ଭୁବନେଶ୍ୱର (କେ ନ୍ୟୁଜ୍) : ଚେନ୍ନାଇର ସତ୍ୟଭାମା ବିଶ୍ୱବିଦ୍ୟାଳୟ ଓ ଭୁବନେଶ୍ୱର ସି.ଭି.ରମଣ କଲେଜରେ ମାନବ ସମ୍ବଳ ବିକାଶ ମନ୍ତ୍ରାଳୟ ଓ ଏଆଇସିଟିଇ ପକ୍ଷରୁ ଆୟୋଜିତ ଜାତୀୟ ଡିଜିଟାଲ ପ୍ରତିଯୋଗିତା ସ୍ମାର୍ଟ ଇଣ୍ଡିଆ ହାକାଥନ୍-୨୦୧୯ରେ କିଟ୍ ବିଶ୍ୱବିଦ୍ୟାଳୟର ଦୁଇଟି ଟିମ୍ ବିଜୟୀ ହୋଇଛନ୍ତି । ଚେନ୍ନାଇରେ ଅନୁଷ୍ଠିତ ହାକାଥନ୍ରେ କଂପ୍ୟୁଟର ସାଇନ୍ସ ବିଭାଗର ଛାତ୍ର ଶୁଭମ୍ କୁମାର ସାହୁଙ୍କ ନେତୃତ୍ୱରେ ରାଜ ବାବୁ ଦାସ, ଏକତା ପ୍ରକାଶ, ଶୁଭଶ୍ରୀ ଦାସ, ସ୍ମିତି ଓଝା ଏବଂ ଶ୍ରୀଜନ ବାସୁଙ୍କ ଟିମ୍-ଦି ଫୋନିକ୍ସ ଟେକ୍ -ଶ୍ରମିକମାନଙ୍କ ପାଇଁ ଅଭିଯୋଗ ପଞ୍ଜିକରଣ ପୋର୍ଟାଲ ତିଆରି କରି ବିଜୟୀ ହୋଇଛନ୍ତି । ସେମାନଙ୍କୁ ସାର୍ଟିଫିକେଟ୍ ଓ ପୁରସ୍କାର ବାବଦରେ ୧ଲକ୍ଷ ଟଙ୍କା ନଗଦ ଅର୍ଥରାଶି ପ୍ରଦାନ କରାଯାଇଛି ।
ସେହିପରି ସିଭି ରମଣ କଲେଜରେ ଅନୁଷ୍ଠିତ ହାକାଥନ୍ ପ୍ରତିଯୋଗିତାରେ କମ୍ପ୍ୟୁଟର ସାଇନ୍ସ ବିଭାଗର ଅନ୍ୟ ଏକ ଦଳ ଶୁଭମ୍ କୁମାର ଦାସଙ୍କ ନେତୃତ୍ୱରେ ସମରେନ୍ଦୁ ଚନ୍ଦନ ଦାସ, ସିଦ୍ଧାର୍ଥ ମହାପାତ୍ର, ଶୈଳେଶ ଦ୍ୱିବେଦୀ, ଶ୍ୱେତା ପତି ଏବଂ ସୌରଭ ପଟ୍ଟନାୟକଙ୍କ ଟିମ୍- ଗ୍ରାଟିଏଁଟ୍ସ -ବଡ ବଡ ସହରରେ ବିଭିନ୍ନ ଅଞ୍ଚଳରେ ଯାତାୟାତ କରୁଥିବା ଲୋକଙ୍କ ସଂଖ୍ୟାକୁ ଦୃଷ୍ଟିରେ ରଖି କିପରି ପରିବହନ ବ୍ୟବସ୍ଥା ବ୍ୟବସ୍ଥିତ ଓ ଶୃଙ୍ଖଳିତ କରାଯାଇପାରିବ ତାହାର ସମସ୍ୟା ସମାଧାନ ପାଇଁ ଏକ ସଫଟୱେୟାର ପ୍ରସ୍ତୁତ କରିବାରେ ସଫଳତା ହେବା ସହ ପୁରସ୍କୃତ ହୋଇଛନ୍ତି। ସେମାନଙ୍କୁ ପୁରସ୍କାର ବାବଦରେ ସାର୍ଟିଫିକେଟ୍ ଓ ନଗଦ ୭୫ହଜାର ଟଙ୍କା ଅର୍ଥ ରାଶି ପ୍ରଦାନ କରାଯାଇଛି। ଉଭୟ ଦଳର ସଫଳତାରେ କିଟ୍,କିସ୍ ଓ କିମ୍ସର ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ ସମସ୍ତ ପ୍ରତିଯୋଗୀଙ୍କୁ ଶୁଭେଚ୍ଛା ଜଣାଇଛନ୍ତି। କିଟ୍ର ବିଭିନ୍ନ ବିଭାଗରେ ଛାତ୍ରଛାତ୍ରୀ ଜାତୀୟ ସ୍ତରରେ ଅନୁଷ୍ଠିତ ପ୍ରତିଯୋଗିତାରେ ଶ୍ରେଷ୍ଠତ୍ୱ ପ୍ରତିପାଦନ କରି ଆସୁଛନ୍ତି ବୋଲି ଡକ୍ଟର ଅଚ୍ୟୁତ ସାମନ୍ତ କହିଛନ୍ତି। କିଟ୍ର ଗୁଣାତ୍ମକ ଶିକ୍ଷାଦାନ ଓ ଅଭିଜ୍ଞ ଅଧ୍ୟାପକ- ଅଧ୍ୟାପିକାଙ୍କ ମାର୍ଗଦର୍ଶନ ପିଲାଙ୍କୁ ଏହି ସଫଳତା ଆଣିବାରେ ସହାୟକ ହେଉଛି।.