ଚାମ୍ପିଅନ୍ସ ଟ୍ରଫିରେ ଭାରତ ଠାରୁ ହାରିବା ପରେ ଅବସର ନେଲେ ଅଷ୍ଟ୍ରେଲିଆ ଅଧିନାୟକ ଷ୍ଟିଭ ସ୍ମିଥ, ଦିନିକିଆକୁ କହିଲେ ବାଏ ବାଏ

By Swagatika 0
steve smith

ଚାମ୍ପିଅନ୍ସ ଟ୍ରଫି ୨୦୨୫ ମେସିଫାଇନାଲ ମ୍ୟାଚରେ ଭାରତ ଠାରୁ ହାରିବା ପରେ ସନ୍ନ୍ୟାସ ନେଇଛନ୍ତି ଅଷ୍ଟ୍ରେଲିଆ ଅଧିନାୟକ ଷ୍ଟିଭ ସ୍ମିଥ । ଦିନିକିଆ କ୍ରିକେଟକୁ ବାଏ ବାଏ କହିଛନ୍ତି ଷ୍ଟିଭ ସ୍ମିଥ । ଦୁବାଇରେ ଖେଳାଯାଉଥିବା ସେମିଫାଇନାଲ ମ୍ୟାଚରେ ଭାରତ ଅଷ୍ଟ୍ରେଲିଆକୁ ୪ ୱିକେଟରେ ହରାଇଛି । ଏହାସହିତ ଫାଇନାଲରେ ପ୍ରବେଶ କରିଛି ଭାରତ । ଆଉ ଅଷ୍ଟ୍ରେଲିଆର ଫାଇନାଲ ସ୍ବପ୍ନ ଧୂଳିସାତ ହୋଇଛି ।

ସନ୍ନ୍ୟାସ ଗ୍ରହଣ କରିବା ପରେ ସ୍ମିଥ କହିଛନ୍ତି, ଏହା ମୋ ପାଇଁ ଏକ ଶାନଦାର ସଫର । ମୁଁ ପ୍ରତି ମୁହୂର୍ତ୍ତର ଆନନ୍ଦ ନେଇଛି । ବହୁତ ଅଦ୍ଭୁତ ମୁହୂର୍ତ୍ତ ମୋ ପାଇଁ ବଢିଆ ରହିଛି । ବିଶ୍ବକପ ଜିତିବାର ବଢିଆ ଅନୁଭୂତି ମୋ ପାଇଁ ସ୍ମରଣୀୟ ।

ଦିନିକିଆ କ୍ରିକେଟରୁ ସ୍ମିଥ ସନ୍ନ୍ୟାସ ଗ୍ରହଣ କରିଛନ୍ତି । ଟେଷ୍ଟ ଏବଂ ଟି୨୦ ଇଣ୍ଟରନ୍ୟାସନାଲ ମ୍ୟାଚ ଖେଳିବେ । ସ୍ମିଥ ୨୦୧୦ରେ ୱେଷ୍ଟଇଣ୍ଡିଜ ବିପକ୍ଷରେ ଅଲରାଉଣ୍ଡର ଭାବେ ଡେବ୍ୟୁ କରିଥିଲେ । ଏହାପରେ ବ୍ୟାଟିଂରେ କମାଲ କରି ଦୁନିଆର ଶ୍ରେଷ୍ଠ ବ୍ୟାଟର ଭାବେ ଜଣାଶୁଣା ହେଲେ । ସେ ଅଷ୍ଟ୍ରେଲିଆ ପାଇଁ ୧୭୦ ଦିନିକିଆରେ ୪୩.୨୮ ପ୍ରତିଶତରେ ୫୮୦୦ ରନ୍ କରିଛନ୍ତି । ଏଥିରେ ୧୨ ଶତକ ଏବଂ ୩୫ ଅର୍ଦ୍ଧଶତକ ରହିଛି । ଏହାସହିତ ସେ ୨୮ ୱିକେଟ ମଧ୍ୟ ନେଇଛନ୍ତି ।

ସ୍ମିଥ ୨୦୧୫ରେ ଅଷ୍ଟ୍ରେଲିଆ ଟିମର ଦିନିକିଆ ଅଧିନାୟକ ହୋଇଥିଲେ । କିନ୍ତୁ ୨୦୧୮ରେ ସ୍ୟାଣ୍ଡ ପେପର ମାମଲାରେ ଜଡିତ ଥିବାରୁ ତାଙ୍କୁ ଅଧିନାୟକ ପଦରୁ ହଟାଇ ଦିଆଯାଇଥିଲା । ତାଙ୍କ ଉପରେ ବର୍ଷେ ଯାଏଁ ବ୍ୟାନ୍ ଲାଗିଥିଲା । ବ୍ୟାନ୍ ହଟିବା ପରେ କିଛି ବର୍ଷ ପରେ ତାଙ୍କୁ ଅଧିନାୟକ ପଦ ମିଳିଥିଲା । ଚାମ୍ପିଅନ୍ସ ଟ୍ରଫି ୨୦୨୫ରେ ପାଟ୍ କେମିନ୍ସଙ୍କ ଅନୁପସ୍ଥିତିରେ ଅଷ୍ଟ୍ରେଲିଆ ଟିମର ଅଧିନାୟକ ଦାୟିତ୍ବ ସମ୍ଭାଳିଥିଲେ ।

Also Read : ଅଷ୍ଟ୍ରେଲିଆକୁ ୪ ଓ୍ବିକେଟରେ ପରାସ୍ତ କରି ଫାଇନାଲରେ ପ୍ରବେଶ କଲା ଭାରତ , ୨୦୨୩ ବିଶ୍ବକପ ପରାଜୟର ପ୍ରତିଶୋଧ ନେଲା