ : ଶ୍ରୀଲଙ୍କାରେ ଆର୍ଥିକ ସଙ୍କଟ ଆହୁରି ଗଭୀର ହୋଇଛି। ତୈଳ ସଙ୍କଟ ଯୋଗୁଁ ଲୋକଙ୍କ ସମସ୍ୟା ବୃଦ୍ଧି ପାଇଛି। ଏହି ସମୟରେ ଶ୍ରୀଲଙ୍କାର ପୂର୍ବତନ କ୍ରିକେଟର ରୋଶନ ମହାନାମା ତାଙ୍କ ଦେଶବାସୀଙ୍କୁ ସାହାଯ୍ୟ କରିବାକୁ ଆଗେଇ ଆସିଛନ୍ତି। ପୂର୍ବତନ କ୍ରିକେଟର ପେଟ୍ରୋଲ ପମ୍ପରେ ଲମ୍ବା ଧାଡିରେ ଠିଆ ହୋଇଥିବା ଲୋକଙ୍କୁ ଆବଶ୍ୟକୀୟ ଜିନିଷ ବଣ୍ଟନ କରି ସାହାଯ୍ୟ କରୁଛନ୍ତି। ଏଥିସହିତ ପେଟ୍ରୋଲ ପମ୍ପରେ ଲୋକଙ୍କ ମଧ୍ୟରେ ଚା’ ଓ ପାଉଁରୁଟି ପରିବେଷଣ କରୁଥିବା ଦେଖିବାକୁ ମିଳିଥିଲା। ଏହା ସହ ସେ ଲୋକମାନଙ୍କୁ ନିବେଦନ କରିଥିଲେ ଏବଂ କହିଥିଲେ ଯେ ଲୋକମାନେ କଷ୍ଟ ସମୟରେ ନିଜ ପ୍ରିୟଜନଙ୍କ ଯତ୍ନ ନେବା ଉଚିତ୍।
ରୋଶନ୍ ମହାନାମା ଗତ ଶନିବାର ଦିନ ଚା ଏବଂ ‘ବନ୍’ (ଛୋଟ ପାଉଁରୁଟି) ପରିବେଷଣ କରିଥିବା କଥା ଟୁଇଟର୍ ପୋଷ୍ଟ୍ରୁ ଜଣାପଡ଼ିଛି। ଶ୍ରୀଲଙ୍କାରେ ଉତ୍କଟ ଆର୍ଥିକ ସଙ୍କଟ ଦେଖାଦେଇଥିବା ବେଳେ ଇନ୍ଧନ ସଙ୍କଟ ଅଧିକ ଉତ୍କଟ ହୋଇଯାଇଛି। ଦେଶରେ ଗଚ୍ଛିତ ଥିବା ଇନ୍ଧନ ପାଞ୍ଚ ଦିନ ମଧ୍ୟରେ ଶେଷ ହୋଇଯିବ ବୋଲି ଶୁକ୍ରବାର ଦିନ ଶକ୍ତିମନ୍ତ୍ରୀ ଘୋଷଣା କରିବା ପରେ ପେଟ୍ରୋଲ୍ ଓ ଗ୍ୟାସ୍ ଷ୍ଟେସନ୍ରେ ଲୋକେ ଏକାଧିକ କିଲୋମିଟର୍ ଲମ୍ବା ଧାଡ଼ିରେ ପ୍ରତୀକ୍ଷା କରିଥିଲେ।
ଏଥିସହିତ, ପର୍ଯ୍ୟାପ୍ତ ପରିମାଣର ତରଳ ପଦାର୍ଥ ଏବଂ ଖାଦ୍ୟ ଆଣିବା ପାଇଁ ଘଣ୍ଟା ଘଣ୍ଟା ଧରି ଅପେକ୍ଷା କରିଥିବା ଲୋକଙ୍କୁ ନିବେଦନ କରିଥିଲେ ଯେ ଯଦି ଆପଣ ଲାଇନରେ ଛିଡା ହେବା ସମୟରେ ସୁସ୍ଥ ଅନୁଭବ କରୁଛନ୍ତି, ତେବେ ନିକଟସ୍ଥ ବ୍ୟକ୍ତିଙ୍କଠାରୁ ସାହାଯ୍ୟ ମାଗନ୍ତୁ କିମ୍ବା 1990 ନମ୍ବରରେ କଲ କରନ୍ତୁ।
