ପୁରୀ: ଚଳିତବର୍ଷ ରଥଯାତ୍ରା ପାଇଁ ପ୍ରସ୍ତୁତ ଶ୍ରୀମନ୍ଦିର ପ୍ରଶାସନ । ନୟାଗଡ ବନଖଣ୍ଡରୁ ପଞ୍ଚମ ପର୍ଯ୍ୟାୟରେ ରଥକାଠ ବୋଝେଇ ଟ୍ରକ୍ ପୁରୀରେ ପହଞ୍ଚିଛି । ଏଥିରେ ସମୁଦାୟ ୧୨ଖଣ୍ଡ ଫାସୀ କାଠ ରହିଛି । ଏହି ଫାସୀ କାଠରେ ତିନି ରଥ ଚକ ପାଇଁ ତୁମ୍ବ ନିର୍ମାଣ କରାଯିବ । ରଥଯାତ୍ରା ପାଇଁ ମୋଟ ୮୬୫ଖଣ୍ଡ କାଠ ଆବଶ୍ୟକ ଥିବା ବେଳେ ପୂର୍ବ ବର୍ଷର ୬୯ ଖଣ୍ଡ ବଳକା କାଠ ରହିଛି ।
ଚଳିତ ରଥଯାତ୍ରା ପାଇଁ ୭୯୬ ଖଣ୍ଡ କାଠର ବ୍ୟବସ୍ଥା ଆବଶ୍ୟକତା ରହିଛି । ତେବେ ୭୯୬ଖଣ୍ଡ କାଠରୁ ଏ ପର୍ଯ୍ୟନ୍ତ ମୋଟ ୧୮୭ଖଣ୍ଡ କାଠ ପୁରୀରେ ପହଞ୍ଚି ସାରିଲାଣି । ବଳକା କାଠ ପର୍ଯ୍ୟାୟ କ୍ରମେ ଆସିବ । ଗତକାଲି ବୌଦ୍ଧରୁ ଚତୁର୍ଥ ପର୍ଯ୍ୟାୟରେ ୯୬ ଖଣ୍ଡ କାଠ ଆସିଥିଲା । ଆସନ୍ତା ଅକ୍ଷୟ ତୃତୀୟା ଦିନ ତିନି ରଥ ନିର୍ମାଣର ଶୁଭାରମ୍ଭ ହେବାର ବିଧି ରହିଛି। ତିନିରଥ ନିର୍ମାଣ ପାଇଁ ପରମ୍ପରା ଅନୁଯାୟୀ ଶ୍ରୀରାମ ନବମୀଠାରୁ କଟକ ସ୍ଥିତ ଖପୁରିଆ କରତକଳରେ ରଥକାଠ ଚିରଟ ପ୍ରକ୍ରିୟା ଆରମ୍ଭ ହୋଇଛି।