ସ୍ୱାଭାବିକ ହେଲା ଆମ୍ୱୁଲାନ୍ସ ସେବା, ଅନରୋଡ୍ ମୋଡ୍ରେ ଗଡ଼ିବ ୧୦୮
ଭୁବନେଶ୍ୱର : ସ୍ୱାଭାବିକ ହେଲା ୧୦୮ ଆମ୍ୱୁଲାନ୍ସ ସେବା । ଏନେଇ ଗୁରୁବାର ୧୦୮ କର୍ମଚାରୀ ମହାସଂଘ ସୂଚନା ଦେଇଛି । ବର୍ତ୍ତମାନ ଅନରୋଡ୍ ମୋଡ୍ରେ ଗାଡ଼ି ଗଡ଼ିବ । ୧୦ ଦଫା ଦାବି ନେଇ ସାରା ରାଜ୍ୟରେ ଆନ୍ଦୋଳନ କରିଥିଲେ ଆମ୍ବୁଲାନ୍ସ କର୍ମଚାରୀ । ସେବା ପ୍ରଦାନକାରୀ କମ୍ପାନୀ ଓ କର୍ମଚାରୀଙ୍କ ବିବାଦ ଯୋଗୁ ସେବା ବ୍ୟାହତ ହୋଇଥିଲା । ନାହିଁନଥିବା ଅସୁବିଧାର ସମ୍ମୁଖୀନ ହେଇଥିଲେ ରୋଗୀ । ଏନେଇ କର୍ତ୍ତୃପକ୍ଷ କହିଛନ୍ତି ନିୟମ ଅନୁସାରେ ଅନରୋଡରେ ଗାଡ଼ି ନଚଳାଇଲେ କାର୍ଯ୍ୟାନୁଷ୍ଠାନ ହେବ ।
ସୂଚନା ଅନୁସାରେ ୧୦୮ ଆମ୍ବୁଲାନ୍ସ ପରିଚାଳନା କରୁଥିବା କମ୍ପାନୀ ସରକାରଙ୍କ ନିର୍ଦ୍ଧାରିତ ନିୟମ ଅନୁସାରେ ଦରମା ଦେଉଥିବା କର୍ମଚାରୀ ଅଭିଯୋଗ କରିଥିଲେ । ଏହାସହ ବିନା କାରଣରେ ଛଟେଇ କରାଯାଇଥିବା ୯୪ କର୍ମଚାରୀଙ୍କୁ ପୁନର୍ନିଯୁକ୍ତି, ଗ୍ରାଚୁଇଟି ସହ ୫ ତାରିଖ ଭିତରେ ଦରମା, ୧୨ ଘଣ୍ଟା କାମ ପାଇଁ ୧୨ ଘଣ୍ଟାର ଦରମା ଭଳି ବିଭିନ୍ନ ଦାବି ରହିଥିଲା । ଦାବିପୂରଣ ନହେବା ଯାଏ ଆନ୍ଦୋଳନ ଚାଲିବ ବୋଲି ଚେତାବନୀ ଦେଇଥିଲା ସଂଘ ।
ଅନ୍ୟପଟେ ସମସ୍ତ କର୍ମଚାରୀ ଆମ୍ବୁଲାନ୍ସର ଜିପିଏସ୍ ବନ୍ଦ କରି ଅଫଲାଇନରେ ସେବା ଯୋଗାଉଥିବା କହିଛନ୍ତି । ସେପଟେ ପରିଚାଳନା ଦାୟିତ୍ବ ନେଇଥିବା ଜିଭିକେ ସଂସ୍ଥା ମୁଖ୍ୟ କହିଛନ୍ତି ବୈଷୟିକ ସମସ୍ୟା ପାଇଁ ଦରମା ଦେବାରେ ବିଳମ୍ବ ହୋଇଥିଲା। ସମସ୍ୟା ସମାଧାନ ପରେ ଦରମା ପ୍ରଦାନ କରାଯାଇଛି ।