୧୨ ଟି ଚୋରା ଗାଡି ଜବତ, ଚୋର ଗ୍ୟାଙ୍ଗର ୨ ଗିରଫ
ଭଦ୍ରକ : ଭଦ୍ରକ ଟାଉନ ପୋଲିସ ଦ୍ୱାରା ୧୨ ଟି ଚୋରା ଗାଡି ଜବତ । ଚୋରିରେ ସମ୍ପୃକ୍ତ ୨ ଜଣଙ୍କୁ ଗିରଫ କରିଛି ଭଦ୍ରକ ଟାଉନ ପୋଲିସ । ବିଭିନ୍ନ ସ୍ଥାନରେ ମୋଟର ସାଇକେଲ ଚୋରିରେ ସମ୍ପୃକ୍ତ ଥିଲେ ଦୁଇ ଅଭିଯୁକ୍ତ । ଗିରଫ ଅଭିଯୁକ୍ତ ହେଲେ ଧାମନଗର ଓ ତିହିଡି ଥାନା ଅଂଚଳର ଓମ ପ୍ରକାଶ ରାଉତ ଓ ରବି ନାରାୟଣ ଜେନା ।
ଏହି ଦୁଇ ଜଣ ଯୁବକ ବିଭିନ୍ନ ସମୟରେ ଲୋକଙ୍କ ଅନୁପସ୍ଥିତିର ସୁଯୋଗ ନେଇ ବିଭିନ୍ନ ଜନଗହଳି ପୂର୍ଣ୍ଣ ସ୍ଥାନମାନଙ୍କରୁ ଦୁଇ ଚକିଆ ଯାନଗୁଡିକୁ ଦିନ ହେଉ ଅବା ରାତିରେ ଚୋରି କରି ନେଇ ଯାଉଥିଲେ । ତେବେ ଏ ସମ୍ପର୍କରେ ଭଦ୍ରକ ଟାଉନ ପୋଲିସ ପାଖରେ ଅଭିଯୋଗ ହେବା ପରେ ପୋଲିସ ପକ୍ଷରୁ ଏହି ମୋଟର ସାଇକେଲ ଚୋରଙ୍କୁ ଧରିବା ପାଇଁ ଉଦ୍ୟମ କରାଯାଉଥିବା ବେଳେ ଗତ ରାତିରେ ଏହି ଦୁଇ ଜଣଙ୍କୁ ପୋଲିସ ଧରିବାର ହୋଇଛି ।
ପରେ ସେମାନେ ବିଭିନ୍ନ ସ୍ଥାନରେ ଯେଉଁ ସବୁ ଚୋରା ମୋଟର ସାଇକେଲ ରଖିଥିଲେ ସେଗୁଡିକୁ ମଧ୍ୟ ପୋଲିସ ଜବତ କରିଛି । ଏ ସମ୍ପର୍କରେ ଅଧିକ ଅନୁସନ୍ଧାନ ଚାଲିଛି ବୋଲି ଭଦ୍ରକ ଟାଉନ ଥାନା ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସିଟି ଡିଏସପି ଅଂଶୁମାନ ଦିବେଦୀ କହିଛନ୍ତି । ଏହି ସାମ୍ବାଦିକ ସମ୍ମିଳନୀରେ ଭଦ୍ରକ ଟାଉନ ଥାନା ଇନ୍ସପେକ୍ଟର ଅଜୟ ସୁଦର୍ଶନ ବାଗେଙ୍କ ସହିତ ଟାଉନ ପୋଲିସର ଅଧିକାରୀମାନେ ଯୋଗ ଦେଇଥିଲେ ।
