ଓଭାଲ୍ ଟେଷ୍ଟରେ ଲଢେଇ କରି ହାରିଲା ଟିମ୍ ଇଣ୍ଡିଆ । ୧୧୮ ରନରେ ମ୍ୟାଚ ଜିତିବା ସହ ସିରିଜକୁ ୪-୧ରେ କବଜାରେ କଲା ଇଂଲଣ୍ଡ । ୪୬୪ ରନରେ ବିଶାଳ ଲକ୍ଷ୍ୟ ଅସମ୍ଭବ ମନେ ହେଉଥିଲେ ବି ବିଜୟ ଆଶା ସଞ୍ଚାର କରିଥିଲେ ଲୋକେଶ ରାହୁଲ ଓ ଋଷଭ ପନ୍ଥ । ଦୁହେଁ ଶତକୀୟ ଇନିଂସ ଖେଳିଲେ । ୨ ଶହ ରନରୁ ଅଧିକ ଭାଗିଦାରୀ କରି ଓ୍ବିକେଟ୍ ଭପରେ ବେଶ କିଛି ଘଣ୍ଟା ଇଂଲଣ୍ଡ ବୋଲରଙ୍କୁ ନାକେଦମ୍ ବି କଲେ । ମ୍ୟାଚ୍ ବଞ୍ଚାଇବାକୁ ଖୁବ୍ ସଂଘର୍ଷ ବି କରିଥିଲେ । ବିରାଟ ବାହିନୀର ପ୍ରାଣମୂର୍ଚ୍ଛା ଉଦ୍ୟମ କିନ୍ତୁ ଯଥେଷ୍ଟ ହେଲାନି । ଟାର୍ଗେଟରେ ପହଞ୍ଚିବା ଆଗରୁ ଅଟକାଇବାରେ ସଫଳ ହୋଇଥିଲେ ଇଂଲିଶ ଧୁରନ୍ଧର । ନିଜ ମାଟିରେ ହିରୋ ଟିମ୍ ଇଣ୍ଡିଆର ବିଦେଶ ମାଟିରେ ଫ୍ଲପ୍ ସୋକୁ ନେଇ ଏବେ ଅନେକ ପ୍ରଶ୍ନବାଚୀ । କ୍ରିକେଟ ପ୍ରେମୀଙ୍କ ମନରେ ଗୋଟିଏ ପ୍ରଶ୍ନ ଉଙ୍କି ମାରୁଛି ଏମିତି ବିପର୍ଯ୍ୟୟ କାହିଁକି ? କିନ୍ତୁ ଗୋଟିଏ କଥା ସ୍ପଷ୍ଟ ଯେ କ୍ରିକେଟ ହେଉଛି ଟିମ୍ ଗେମ୍ । କେବଳ ଜଣେ କି ଦୁଇଜଣ ଖେଳାଳି ଭଲ ପ୍ରଦର୍ଶନ କରିଲେ ଚଳିବ ନାହିଁ ।
୧. ଦଳଗତ ବିଫଳତା
ବିରାଟ କୋହଲି ଏହି ସିରିଜରେ ୫୯୩ ରନ୍ କରିବା ସହ ପ୍ଲେୟାର ଅଫ୍ ଦି ସିରିଜ ବିବେଚିତ ହେଇଛନ୍ତି । କିନ୍ତୁ ଦଳକୁ ସିରିଜ୍ ହାରିବାରୁ ରକ୍ଷା କରି ପାରିଲେ ନାହିଁ । ସେପଟେ ଇଂଲଣ୍ଡ କଥା ଯଦି ଦେଖିବା, କୌଣସି ଖେଳାଳି କୋହଲିଙ୍କ ଭଳି ବିରାଟ ସ୍କୋର କରି ପାରି ନାହାନ୍ତି । କିନ୍ତୁ ସିରିଜ କବଜା କରି ପାରିଲେ କେବଳ ଦଳଗତ ପ୍ରଦର୍ଶନ ପାଇଁ। କିନ୍ତୁ ଭାରତୀୟ ବ୍ଯାଟସମ୍ଯାନଙ୍କ ପ୍ରଦର୍ଶନ ସେମିତି ପ୍ରଭାବଶାଳୀ ନଥିଲା । ସେହିପରି ବୋଲରମାନେ ମଧ୍ୟ ଠିକଣା ସମୟରେ ଓ୍ବିକେଟ୍ ନେବାରେ ବିଫଳ ହୋଇଛନ୍ତି । ପୂରା ସିରିଜରେ ପ୍ରଥମରୁ ଇଂଲଣ୍ଡ ଦଳ ଟିମ୍ ଇଣ୍ଡିଆର ଓ୍ବିକେଟ୍ ଖସାଇବାରେ ସଫଳ ହୋଇଥିଲେ । ଯେଉଁଠି ଫ୍ଲପ୍ ମାରିଥିଲା ଭାରତୀୟ ବୋଲିଂ ।
୨. ସାମ୍ କୁରେନ୍, କ୍ରିସ୍ ଓକ୍ସ ଫ୍ଯାକ୍ଟର
ବିର୍ମିଂହମରେ ସାମ୍ କୁରେନ୍ ଟିମ୍ ଇଣ୍ଡିଆର ଟେନସନ୍ ହୋଇଥିଲେ । ୬୩ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ । ଲର୍ଡସରେ କ୍ରିସ୍ ଓକ୍ସ ସାତ ନମ୍ବରରେ ବ୍ୟାଟିଂ କରିବାକୁ ଆସି ଭାରତୀୟ ବୋଲରଙ୍କୁ ନିର୍ଧୁମ ଛେଚିଲେ ଓ କ୍ୟାରିୟରର ପ୍ରଥମ ଶତକ ହାସଲ କରିବା ସହ ଭାରତର ବିଜୟରେ କଣ୍ଟା ହୋଇଥିଲେ । ଆଉ ସାଉଥମ୍ପଟନରେ ପୁଣି ଥରେ ଲର୍ଡସ୍ ସ୍କ୍ରିପ୍ଟକୁ ଦୋହରାଇଲେ କୁରେନ୍ । ପ୍ରଥମ ଇନିଂସରେ ୭୮ ଓ ଦ୍ବିତୀୟ ଇନିଂସରେ ୪୭ ରନ୍ ବଳରେ ଭଲ ସ୍କୋର କରିଥିଲା ଇଂଲଣ୍ଡ । ୬୦ ରନରେ ଚତୁର୍ଥ ଟେଷ୍ଟରେ ବିଜୟୀ ହୋଇଥିଲା । ଆଶା କରାଯାଉଥିଲା ଓଭାଲ୍ ମ୍ୟାଚ୍ ଜିତି ଭାରତ ନିଜ ଇଜ୍ଜତ ରକ୍ଷା କରିବ । ତାହା ବି ହେଲାନି । ବାରମ୍ବାର ବିଫଳତାର ବୁଢିଆଣୀ ଜାଲ ଭିତରେ ଛନ୍ଦି ହୋଇଗଲା ବିରାଟ ବ୍ରିଗେଡ୍ । ଘରୋଇ ଦଳ ହାତକୁ ସିରିଜ୍ ଟେକି ଦେଲା ।
୩. ଠିକଣା ସମୟରେ ବ୍ୟାଟିଂ ଓ ବୋଲିଂ ଫ୍ଲପ୍
ଓଭାଲରେ ପ୍ରଥମ ଇନିଂସରେ ଇଂଲଣ୍ଡ ୧୮୧ ରନରେ ୭ଟି ଓ୍ବିକେଟ୍ ହରାଇ ସଙ୍କଟରେ ପଡ଼ିଥିଲା । ଏଭଳି ସମୟରେ ଭାରତୀୟ ବୋଲର୍ ଏମିତି ଦିଶାହୀନ ବୋଲିଂ କଲେ ଯେ ଇଂଲଣ୍ଡର ଶେଷ ୩ ଜଣ ବ୍ୟାଟ୍ସମ୍ୟାନ୍ ୧୫୧ ରନ୍ ଯୋଡ଼ି ଦଳୀୟ ସ୍କୋରକୁ ପହଞ୍ଚାଇ ଦେଲେ ୩୩୨ରେ । ତେବେ ରବୀନ୍ଦ୍ର ଜାଡେଜା ଓ ହନୁମା