୮ ବର୍ଷ ହେବ କିଡନୀ ରୋଗରେ ଆକ୍ରାନ୍ତ, ଜୀବନ ବଞ୍ଚିବାକୁ ସହାୟତାକୁ ଅପେକ୍ଷା କରି ରହିଛନ୍ତି ପରିମଳ

ଉଦଳା(କେନ୍ୟୁଜ୍): ବୟସ ଠୁ , ବଳିଗଲାଣି ଯନ୍ତ୍ରଣା । ଅଭାବ ଯୋଗୁଁ, ବଢିଚାଲିଛି ରୋଗ। ଜୀବନ ଯେ କେତେବେଳେ କାହା ପାଖରୁ କେମିତି ପରୀକ୍ଷା ନେବ ତାହା କହିବା ମୁସ୍କିଲ୍ । ହସ ଖୁସିରେ ବିତୁଥିବା ଜୀବନରେ ଯେ ଦିନେ ଏମିତି କଳା ବାଦଲ ମାଡି ଆସିବ ତାହା କେହି ଭାବି ନ ଥିଲେ । ହେଲେ ଆଜି ସେହି କଳା ବାଦଲ ତଳେ ଗରିବୀର କୋଠାରାଘାତରେ ଜର୍ଜରିତ ହୋଇ ଜୀବନ ବିତାଉଛି ପୁରା ପରିବାର ।

୮ ବର୍ଷ ହେବ ପୁଅ କିଡନୀ ରୋଗରେ ଆକ୍ରାନ୍ତ ହୋଇ ବିଛଣାରେ ଶଯ୍ୟାଶାୟୀ । ମା ବାର୍ଦ୍ଧକ୍ୟର ତାଡନାରେ ଜୀବନ ବିତାଉଛି । ଜୀବନ ଜିଇଁବା ପାଇଁ ଏବେ ଗରିବି ସହିତ ଯୁଝୁଛନ୍ତି ପୁରା ପରିବାର । କପ୍ତିପଦା ବ୍ଲକ ମହୁଲଡିହା ଗ୍ରାମର ଖାନଦି ମହାନ୍ତଙ୍କ ପରିବାର କଥା । ଖାନଦି ମାହାତଙ୍କ ବୟସ ୭୧ ଛୁଇଁଲାଣି । ଆଜକୁ ୨୦ ବର୍ଷ ପୂର୍ବରୁ ସ୍ୱାମୀ ବିଶ୍ୱନାଥ ହାତ ଛାଡି ଆରପାରିକୁ ଚାଲି ଯାଇଛନ୍ତି । ଖାନଦିଙ୍କର ଦୁଇ ଜଣ ପୁଅ ରହିଥିବା ବେଳେ ଜଣେ ପୁଅ ଅଲଗା ରହୁଛି ଏବଂ ପାଖରେ ରହୁଥିବା ପୁଅ ପରିମଳ ମହାନ୍ତ ଏବେ ଜୀବନ ସହିତ କରୁଛି ସଂଘର୍ଷ । କାରଣ ପାଖରେ ରହୁଥିବା ଏକମାତ୍ର ରୋଜଗାରିଆ ପୁଅ କିଡନୀ ରୋଗରେ ଆକ୍ରାନ୍ତ ହୋଇ ବିଛଣାରେ । ତା ଉପରେ ପୁଣି ଟ୍ୟୁମରରେ ଆକ୍ରାନ୍ତ । ଯିଏ କି ଏବେ ଜୀବନ ବଂଚିବାକୁ ସହାୟତାକୁ ଅପେକ୍ଷା କରି ରହିଛି ।

ମୂଲ ଲାଗି ପୁରା ପରିବାର ମୁହଁରେ ଖାଦ୍ୟ ଦେଉଥିବା ପୁଅ ପରିମଳ ଟ୍ୟୁମରରେ ଆକ୍ରାନ୍ତ ହେବା ପରେ ଆଠ ବର୍ଷ ହେବ ଶଯ୍ୟାଶାୟୀ । ମା ଖାନଦିଙ୍କ ଦେହରେ ଆଉ ଚାଲିବାକୁ ଯୁ ନାହିଁ । ପରିବାର ଚଳାଇବା ତ ଦୂରର କଥା । ଖାନଦିଙ୍କ ପୁଅ ବୋହୂ ପଦ୍ମିନୀ ମହାନ୍ତ ପର ଘରେ ପାଇଟି କରିବା ସହିତ ମୂଲ ଲାଗି ପରିବାର ଚଳାଉଛି । ପରିମଳ ଏବଂ ପଦ୍ମିନୀଙ୍କର ଗୋଟିଏ ଝିଅ ଏବେ ପାଠ ପଢୁଛି । ପରିମଳ ମହାନ୍ତ ଆଠ ବର୍ଷ ପୂର୍ବେ କିଡନୀ ରୋଗରେ ଆକ୍ରାନ୍ତ ହେବା ପରେ ପରିବାର ଲୋକେ ତାଙ୍କୁ ଚିକିତ୍ସା ନିମନ୍ତେ କପ୍ତିପଦା, ଉଦଳା, ବାରିପଦା ଏବଂ ଭୁବନେଶ୍ୱର ନେଇ ଚିକିତ୍ସା କରାଇଥିଲେ ସୁଦ୍ଧା କୌଣସି ସୁଫଳ ପାଇ ପାରିନାହାନ୍ତି । ଯାହାକି ଦିନକୁ ଦିନ ପରିମଳଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡିବାରେ ଲାଗିଛି । ଏବେ ନା ସେ ଚାଲିବୁଲି ପାରୁଛନ୍ତି । ନା କାହା ସହିତ ଭଲରେ ଦୁଇ ପଦ କଥା ହୋଇପାରୁଛନ୍ତି ।

