କେନ୍ୟୁଜ୍(ବ୍ୟୁରୋ): ରାଜ୍ୟରେ ନୂଆବର୍ଷ ଯାଏ ଖୋଲିବ ନାହିଁ ସ୍କୁଲ । ୩୧ ଡିସେମ୍ବର ଯାଏ ସମସ୍ତ ସ୍କୁଲ ବନ୍ଦ ରହିବ । କୋଭିଡ୍ ସଂକ୍ରମଣକୁ ଦୃଷ୍ଟିରେ ରଖି ଗଣଶିକ୍ଷା ବିଭାଗ ଏହି ନିଷ୍ପତ୍ତି ନେଇଛି । ଡିସେମ୍ବରରେ କରୋନାର ଦ୍ୱିତୀୟ ଲହରୀ ଆସିବା ଆଶଙ୍କା ରହିଛି । ମୁଖ୍ୟମନ୍ତ୍ରୀ କରୋନା ସ୍ଥିତି ସମୀକ୍ଷା କରି ଦ୍ୱିତୀୟ ପର୍ଯ୍ୟାୟ ସଂକ୍ରମଣ ପାଇଁ ସତର୍କ ରହିବାକୁ ପରାମର୍ଶ ଦେବା ପରେ ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତିକୁ ସ୍ଥଗିତ ରଖାଯାଇଛି । ରାଜ୍ୟରେ ଚଳିତ ବର୍ଷ ମାର୍ଚ୍ଚରୁ ବିଦ୍ୟାଳୟ ବନ୍ଦ ଥିବାରୁ କ୍ଲାସରୁମ୍ରେ ପାଠ ପଢା ବନ୍ଦ ରହିଛି ।
କରୋନା ଦ୍ୱିତୀୟ ଲହର ଆଶଙ୍କା ଯୋଗୁ ସ୍ଥଗିତ ରଖିଥିବା ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ଦାସ । ସ୍ୱାସ୍ଥ୍ୟ ବିଭାଗର ଗାଇଡ୍ଲାଇନ୍କୁ ଅପେକ୍ଷା କରାଯାଇଛି । ସ୍ୱାସ୍ଥ୍ୟ ବିଭାଗର ଗାଇଡ୍ଲାଇନ୍ ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି । ଚଳିତ ମାସ ନବମରୁ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ବିଦ୍ୟାଳୟ ଖୋଲିବାକୁ ଯୋଜନା ରହିଥିଲା । ବିଦ୍ୟାଳୟ ଖୋଲିବା ପରେ ଆନ୍ଧ୍ରରେ ଯେପରି ସଂକ୍ରମଣ ବଢୁଛି, ସେଭଳି ସ୍ଥିତି ଦେଖାଦେବାର ଆଶଙ୍କା ଥିବାରୁ ବିଭାଗ ନିଷ୍ପତ୍ତି ବଦଳାଇଛି । ଆନ୍ଧ୍ର ସମେତ ଅନ୍ୟ କିଛି ରାଜ୍ୟରେ ବିଦ୍ୟାଳୟ ଖୋଲିବା ପରେ ଶିକ୍ଷକ ଓ ଛାତ୍ରଛାତ୍ରୀ ବହୁମାତ୍ରାରେ ସଂକ୍ରମିତ ହେଉଛନ୍ତି । ସ୍କୁଲ ଖୋଲିବା ପରେ ଆନ୍ଧ୍ରରେ ତିନି ଦିନରେ ୨୬୨ ଛାତ୍ରଛାତ୍ରୀ ଓ ୧୬୦ ଶିକ୍ଷକ କରୋନାରେ ଆକ୍ରାନ୍ତ ହୋଇଛନ୍ତି । ତେଣୁ ଚିନ୍ତାରେ ପଡିଛନ୍ତି ଓଡ଼ିଶା ସରକାର ।