ରାଇକିଆ : ଶୁଣିଲେ ଛାତି ଥରି ଉଠୁଛି, ଅଢ଼େଇଶହ ଟଙ୍କା ପାଇଁ ୮ ବର୍ଷର ପୁଅକୁ ବାପା ମା’ ଦେଲେ ଭୟଙ୍କର ଶାସ୍ତି

ରାଇକିଆ (କେ ନ୍ୟୁଜ୍‌) : ୨୫୦ଟଙ୍କା ଘରୁ ଚୋରି କରିଥିଲା ୮ ବର୍ଷର ପୁଅ । ଆଉ ତାକୁ ଏଥିପାଇଁ ଯେଉଁ ଶାସ୍ତି ମିଳିଲା ଆପଣ ଶୁଣିଲେ ଆପଣଙ୍କ ଛାତି ଥରି ଉଠିବ । ଜନ୍ମ କଲା ବାପା ମା’ ଏପରି ର୍ନିଦ୍ଦୟ ନିଷ୍ଠୁର ଓ ନିର୍ମମ ହୋଇପାରନ୍ତି କେହି ବିଶ୍ଵାସ କରିପାରିବେ ନାହିଁ । ଏପରି ଲୋମ ଟାଙ୍କୁରା ଘଟଣା ଘଟିଛି କନ୍ଧମାଳ ଜିଲ୍ଲା ଜି. ଉଦୟଗିରି ଶ୍ରୀରାମ ପଦାସାହିରେ ।

ଏହି ଗାଁର ବାସିନ୍ଦା ବିଜୁ ତ୍ରିପାଠୀ ନିଜ ଘର ଆଗରେ ଏକ ଗଛରେ ନିଜର ୮ବର୍ଷ ପୁଅକୁ ବାନ୍ଧି ପ୍ରାୟ ୪ଘଣ୍ଟା ପର୍ଯ୍ଯନ୍ତ ନିସ୍ତୁକ ମାଡ଼ ମାରି ଲହୁ ଲୁହାଣ କରିଦେଲେ । ସେଥିରେ ମଧ୍ୟ ତାଙ୍କ ରାଗ ଶାନ୍ତ ହୋଇ ନ ଥିଲା। ଶେଷରେ କିରୋସିନ ଢାଳି ନିଆଁ ଲଗାଇ ଜିଅନ୍ତା ପୋଡି ଦେବାକୁ ଉଦ୍ୟମ ବି କରିଥିଲେ । ଅବଶ୍ୟ ବୋଧହୁଏ ନିଜ ଭୁଲ ବୁଝି ପାରି ବାପା ମା ପରେ ପାଣି ପକାଇ ଶିଶୁ ଗୋଡ଼ରୁ ନିଆଁ ଲିଭାଇ ଦେଇଥିଲେ।

ଆଶ୍ଚର୍ଯ୍ୟର କଥା ହେଉଛି, ଦିନ ତମାମ ପିଲାଟି ଗଛରେ ବନ୍ଧା ହୋଇ ରହିଥିଲେ ମଧ୍ୟ ତାକୁ କେହି ଉଦ୍ଧାର କରିବାକୁ ସାହସ କରିନଥିଲେ। ଆଜି ସକାଳେ ଖବର ପାଇ ଚାଇଲ୍ଡ ଲାଇନର ଅନୁପ କୁମାର ସାହୁ ଏବଂ ଅନ୍ୟ ସଦସ୍ଯ,ଦିଲୀପ କୁମାର ଦାସ ଡିଓ, ବାଲ୍ଯ ବିବାହ ପ୍ରତିରୋଧ ସମ୍ପାଦକ ବିଷ୍ଣୁ ପ୍ରିୟା ପ୍ରଧାନ ଏବଂ ଜି. ଉଦୟଗିରି ଥାନା ଅଧିକାରୀ ନରେଶ ସାହୁ ଘଟଣାସ୍ଥଳରେ ପହଞ୍ଚି ୮ବର୍ଷର ପୁଅକୁ ଉଦ୍ଧାର କରିଥିଲେ । ପିଲାଟିକୁ ଫୁଲବାଣୀ ଶିଶୁ ବିଭାଗକୁ ପଠା ଯାଇଛି ।