ଧର୍ମଶାଳା ବାଣୀପୀଠର ଅନୁଷ୍ଠିତ ହେଲା ପ୍ରତିଷ୍ଠା ଦିବସ ଓ ପୁରାତନ ଛାତ୍ର ସଂସଦର ବାର୍ଷିକୋତ୍ସବ

ଯାଜପୁର (କେନ୍ୟୁଜ): ୧୯୪୭ ମସିହାରେ ପ୍ରତିଷ୍ଠା ହୋଇଥିଲା ଯାଜପୁରର ଜିଲ୍ଲା ଅନ୍ୟତମ ଅଗ୍ରଣୀ ଶିକ୍ଷାନୁଷ୍ଠାନ ଧର୍ମଶାଳା ବାଣୀପୀଠ । ଯେଉଁ ମସିହାରେ ଦେଶ ସ୍ୱାଧୀନ ଲାଭ କରିଥିଲା । ଏହି ଶିକ୍ଷାନୁଷ୍ଠାନର ଇତିହାସ ଓ ଭାରତ ବର୍ଷର ଇତିହାସର ମଧ୍ୟରେ ସାମଂଜସ୍ୟ ରହିଛି । ଏଣୁ ଏହି ଅନୁଷ୍ଠାନ ସମଗ୍ର ଅଂଚଳ ପାଇଁ ଆଲୋକବର୍ତିକା ସଦୃଶ ପାଲଟିଛି ବୋଲି ଅତିଥିମାନେ ମତବ୍ୟକ୍ତ କରିଛନ୍ତି । ଧର୍ମଶାଳା ବାଣୀପୀଠ ପ୍ରତିଷ୍ଠା ଦିବସ ସହ ପୁରାତନ ଛାତ୍ର ସଂସଦର ବାର୍ଷିକୋତ୍ସବ ଆଜି ବାଣୀପୀଠ ପରିସରରେ ଅନୁଷ୍ଠିତ ହୋଇଯାଇଛି । ଛାତ୍ର ସଂସଦର ସଭାପତି ଡା. ବିଜୟ କୁମାର ଶତପଥୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମାରୋହକୁ ବିଶିଷ୍ଟ ବିଦ୍ୱାନ ପଣ୍ଡିତ ବିରେନ୍ଦ୍ର କୁମାର ପଣ୍ଡା ପ୍ରଦୀପ ପ୍ରଜ୍ଜଳନ କରି ଉଦଘାଟନ କରିଥିଲେ ।

ଏଥିସହ ସମାଜରେ ଜାତି ଧର୍ମକୁ ନେଇ ଚାଲିଥିବା ବିବାଦକୁ ଭୁଲି ଆମେ ସମସ୍ତେ ଇଶ୍ୱରର ସନ୍ତାନ ବୋଲି ଭାବି ସମାଜର ହିତ ପାଇଁ କାମ କରିବା ଉଚିତ୍ ବୋଲି କହିଥିଲେ । ମୁଖ୍ୟ ଅତିଥିଭାବେ ବିଶିଷ୍ଟ ସାହିତ୍ୟିକ ଡ. ବିଜୟାନନ୍ଦ ସିଂ ଯୋଗଦେଇ ଅନୁଷ୍ଠାନର ଗରିମାମୟ ଇତିହାସକୁ ବଖାଣିଥିଲେ । ଏହି ଅବସରରେ ସଂସଦର ବାର୍ଷିକ ମୁଖପତ୍ର ‘ବାଣୀବିତାନ’କୁ ଅତିଥିମାନେ ଲୋକାର୍ପିତ କରିଥିଲେ । ଏଥିସହ ପୁରାତନ ଶିକ୍ଷକ ଛାୟାପତି ଜେନା, ଦିନବଂଧୁ ରାଉତ, ସୀତାକାନ୍ତ ବିଶ୍ୱାଳ ଏବଂ ପୁରାତନ ଛାତ୍ର ଗୈାରାଙ୍ଗ ଚରଣ ପାତ୍ର, ଜଗବଂଧୁ ସ୍ୱାଇଁ, ଭିକାରୀ ଚରଣ ଚନ୍ଦ ପ୍ରମୁଖଙ୍କୁ ମାନପତ୍ର ଓ ଉପଢୈାକନ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା । ଚଳିତ ବର୍ଷ ହାଇସ୍କୁଲ ସାର୍ଟିଫିକେଟ ପରୀକ୍ଷାରେ ସର୍ବୋଚ୍ଚ ନମ୍ବର ରଖିଥିବା ଛାତ୍ରୀ ଆକାଂକ୍ଷା ନାୟକ ଓ ଛାତ୍ର ଦେବାଶିଷ ମହାନ୍ତିଙ୍କୁ ପ୍ରମାଣପତ୍ର ପ୍ରଦାନ କରାଯାଇଥିଲା । ଏହି ଉତ୍ସବରେ ବହୁ ପୁରାତନ ଛାତ୍ର ଯୋଗଦେଇଥିଲେ ।