ବିହାରୀଙ୍କ ଯୋଗୁଁ ଭାରତ ପ୍ରଥମ ପାଳିରେ ୨୯୨ ରନ୍ କରି ପାରିଥିଲା । ସେପଟେ ଦ୍ବିତୀୟ ଇନିଂସରେ ଆଲିଷ୍ଟର କୁକ୍ ଓ ଜୋ ରୁଟଙ୍କୁ ଅଟକାଇବାରେ ସଂପୂର୍ଣ୍ଣ ଫେଲ୍ ମାରିଥିଲେ ଭାରତୀୟ ବୋଲର । ଯାହା ଫଳରେ କୁକ୍ ଓ ରୁଟ୍ ଶତକ ହାସଲ କଲେ । ଏହାସହ ଭାରତ ଆଗରେ ୪୬୪ ରନର ପାହାଡ଼ ଠିଆ କରିଥିଲା ଇଂଲିଶ ଦଳ ।
୪. ଓଭାଲରେ ମୌନ ରହିଲା ଶିଖର–ପୂଜାରା–ବିରାଟ ବ୍ୟାଟ୍
ଓଭାଲରେ ୪୬୪ ରନ୍ ଟାର୍ଗେଟ୍ ଥିଲା । ଅନ୍ତତଃ ବିଜୟ ନହେଲେ ବି ମ୍ୟାଚ୍ ଡ୍ର ରଖିବା ଲକ୍ଷ୍ୟରେ ଖେଳିବାର ଥିଲା ଭାରତୀୟ ଦଳକୁ । କିନ୍ତୁ ପଡ଼ିଆକୁ ଓହ୍ଲାଇଥିବା ଟିମ୍ ଇଣ୍ଡିଆର ଟପ୍ ଅର୍ଡର୍ ପ୍ରଥମରୁ ଇଂଲଣ୍ଡ ବୋଲରଙ୍କ ଆଗରେ ଆତ୍ମସମର୍ପଣ କରି ଦେଇଥିଲେ । ଦଳୀୟ ସ୍କୋର ୨ ରନ୍ ବେଳେ ପାଭିଲନ୍ ଫେରିଥିଲେ ଶିଖର ଧଓ୍ବନ (୧) ଓ ଚେତେଶ୍ବର ପୂଜାରା (୦) । ଏହାପରେ ଖାତା ଖୋଲିବା ଆଗରୁ ବିରାଟ କୋହଲି (୦)ଙ୍କୁ ଆଉଟ୍ କରିଥିଲେ ଷ୍ଟୁଆର୍ଟ ବ୍ରଡ୍ । ଏହି ତିନି ଜଣ ଖେଳାଳିଙ୍କର ନୈରାଶ୍ୟଜନକ ପ୍ରଦର୍ଶନ ଓଭାଲ୍ ପରାଜୟର ଆଉ ଏକ ପ୍ରମୁଖ କାରଣ । ଏଭଳି ସ୍ଥିତିରେ ଦଳ ପାଇଁ ସଂକଟ ମୋଚନ ସାଜିଥିଲେ ଲୋକେଶ ରାହୁଲ ଓ ଆଜିଙ୍କ୍ଯ ରାହାଣେ । ଲଢିଥିଲେ, ରନ୍ ପାଇଁ ବେଶ ସଂଘର୍ଷ ବି କରିଥିଲେ । ଶେଷ ଭାଗରେ ଚମତ୍କାର ଶତକୀୟ ଇନିଂସ ଖେଳି ସମସ୍ତଙ୍କୁ ଚମକେଇ ଦେଇଥିଲେ ଋଷଭ ପନ୍ଥ । କିନ୍ତୁ ତାହା ମ୍ୟାଚ୍ ବଞ୍ଚାଇବାରେ ସମର୍ଥ ହେଲା ନାହିଁ । ପୁଣିଥରେ ପରାଜୟର ମୁହଁ ଦେଖିଲା ଟିମ୍ ଇଣ୍ଡିଆ । ଇଂଲଣ୍ଡ ମାଟିରେ ଭାରତର ବଡ଼ ପରାଜୟ ଧାରା ଜାରି ରହିଲା ।