ଭୁବନେଶ୍ୱରରେ ଡାକ୍ତର ଦେଖାଇବା ପରେ ଅଧିକ ଚିକିତ୍ସା ନିମନ୍ତେ ଅଧିକ ଟଙ୍କାର ଆବଶ୍ୟକତା ଥିବାରୁ ଅସହାୟ ପରିମଳଙ୍କ ପରିବାର ସଦସ୍ୟ ତାଙ୍କୁ ଡାକ୍ତରଖାନାରୁ ନେଇ ଆସି ଘରେ ରଖିଛନ୍ତି । ପରିମଳଙ୍କ ନିତ୍ୟକର୍ମ ସ୍ତ୍ରୀ ପଦ୍ମିନୀ ଏବଂ ତାଙ୍କ ଝିଅ କରିଥାନ୍ତି । ଏଭଳି ଅବସ୍ଥାରେ ପୁରା ପରିବାର ରହିଥିବା ବେଳେ ପରିମଳଙ୍କ ଚିକିତ୍ସା ନିମନ୍ତେ ଅର୍ଥ ସାଜିଛି ବାଧକ । ତେଣେ ମାଆ ଖାନଦି ବୃଦ୍ଧାବସ୍ଥାରେ ମଧ୍ୟ ପୁଅର ଏପରି ଅବସ୍ଥା ଦେଖି ନିଜ ଆଖିର ଲୁହକୁ ଅଟକାଇପାରୁନାହାନ୍ତି ।

ଏଭଳି ଅବସ୍ଥାରେ ଦୀର୍ଘ ବର୍ଷ ହେବ ପୁରା ପରିବାର ଗରିବିର ତାଡନାରେ ଯୁଝି ହେଉଥିବା ବେଳେ କୌଣସି ରାଜନୈତିକ ନେତା, ଜନ ପ୍ରତିନିଧି, ସରକାରୀ ଅଧିକାରୀ କିମ୍ବା କାହାରି ନଜର ପଡିନାହିଁ । ପରିମଳଙ୍କ ଚିକିତ୍ସା ନିମନ୍ତେ ସରକାରୀ ସ୍ତରରେ ହେଉ କିମ୍ବା କୌଣସି ସହୃଦୟ ବ୍ୟକ୍ତି ସହଯୋଗର ହାତ ବଢାଇଲେ ବାକିତକ ଜୀବନ ଭଲରେ ବିତାଇପାରନ୍ତେ ବୋଲି ଆଶା ରଖିଛନ୍ତି ପରିବାର ସଦସ୍ୟ ।

ସବୁପରେ ଏହି ଅସହାୟ ପରିବାରକୁ ସାହାଯ୍ୟ ନିମନ୍ତେ ସହଯୋଗର ହାତ ବଢାଇବା ଜରୁରୀ ହୋଇ ପଡିଛି । ସରକାରୀ ଅଧିକାରୀ ହୁଅନ୍ତୁ କିମ୍ବା କୌଣସି ସହୃଦୟ ବ୍ୟକ୍ତି ସହଯୋଗର ହାତ ବଢାଇଲେ ଜୀବନ ସହିତ ସଂଘର୍ଷ କରୁଥିବା ପରିମଳ ଜୀବନକୁ ସ୍ୱାଭାବିକ ଭାବେ ବଂଚିପାରନ୍ତେ । ତେବେ ଯଦି କିଏ ପରିମଳଙ୍କୁ ସହଯୋଗର ହାତ ବଢାଇବାକୁ ଚାହୁଁଛନ୍ତି ତେବେ ଏହି ଠିକଣାରେ ସହାୟତା ରାଶି ପଠା ପାରିବେ।