ହୋଇ ପାରିଲାନି ବୁଧେଇ ଓଷା, ବିଦ୍ୟୁତ ଆଘାତରେ ଚାଲିଗଲା ଦୁଇ ଯାଆଙ୍କ ଜୀବନ

ଭୁବନେଶ୍ବର (କେନ୍ୟୁଜ୍) : ଦୁଇ ଯା’ଙ୍କର ହୋଇ ପାରିଲାନି ବୁଧେଇ ଓଷା । ପିଲାଏ ବି ମା ହାତରୁ ପିଠା ଖାଇ ପାରିଲେନି । ଅକାଳରେ ଚାଲିଗଲା ଜୀବନ । ବିଦ୍ୟୁତ୍ ଆଘାତରେ ଦୁଇ ଜଣ ମହିଳା ପ୍ରାଣ ହରାଇଛନ୍ତି । ଆଜି ଅପରାହ୍ନରେ ଭୁବନେଶ୍ବର ୟୁନିଟ୍-୯ ଫ୍ଲାଟ୍ ବାୟାବାବା ମଠ ନିକଟରେ ଘଟିଛି ଏହି ଘଟଣା । ଜ୍ୟୋତ୍ସାରାଣୀ ନାମ୍ନୀ ମହିଳା ଜଣକ ଘର ପାଖରେ ଲୁଗା ଶୁଖାଇବାକୁ ଯାଇ ବିଦ୍ୟୁତ ଆଘାତର ଶିକାର ହୋଇଥିଲେ । ତାଙ୍କର ଘଟଣା ସ୍ଥଳରେ ମୃତ୍ୟୁ ଘଟିଥିଲା । ଏକଥା ଜାଣି ନପାରି ତାଙ୍କ ବଡ଼ ଯାଆ ପ୍ରତିମା ବେହେରା ଜ୍ୟୋତ୍ସାରାଣୀଙ୍କୁ ତଳେ ପଡ଼ି ଯାଇଥିବା ଭାବି ଉଠାଇବା ବେଳେ ସେ ମଧ୍ୟ ବିଦ୍ୟୁତ ଆଘାତର ଶିକାର ହୋଇ ସେହିଠାରେ ମୃତ୍ୟୁ ବରଣ କରିଥିଲେ ।

ସେପଟେ ପଡ଼ିଶା ଘରର ମହିଳା ଜଣକ ବୁଧେଇ ଓଷା କରିବା ଲାଗି ସେମାନଙ୍କ ଡାକିବାକୁ ଯାଇ ଦେଖିଲା ବେଳକୁ ଦୁଇ ଯାଆ ତଳେ ପଡ଼ିଥିଲେ । ଏହା ପରେ ଘର ଲୋକ ଖବର ପାଇଥିଲେ । ୟୁନିଟ୍-୯ ସ୍ଥିତ ଘରେ ତିନି ଭାଇ ରହୁଥିଲେ । ଏହି ଦୁଇ ମୃତ ମହିଳାଙ୍କର ଗୋଟିଏ ଲେଖାଏଁ ପୁଅ ଓ ଝିଅ ଅଛନ୍ତି । ସେମାନଙ୍କ ମୃତଦେହକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସପିଟାଲ ହଣା ଯାଇଥିଲା । ସେଠି ସେମାନଙ୍କ ସ୍କୁଲ ଫେରନ୍ତା ପିଲାମାନଙ୍କ କାନ୍ଦବୋବାଳିରେ ଫାଟି ପଡ଼ିଥିଲା ହସପିଟାଲ ପରିସର । ପୋଲିସ୍ ଘଟଣାର ତଦନ୍ତ କରୁଛି । ଲୁଗା ଶୁଖାଇବା ତାରରେ କୌଣସି କାରଣରୁ ବିଦ୍ୟୁତ୍ ତାର ଲାଗି ଏହି ଅଘଟଣ ଘଟିଥିବା ଅନୁମାନ କରାଯାଉଛି ।