ପଦ୍ମପୁର: ପଦ୍ମପୁରରେ ଲଜ୍ଜା । ୭ ବର୍ଷର ଶିଶୁକନ୍ୟାକୁ ଦୁଷ୍କର୍ମ ପରେ ହତ୍ୟା ଅଭିଯୋଗ । ଜଙ୍ଗଲ ଭିତରୁ ମିଳିଲା ନାବାଳିକାର କ୍ଷତବିକ୍ଷତ ମୃତଦେହ । ମୃତଦେହ ଉଲଗ୍ନ ଅବସ୍ଥାରେ ଉଦ୍ଧାର କରାଯାଇଛି । ପାଇକମାଳ ସୋଢା ନିକଟ ଜଙ୍ଗଲରୁ ନାବାଳିକାଙ୍କ ମୃତଦେହ ମିଳିଛି । ଘଟଣା ବାବଦରେ ସୂଚନା ପାଇବା ପରେ ସ୍ଥାନୀୟ ପୋଲିସ ଡଗ୍ ସ୍କ୍ୱାର୍ଡ ସହ ସାଇଣ୍ଟିଫିକ୍ ଟିମକୁ ଧରି ଛାନଭିନ କରୁଛି । ଏନେଇ ପରିବାର ଲୋକେ ଦୁଷ୍କର୍ମ ପରେ ହତ୍ୟା କରାଯାଇଥିବା ଅଭିଯୋଗ କରିଛନ୍ତି । ଘଟଣାକୁ ନେଇ ପଦ୍ମପୁର ଉପଖଣ୍ଡ ପାଇକମାଳ ଥାନା ଅଞ୍ଚଳରେ ଉତ୍ତେଜନା ଦେଖାଦେଇଛି । ଅଭିଯୁକ୍ତକୁ ଅଟକ ରଖି ପୋଲିସ ତଦନ୍ତ କରୁଛି ।
ସୂଚନା ମୁତାବକ ମୃତ ନାବାଳିକାର ଘରେ ଜଣେ ଲୋକ ରହି କାମ କରୁଥିଲା । ସେହି ବ୍ୟକ୍ତି ଜଣଙ୍କ ନାବାଳିକାଙ୍କୁ ମାଛ ଧରିବାକୁ ଡାକିନେଇଯାଇଥିଲା । କିଛି ସମୟ ପରେ ବ୍ୟକ୍ତି ଜଣଙ୍କ ଘରକୁ ଫେରିଥିଲେ କିନ୍ତୁ ନାବାଳିକା ଜଣଙ୍କ ଫେରି ନଥିଲା । ଏନେଇ ପରିବାର ଲୋକ ସେହି ବ୍ୟକ୍ତିଙ୍କୁ ଝିଅ ବାବଦରେ ପଚାରିବାରୁ ସେ ସନ୍ତୋଷଜନକ ଉତ୍ତର ଦେଇପାରିନଥିଲା । ତାର କିଛି ସମୟ ପରେ ଖୋଜା ଖୋଜି କରି ସୋଢା ଜଙ୍ଗଲ ଭିତରୁ ନାବାଳିକାର ମୃତଦେହ ଉଦ୍ଧାର କରାଯାଇଛି ।