ହାତୀ ପଲ ଭାଙ୍ଗିଲେ କାନ୍ଥ; ଆଈ,ନାତୁଣୀ ଗୁରୁତର
କେନ୍ଦୁଝର: କେନ୍ଦୁଝରରେ ହାତୀ ଆତଙ୍କ । ବିଳମ୍ବିତ ରାତିରେ କାନ୍ଥ ଭାଙ୍ଗିଲେ ହାତୀ । କାନ୍ଥପଡ଼ି ଆଈ ନାତୁଣୀ ଗୁରୁତର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି । ସଦର ରେଞ୍ଜର କୁସୁମିତା ଗାଁ ନିକଟରେ ଘଟିଛି ଘଟଣା । କିଛି ଦିନ ହେବ ୨୫ ଟିକିଆ ବଣୁଆ ହାତୀ ପଲ ଏହି ଗାଁରେ ଡେରା ପକାଇଛନ୍ତି । ଖାଦ୍ୟ ଅନ୍ବେଷଣ ନେଇ ଗତକାଲି କାନଗାଁରେ ହାତୀ ପଶି ୪ଟି ଘର ଭାଙ୍ଗି ଦେଇଥିଲେ । ଆଈ ନାତୁଣୀଙ୍କ ଉପରେ କାନ୍ଥ ପଡ଼ିବାରୁ ଗୁରୁତର ହୋଇପଡ଼ିଥିଲେ । ଘଟଣାର ଖବର ପାଇ ଘଟଣାସ୍ଥଳରେ ବନ ବିଭାଗ କର୍ମଚାରୀ ପହଞ୍ଚି ହାତୀଙ୍କୁ ଘଉଡାଇବା ସହ ଗୁରୁତର ଆଈ ନାତୁଣୀଙ୍କୁ ଚିକିତ୍ସା ପାଇଁ ଡାକ୍ତରଖାନା ସ୍ଥାନାନ୍ତର କରାଯାଇଛି।
ସୂଚନାଯୋଗ୍ୟ, କିଛିଦିନ ହେବ ରାଜ୍ୟରେ ବିଭିନ୍ନ ସ୍ଥାନରେ ହାତୀ ପଲ ଲୋକଙ୍କ ନିଦ ହଜାଇ ଦେଇଛନ୍ତି। କେତେବେଳେ ରାତି ଅଧରେ ଗାଁରେ ପଶି ଘର ଭାଙ୍ଗୁଛନ୍ତି ତ ଆଉ କେତେବେଳେ ଫସଲ ନଷ୍ଟ କରୁଛନ୍ତି। ବନ ବିଭାଗ କର୍ମଚାରୀ ହାତୀଙ୍କୁ ଘଉଡ଼ାଇବାକୁ ଉଦ୍ୟମ ଜାରି ରଖିଥିଲେ ମଧ୍ୟ ହାତୀ ପଲ ଗାଁରେ ପଶି ଉତ୍ପାତ ମଞ୍ଚାଉଛନ୍ତି। ଫଳରେ ସ୍ଥାନୀୟ ଲୋକେ ଭୟବୀତ ଅବସ୍ଥାରେ ରହୁଛନ୍ତି।