ଦଳରେ ଯୁବ ଓ ଦକ୍ଷ ଖେଳାଳି ଥିଲେ । ହେଲେ ସେମାନେ ଠିକଣା ସମୟରେ ଠିକଣା ଭାବେ ମୁକାବିଲା କରି ପାରିଲେ ନାହିଁ । ଯାହା ମୁଖ୍ୟ କୋଚ୍ ରବି ଶାସ୍ତ୍ରୀ କହିଥିଲେ, ଆମ ଖେଳାଳି ବିଶେଷ କରି ବ୍ୟାଟ୍ସମ୍ୟାନମାନେ ମାନସିକ ଭାବେ ଇଂଲଣ୍ଡ ବୋଲରଙ୍କ ମୁକାବିଲା କରି ପାରିଲେ ନାହିଁ । ନିଜକୁ ପରିବେଶ ଓ ପରିସ୍ଥିତି ସହ ଖାପଖୁଆଇ ନେଇଥିଲେ ସିରିଜର ଫଳାଫଳ ଅଲଗା ହୋଇଥାନ୍ତା । ୩ୟ ଟେଷ୍ଟ ଭଳି ଆକ୍ରମଣାତ୍ମକ ଆଭିମୁଖ୍ୟ ଦେଖାଇବାର ଥିଲା । ଅଧିନାୟକ ବିରାଟ କୋହଲି କହିଛନ୍ତି, ଆମେ ବିପକ୍ଷ ଉପରେ ଚାପ ପକାଇ ଖେଳିବା ବେଳେ ତାକୁ ଆଗକୁ ବଜାୟ ରଖିବା ଦରକାର । ଗୁରୁତ୍ବପୂର୍ଣ୍ଣ ସମୟରେ ଆମେ ଏଭଳି ଖେଳି ନପାରିବା ଯାଏ ବିଦେଶ ମାଟିରେ ଜିତିବା ଅସମ୍ଭବ ।
ଏବେ କ’ଣ ହେବ ?
ଏବେ ବିରାଟ ସେନାର ଅସଲ ପରୀକ୍ଷା ହେବ କଙ୍ଗାରୁ ମାଟିରେ । କାରଣ ଏସିଆ କପ୍ ପରେ ଆଗକୁ ଅଷ୍ଟ୍ରେଲିଆ ସିରିଜ୍ । ବ୍ୟାଟ୍ସମ୍ୟାନ୍ ଭାବରେ ବିରାଟ କୋହଲି ଆଶାଠାରୁ ଢେର ଅଧିକ ପ୍ରଦର୍ଶନ କରୁଛନ୍ତି । କିନ୍ତୁ ଜଣେ ଅଧିନାୟକ ଭାବେ ଆହୁରି ପରିପକ୍ବ ହେବା ଦରକାର । ତା ସହିତ ତାଙ୍କ ସିପାହୀମାନେ ମଧ୍ୟ ନିଜ ଦାୟିତ୍ବ ଠିକଣା ଭାବେ ସମ୍ଭାଳିବା ନିହାତି ଜରୁରୀ । ନଚେତ ଇଂଲଣ୍ଡ ଭଳି ସିରିଜ୍ ସବୁ ହାତଛଡ଼ା ହେବ । ଏଇ ଭୁଲରୁ ଶିକ୍ଷା କରି ଆଗକୁ ଅଷ୍ଟ୍ରେଲିଆରେ କୋହଲି ବାହିନୀଠାରୁ ବିରାଟ ବିଜୟ ଆଶା କରାଯାଉଛି । ଅବଶ୍ୟ ଇଂଲଣ୍ଡ ଠାରୁ ସିରିଜ୍ ହାରିବା ସତ୍ତ୍ବେ ଆଇସିସି ଟେଷ୍ଟ ମାନ୍ୟତାରେ ଏବେବି ଏକ ନମ୍ବର ସ୍ଥାନ ବଜାୟ ରଖିଛି ଟିମ୍ ଇଣ୍ଡିଆ । ତେବେ ଏହି ସିରିଜରୁ କିଛି ସକାରାତ୍ମକ ସଫଳତା ମିଳିଛି । ଯାହାକୁ ଆଗାମୀ ସମୟରେ ଦଳ କାମରେ ଲଗାଇବା ଉଚିତ ।
