କଟକ : ରାଜ୍ୟ ମହିଳା ସ୍ୱାସ୍ଥ୍ୟ କର୍ମୀଙ୍କ ପାଇଁ ଆସିଲା ଖୁସି ଖବର । ବଡ ନିଷ୍ପତ୍ତି ନେଇଛନ୍ତି ହାଇକୋର୍ଟ । ୨୭୫୩ ବହୁମୁଖୀ ସ୍ୱାସ୍ଥ୍ୟ କର୍ମୀ (MPHW)ଙ୍କୁ ନିଯୁକ୍ତି ପତ୍ର ପ୍ରଦାନ କରିବାକୁ ଅନୁମତି ଦେଇଛନ୍ତି ହାଇକୋର୍ଟ । ଏହା ସହ ସେମାନଙ୍କ ପୂର୍ବ ସ୍ଥଗିତାଦେଶକୁ ମଧ୍ୟ କୋହଳ କରିଛନ୍ତି ।
ଓଏସଏସଏସସି MPHW ନିଯୁକ୍ତିକୁ ଚ୍ୟାଲେଞ୍ଜ କରି ଅନେକ ପ୍ରାର୍ଥୀ ଆବେଦନ ଦାଖଲ କରିବା ଏବଂ କିଛି ଅଭିଯୋଗ ଆଣିବା ପରେ କୋର୍ଟ ସୋମବାର ଓଡ଼ିଶା ସବ-ଅର୍ଡିନେଟ୍ ଷ୍ଟାଫ୍ ସିଲେକ୍ସନ୍ କମିଶନ (ଓଏସଏସଏସସି)କୁ ବହୁମୁଖୀ ସ୍ୱାସ୍ଥ୍ୟ କର୍ମୀଙ୍କ ନିଯୁକ୍ତିକୁ ସ୍ଥଗିତ ରଖିବାକୁ ନିର୍ଦ୍ଦେଶ ଦେଇଥିଲେ ।
ତେବେ ଆସନ୍ତା ୭ ତାରିଖ ଦିନ ବହୁମୁଖୀ ସ୍ୱାସ୍ଥ୍ୟ କର୍ମୀଙ୍କୁ ଦିଆଯିବ ନିଯୁକ୍ତି ପତ୍ର । ଭୁବନେଶ୍ଵର କ୍ୟାପିଟାଲ ହାଇସ୍କୁଲ ଖେଳ ପଡ଼ିଆରେ ଅନୁଷ୍ଠିତ ହେବାକୁଥିବା ନିଯୁକ୍ତି ମହାମେଳାରେ ଏମାନଙ୍କୁ ନିଯୁକ୍ତି ଦେବେ ମୁଖ୍ୟମନ୍ତ୍ରୀ । ଏନେଇ ସୂଚନା ଦେଇଛି ସ୍ଵାସ୍ଥ୍ୟ ଓ ପରିବାର କଲ୍ୟାଣ ବିଭାଗ ।
ସୂଚନାଯୋଗ୍ୟ ଓଏସଏସଏସସି ୨୭୫୩ ଜଣ ମହିଳା ସ୍ୱାସ୍ଥ୍ୟ କର୍ମୀଙ୍କ ନିଯୁକ୍ତି ପାଇଁ ୨୯ ଏପ୍ରିଲ୍ ୨୦୨୩ରେ ଏକ ନିଯୁକ୍ତି ବିଜ୍ଞପ୍ତି ପ୍ରକାଶ କରିଥିଲା ଏବଂ ସେପ୍ଟେମ୍ବର ୨୦୨୪ରେ ଫଳାଫଳ ଘୋଷଣା କରିଥିଲା । ତଥାପି, କିଛି ପ୍ରାର୍ଥୀ ୧୦୦ ମାର୍କ ପାଇଁ ଭୁଲ ଉତ୍ତର ପାଇଁ ନେଗେଟିଭ୍ ମାର୍କିଂ ଥିବା ଅଭିଯୋଗ କରି ହାଇକୋର୍ଟରେ ଆବେଦନ କରିଥିଲେ କିନ୍ତୁ ୧୩ ଟି ଉତ୍ତର ଭୁଲ ଥିବା ଅଭିଯୋଗ ହୋଇଥିଲା ଏବଂ ଆଠଟି ପ୍ରଶ୍ନର ଉତ୍ତର ଉପରେ କୌଣସି ସ୍ପଷ୍ଟତା ନଥିବା ଦାବି କରିଥିଲେ। ତଥାପି, କୋର୍ଟ ଆଜି ସ୍ଥଗିତାଦେଶକୁ କୋହଳ କରି ଓଡ଼ିଶା ସରକାରଙ୍କୁ ମନୋନୀତ ପ୍ରାର୍ଥୀଙ୍କୁ ନିଯୁକ୍ତି ପତ୍ର ବଣ୍ଟନ କରିବାର ପଥ ପ୍ରଶସ୍ତ କରିଛନ୍ତି ।
ଉଲ୍ଲେଖନୀୟ ଯେ, ଓଡ଼ିଶା ମୁଖ୍ୟମନ୍ତ୍ରୀ ସମ୍ପ୍ରତି ୧.୧ ଲକ୍ଷ ଖାଲି ସରକାରୀ ପଦବୀ ପୂରଣ କରିବାକୁ ଘୋଷଣା କରିଥିଲେ ଏବଂ ଏଥିପାଇଁ ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଓଏସଏସଏସସି, ଓପିଏସସି(ଓଡ଼ିଶା ପବ୍ଲିକ୍ ସର୍ଭିସ୍ କମିଶନ) ଏବଂ ଓଏସଏସସି (ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନ) ର ଅଧ୍ୟକ୍ଷମାନଙ୍କୁ ନିର୍ଦ୍ଦେଶ ଦେଇଥିଲେ ।
ଆହୁରି ପଢନ୍ତୁ : କ୍ୟାନ୍ସର ପୀଡ଼ିତ ନନ୍ଦନଙ୍କୁ ମିଳିଲା ସାହାଯ୍ୟ, ସହାୟତାର ହାତ ବଢାଇଲା ହେଲ୍ପ ଫର ୟୁ ଫାଉଣ୍ତେସନ