ସେ ଟୁଇଟ୍ କରି କେତେକ ଫଟୋ ସେୟାର୍ କରିବା ସହ ଲେଖିଛନ୍ତି, ୱାର୍ଡ ପ୍ଲେସ୍ ଏବଂ ୱିଜେରାମା ମାୱାଥା ଅଞ୍ଚଳରେ ଥିବା ପେଟ୍ରୋଲ୍ ଷ୍ଟେସନ୍ରେ ଧାଡ଼ିବାନ୍ଧି ଥିବା ଲୋକମାନଙ୍କୁ ଆଜି ସନ୍ଧ୍ୟାରେ ‘କମ୍ୟୁନିଟି ମିଲ୍ ସେୟାର୍’ ପକ୍ଷରୁ ଆମେ ଚା ଓ ବନ୍ ପରିବେଷଣ କରିଛୁ। ଦିନକୁ ଦିନ ଏହି ପ୍ରକାରର ଧାଡ଼ି ଲମ୍ବିବାରେ ଲାଗିଛି। ଧାଡ଼ିବାନ୍ଧି ଥିବା ଲୋକମାନଙ୍କଠାରେ ସ୍ବାସ୍ଥ୍ୟ ସମସ୍ୟା ଦେଖା ଦେଇପାରେ। ତେଣୁ, ଲୋକେ ସଙ୍ଗରେ ଯଥେଷ୍ଟ ପାଣି ଓ ଖାଦ୍ୟ ଆଣି ଧାଡ଼ିବାନ୍ଧି ଠିଆ ହୁଅନ୍ତୁ ଓ ଆବଶ୍ୟକ ବେଳେ ଧାଡ଼ିବାନ୍ଧି ଥିବା ଲୋକେ ପରସ୍ପରକୁ ସାହାଯ୍ୟ କରନ୍ତୁ ବୋଲି ସେ ନିବେଦନ କରିଛନ୍ତି।
ସୂଚନା ଯୋଗ୍ୟ ଶ୍ରୀଲଙ୍କା ଚଳିତ ବର୍ଷ ମାର୍ଚ୍ଚ ଠାରୁ ସବୁଠାରୁ ଖରାପ ଅର୍ଥନୈତିକ ସଙ୍କଟ ଦେଇ ଗତି କରୁଛି, ଖାଦ୍ୟ, ଔଷଧ, ରନ୍ଧନ ଗ୍ୟାସ୍ ଏବଂ ଅନ୍ୟାନ୍ୟ ଇନ୍ଧନ, ଶୌଚାଳୟ କାଗଜ ଭଳି ଅତ୍ୟାବଶ୍ୟକ ସାମଗ୍ରୀର ଅଭାବର ସମ୍ମୁଖୀନ ହେଉଛନ୍ତି। ଏହାକୁ ଦୃଷ୍ଟିରେ ରଖି ଦୀର୍ଘ ଦିନ ଧରି ବିଦ୍ୟୁତ୍ କାଟ ହେତୁ ଶ୍ରୀଲଙ୍କା ସରକାର ଆସନ୍ତା ସପ୍ତାହ ପାଇଁ ସମସ୍ତ ବିଦ୍ୟାଳୟ ଓ ଅନୁଷ୍ଠାନ ବନ୍ଦ କରିବାକୁ ଘୋଷଣା କରିଛନ୍ତି।
ଅନାବଶ୍ୟକ ଯାତାୟାତରୁ ଦୂରେଇ ରହିବା ଏବଂ ଇନ୍ଧନ ସଞ୍ଚୟ କରିବା ପାଇଁ ଶ୍ରୀଲଙ୍କାର ଶିକ୍ଷା ମନ୍ତ୍ରଣାଳୟ ଛାତ୍ରମାନଙ୍କୁ ଅନଲାଇନ୍ କ୍ଲାସ୍ ଆୟୋଜନ କରିବାକୁ ପରାମର୍ଶ ଦେଇଛନ୍ତି। ଆର୍ଥିକ ସଙ୍କଟ ଖାଦ୍ୟ ନିରାପତ୍ତା, କୃଷି, ଜୀବିକା ଏବଂ ସ୍ୱାସ୍ଥ୍ୟ ସେବାରେ ବିଶେଷ ପ୍ରଭାବ ପକାଇଛି। ଲୋକମାନେ ଇନ୍ଧନ ଏବଂ ରନ୍ଧନ ଗ୍ୟାସ୍ କିଣିବା ପାଇଁ ଘଣ୍ଟା ଘଣ୍ଟା ଧରି ଦୋକାନ ବାହାରେ ଅପେକ୍ଷା କରୁଛନ୍ତି।