କିଛି ରେକର୍ଡ଼
–ଗତ ୭ ବର୍ଷ ଭିତରେ ଇଂଲଣ୍ଡ ମାଟିରେ ଏହା ହେଉଛି ଭାରତର ୧୧ତମ ଟେଷ୍ଟ ପରାଜୟ ।
–ଭାରତ ବିପକ୍ଷରେ ଇଂଲଣ୍ଡ ୨୦୧୧ରେ ୪–୦ ଓ ୨୦୧୪ରେ ୩–୧ରେ ସିରିଜ ବିଜୟୀ ହୋଇଥିଲା ।
–ସର୍ବାଧିକ ଓ୍ବିକେଟ୍ (୫୬୪) ନେବାରେ ଦ୍ରୁତତମ ବୋଲର୍ ଜେମ୍ସ ଆଣ୍ଡରସନ୍ । ଅଷ୍ଟ୍ରେଲିଆର ଗ୍ଲେନ୍ ମ୍ୟାକଗ୍ରା (୫୬୩)ଙ୍କୁ ପଛରେ ଛାଡିଛନ୍ତି ।
–ଋଷଭ ପନ୍ଥଙ୍କର ପ୍ରଥମ ଟେଷ୍ଟ ଶତକ (୧୧୪ରନ୍) ।
-କପିଲ୍, ଇରଫାନ୍ ଓ ହରଭଜନଙ୍କ କ୍ଲବରେ ଋଷଭ ପନ୍ଥ ସାମିଲ । ସେମାନଙ୍କ ଭଳି ଛକା ମାରି ପ୍ରଥମ ଟେଷ୍ଟ ଶତକ ପୂରଣ କରିଥିଲେ । ସେହିପରି ପ୍ରଥମ ଅନ୍ତର୍ଜାତୀୟ ମ୍ୟାଚରେ ଛକା ମାରି ଖାତା ଖୋଲିଥିଲେ ଋଷଭ ।
-SENA (ସାଉଥ୍ ଆଫ୍ରିକା–ଇଂଲଣ୍ଡ–ନ୍ୟୁଜିଲାଣ୍ଡ–ଅଷ୍ଟ୍ରେଲିଆ) ଦେଶରେ ଶତକ ହାସଲ କରିଥିବା ପ୍ରଥମ ଭାରତୀୟ ଓ୍ବିକେଟ୍ କିପର୍ ଋଷଭ ପନ୍ଥ । ପୂର୍ବରୁ ଧୋନି ଇଂଲଣ୍ଡ ବିପକ୍ଷରେ ଓଭାଲରେ ସର୍ବାଧିକ ୯୦ ରନ୍ କରିଥିଲେ ।
–ଦୁଇ ବର୍ଷ ପରେ ଲୋକେଶ ରାହୁଲଙ୍କ ଟେଷ୍ଟ ଶତକ । ୨୦୧୬ରେ ଶେଷ ଥର ଚେନ୍ନାଇରେ ଇଂଲଣ୍ଡ ବିପକ୍ଷ ଟେଷ୍ଟରେ ୧୯୯ ରନ୍ କରିଥିଲେ ।
–ସାମ୍ କୁରେନ (୨୭୨ ରନ୍ ଓ ୧୧ ଓ୍ବିକେଟ୍) ଗୋଟିଏ ସିରିଜରେ ୨୫୦ରୁ ଅଧିକ ରନ୍ ଓ ୧୦ରୁ ଅଧିକ ଓ୍ବିକେଟ୍ ନେବାରେ ସବୁଠୁ କମ୍ ବୟସ୍କ ଦ୍ବିତୀୟ କ୍ରିକେଟର । ସିରିଜ୍ ଆରମ୍ଭରେ ତାଙ୍କ ବୟସ ଥିଲା ୨୦ବର୍ଷ ୫୯ ଦିନ । ଏହି ରେକର୍ଡ ରହିଛି କପିଲ୍ ଦେବଙ୍କ ନାଁରେ । ୧୯୭୭–୭୮ରେ ଓ୍ବେଷ୍ଟଇଣ୍ଡିଜ ବିପକ୍ଷରେ କପିଲ୍ ୩୨୯ ରନ୍ ଓ ୧୭ ଓ୍ବିକେଟ୍ ନେଇଥିଲେ । ସେତେବେଳେ ସିରିଜ୍ ଆରମ୍ଭରେ ତାଙ୍କ ବୟସ ଥିଲା ୧୯ବର୍ଷ ୩୨୯ ଦିନ ।